Read Gidar Yahudiyen 3 Bible Online

Yahudiyen 3 - Gidar bible

Yahudiyen 3

¹Munokum milmiŋgiɗu kretiyenɗe, məs Maŋgəlva ayə nawtoŋgukum məlĩ nani, məɗumon wənna Zezu an Maŋgəlva aslən dəsan gən daya net məs dəlveŋge də wətaf an məs mədarban wənanəŋka.

²Vi tayəɗɗa zəga təstəssə aza Maŋgəlva, muwelni vi wəzaŋka, va Moyis asan təstəs aka wəza eŋgil ana Maŋgəlva da pakə.

³Mərkə gəla adayək ki gəla də gakdaka. Vaski bo Zezu adayək ki Moyis də gakdaka.

⁴Gəla pak ɗəf dədaw ziw gəni, amma Maŋgəlvayi dədaw ziw gən zəga pakə.

⁵Moyis təstəssi adəv gəla na Maŋgəlva pakə. Gawla na Maŋgəlvayi, apelik wənnet zigeɗ məs Maŋgəlva adarbet adəv pay məs dədazani.

⁶Amma Krestuwi Wətən Maŋgəlva* məs də goŋga, Ɗəfdayayi eŋgil ana Maŋgəlva da, mənamtə gəla nani, an məppan wəsok zəm də goŋga nan ɓa, an mənam tatə gan ha pay wəgrak nani.

⁷Əmpəs na Maŋgəlva amna: An kəpprəmənək wəlaw dəpaŋka,

⁸kədawɓoŋgoŋ va net dəhiŋgiɗkum aɓoŋgoŋ akaw pay wərak agəɗ a muya ɓa.

⁹Adaki dəhiŋgiɗkum arakawəni, aslanənək wəɓəs nawa, ko də adawlanən wəza naw wəsva kaklaw poɗo.

¹⁰Ndəni kan gədəvu adə aketi, yaŋ nənah na: Tahəŋ wəzlaɓaŋ də wəɗum neti, də sənən tive naw ɓa.

¹¹Vi wəda gədəv nawi nəsuway na: Arəhaŋ na wətoŋ atəki naffet naw ɓa.

¹²Milmiŋgiɗwa məzi zukum, vi ko ɗəf taka səmbokum adawsan də makran mbrayen məza də wətaf ɓa, kapan Maŋgəlva məs də Zeŋgille ɓa.

¹³Məsəɓ sən zukum pay pakə ha faɗə, va dəpaŋka. Va ɗerewel anah na: Mambray adawmbəɗokum ɓa, kədawɓoŋgoŋ ɓa.

¹⁴Vi mənam pak məkpaŋgək ɗii na Krestu, an mərmak wənnan də makram taka məppan ɓa, va mərma wənnan daga wətəŋ nani.

¹⁵Ɗerewel na Maŋgəlva amna: An kəpprəmənək wəlan dəpaŋka, kədawɓoŋgoŋ va dəhiŋgiɗkum aɓoŋgoŋ aka Maŋgəlva ɓa.

¹⁶Maynawaŋ dəpprəmən wəla Maŋgəlva aɓoŋgoŋ akan di? Ɗii məs Moyis agil git sə Misra pak nekəŋ.

¹⁷Maynawaŋ gədəv Maŋgəlva adə aket wəsva kaklaw poɗo di? Gədəvən adək aket məɗɗaŋ mambraya, məs dəsbraŋ a muya amtaŋ.

¹⁸Yaŋ Maŋgəlva a suwayə: Atoŋgoŋ na atəki naffet naw ɓa. Sit mədəŋga adawpel di? Aket ɗii muɓoŋgit nak adawpele.

¹⁹Mulaka dətoŋgoŋ atəki naffet nak ɓa, vi dətafaŋ ɓa.