Read Gidar Yahudiyen 5 Bible Online

Yahudiyen 5 - Gidar bible

Yahudiyen 5

¹Daya net məs dəlveŋge pak sə waleŋgit ɗii adaw welini, wagəɗ wəza sən Maŋgəlva viyit ɗiiyi, wapsən zəga an məkiyən də zəga mətaw wəlan sən Maŋgəlva, vi kaviyan mbrayen net ɗiiyi.

²Waɓap ula saha aket ɗii məs tahəŋ də wəsən ɓa, məɗɗaŋ mambraya, vi ndən sən kini məverni aza zəga temtem diiɗa.

³Vi vaski say dətaw gən wəlla zəga vi kaviyan mambray na ki zən tagay, asna wataw wəlla zəga viyit ɗii pakə.

⁴Ɗəf tay dədawsan də gakdak ko daya net məs dəlveŋge na Maŋgəlva ɓa. Say Maŋgəlva dədaw yani, va aya Aron.

⁵Vaski bo Krestu də gakdakan zən də san gən daya net məs dəlveŋge na Maŋgəlva ɓa. Amma Maŋgəlvayi dənahsən na: Əstə Wətuwa, nəwəkuk dəpaŋka.

⁶Anahək atəki maɓɓan əmpa na: Wakəsok məs dələv* naw ha faɗə va Malkisadaka.

⁷Daga Zezu adawsan aka dəlva, azulik də wəkkaman Maŋgəlva də wəhəm dit sini, vi Maŋgəlva waɓap wəkoh gən səma əmta. Maŋgəlva bo apprəmək wəkkam nani vi tay ɓəsən də gakdakan zən ɓa.

⁸Amma ko vi asan Wətən Maŋgəlva* zlaŋ, ayaganək wəpprəm ma də wəzəm saha.

⁹Adan Zezu agrak bonoy nan temtem də wəza nan pakə, akpaŋgək affən wəkoh an ha faɗə vi ko naway an məs dəpprəm mani.

¹⁰Maŋgəlva bo aɗiyək ka daya net məs dəlveŋge nani, va məs dələv Malkisadaka.

¹¹Apələk wən diiɗa məs nənah sukum ɓa, amma tuwãhi wərban sukum, vi kəsənən na gabban ɓa.

¹²Pay nan agapka kəsoŋ gən mərbaŋ zəga, amma ha kakaŋka mokum aka ɗəf dərban sukum gən zəga an məs tay tuwãh adəv wənna Maŋgəlva ɓa. Aslək kəzəmaŋ gən way məsbəkən ɓələ, amma munokum tatu waɗaŋ tagay.

¹³Ko naway məzuwaɗa, muzliyayi tagay, dəsən uɗakan goŋga də tepelke ɓa.

¹⁴Ɗii gugiriɗ agapaŋgək nawzəm way məsbəkən ɓələ, vi asərək gənənək ziti, asənənək uɗakan mogon də mbrayen.