Read Gidar Yahudiyen 2 Bible Online

Yahudiyen 2 - Gidar bible

Yahudiyen 2

¹Vi vaski, say məzi gən zəm aza goŋga an məs məpprəməŋka, vi mədawza ki tive ɓa.

²Halabara məs maslayɗe akiyaŋ farəŋka, goŋga nan arbanək zəni, ɗəf məs dəsban ɓa, warah kita məs dəslə aza mambray nani.

³Mbar mbar mədawkoh kan an məsganək wəkoh metiŋginiŋ di? Ɗəfdaya sən kiyən arbanək wəkoh van dabəŋ, ɗii məs dəpprəməni, arbanenək wənani aziw gininke.

⁴Maŋgəlva bo asɓanək saydawa net də wərban səm sembe nan də sokeneɗ temtemi. Yas kəmpa apsit Əmpəs Salala* sit ɗii nan va an aŋgələ. Wətən Maŋgəlva* akəmək aza wəkoho.

⁵Vi Maŋgəlva dəpsit tive sit maslayɗe dəzəmaŋ gən məlĩ aka dələv məs dədazanəŋ ɓa, an məs mədawpel akanəŋka.

⁶Verse maɓɓan amna: Mi ɗəf kan kəɗum gən akan di, wətən Adamu nanawa naslga sləma akan di?

⁷Kəgəsanək pay suɗike azet maslayɗe, kəpsənək gakdak metiŋgin va məlĩya.

⁸Kəpsənək ko mi pak amba təlni. Yaŋ Maŋgəlva aɗi zəga pak amba təl ɗəffa va an məs anah wənnani. Amma məɓəl ula ɗəf dawzəm məlĩ aket zigeɗ van pak tagay ɓa.

⁹Amma mulak va Maŋgəlva agəsan Zezu amba tilit maslayɗe pay suɗike, vi Zezu amtək viyit ɗii pakə, dəndən ni kan merah mbəlembəle na Maŋgəlva, kakaŋ na Zezu arahək gakdak də wəɗi kini, vi bonoy məs assə də əmta nani.

¹⁰Vi vaski Maŋgəlva dəzəməɗ zəga pakə ndən dədawgani, makran aŋgluwək vaska, akpaŋganək Zezu təstəssə də wəppan adəv bonoy, vi dəke gin kirin diiɗa adəv gakdak nani. Vi Zezuwi dədawket atəki nawkoho.

¹¹Zezuwi dəskoɓ mambray net ɗiiyi, ɗii məs məskoɓ mambray net van bo akpaŋgaŋgək Affit taka. Vini wil dədanən Zezu daw yet nok milmiŋgiɗwa ɓa.

¹²Va anah na: Aw Maŋgəlva nawa, wanəpel wənok azet milmiŋgiɗwa, waməya gəlya na gakdokok awalaŋ wəkkal net ɗii na pakə.

¹³Yaŋ anah əmpa na: Wanəpan kiyu pak ava Maŋgəlva. Yaŋ məs wənah əmpa na: Inyakəŋkə dit kirin məs Maŋgəlva avayə.

¹⁴Kirin net tahəŋ də gəɓa ziti dit mbeli, ndəni kan Zezu bo asan va ndəɗaŋ, agəmək gəɓa zə ɗəffa vaneti, aɗɗa vasna, vi də əmta nani adawzan ɗəffan də sembe aka əmta, ndəni Satan.

¹⁵Vi kamet ɗii mes dəsoŋ balemɗe adəv pay nanziya na zeŋgillet pakə, vi geslne adek sən əmta.

¹⁶Wənan agilik kotakə, sit maslayɗe adabaah sit ɓa, amma va ɗerewel anah na: Tay baah sit kirtin Abraham.

¹⁷Dewle say dəgil gən va milmiŋgiɗni adəv zəga pakə, vi dəsan gən daya net məs dəlveŋge, an də goŋga də ula saha adəv wəza nan pak aba Maŋgəlva, vi ɗii dərəhaŋ gən wəviyan mambray neti.

¹⁸Kakaŋ na waɓap wəbaah sit ɗii məs nadəv wəraka, vi nan bo mərakani azəmək saha.