Read Gidar Yahudiyen 6 Bible Online

Yahudiyen 6 - Gidar bible

Yahudiyen 6

¹Vi wənəŋki, mədaməs abe abe də wəsən va ɗii gugiriɗe, mədasban əsam adəv wəsən net kretiyenɗe məs dabəŋ ɓa, mədawtəŋ gabban nam temme ɓa, an dədawtər wəray na wəppan wəza an ɗarə, say wətaf Maŋgəlva.

²Wərban wənna baptem temtemi, də wəɗi va ɗəf aka ɗəffa, də usilyo sətəki əmta də kita an ha faɗə.

³Aski mədadam abe abe də wəɗɗani an Maŋgəlva aŋgerke.

⁴Mbarmbaryi ɗii məs də mulyoŋ dirɓe adazoŋ wətubiyaŋ əmpa di? Asuwaŋgək ɗaah atəki babar na Maŋgəlva, ananənək zəga məs sə disiŋ, atafənək haran net səva Əmpəs Salala*.

⁵Asənənək na wəpel na Maŋgəlva mogoni, asənənək sembe naka dələv an dədazani.

⁶Yaŋ amilyoŋ dərɓe, agəɗ na ɓa, azoŋ na wətubiyaŋ ɓa. An ɗəf amilik dirɓe, tay va ɗəf adakpa' Wətən Maŋgəlva* aka wəlaŋga məzliwrihe əmpa aɗi sənək vamvi ama heret ɗii pakə.

⁷Maŋgəlva tayəɗɗa zəzaya aka dəlva, dələv tay saa iŋkile na buwən məs Maŋgəlva adawziyəŋka, tay gilgit gazlembeɗi, vi tay tər wəray sit məzən seeŋ.

⁸Amma an tayə gilgin gedirgeɗ kaaka də kemvile, atər na wəray ɓa. Anzi naɓa, Maŋgəlva waray gən də wənzlan ngawsa.

⁹Amma ko an mənam tatə pel vas zlaŋ, bayneŋgiɗu kənanaŋ, məsənək wən nokum lewlewi, kəsənənək tive nawkoh mogoni.

¹⁰Maŋgəlva məs də goŋgayi, asgət na ki wəza nokum ɓa, walla wənna əŋgla nokum məs kərbaŋ sənən də wəbaah sit ɗii məs dətafaŋ, milmiŋgiɗ kuməŋ, munokum tatəbaahaŋsit kakaŋka'a.

¹¹Məŋgəl na ko naway suwalokum pakə, dəmbat abe abe də wəsok zəni ha pay wəgrak nani, vi kərəhən gən zəga məs kədawgaŋ.

¹²Məŋgəl kəsoŋ gən mətampəlɗe ɓa, məsoŋ va ɗii məs dətafaŋ dabəŋ tahəŋ də wəɓəsəni vi kawrəh an məs Maŋgəlva anah na wapsəmə.

¹³Pay Maŋgəlva aynan wənnan də Abraham, yaŋ asɓan wənan də wəsuwaya, yaŋ asuway sən zən katər gəni, vi ɗəf tay dəday kiyən ɓa.

¹⁴Amna: Intatə inan wənnaw di'isi, wagəɗ suk zəzaya, əlfa nok wanzlər diiɗa.

¹⁵Abraham agak də wəɓəsən, ndəni arəh zəga an məs Maŋgəlva anahsəni.

¹⁶An ɗəf suwayka, asuwayək də ɗəf məs dəday kini, wagrak wənna walaŋ zit də ɗəf nani.

¹⁷Maŋgəlva aŋgələk wərban kotak sit ɗii məs dədawrəhaŋ zəga məs aynan wənnani. Ndəni asɓan wənnan də wəsuwaya, wən məs aynəŋ apəl na ɓa.

¹⁸Zəga tay sula apəl naɓa, ndəni wən minani də wəsuwaya, Maŋgəlva awəna wən dənɗaŋ ɓa. Ndəni dədasɓamə, mərma gən wən an nawga an məs apsəmə.

¹⁹An məs mədawgaŋka, ndəni azam va təbəs məkpa' bəlay, məkpa'i zeŋgillem dəni gesiŋ kərtəhyi zəga nani, tay toŋ bal sən godo məs duɗakan gədəv gəla metiŋ na zuli na disiŋ ha gap atəki nani məs salala.

²⁰Zezu atoŋguk dabəŋ kiyəm mənam məs nawtoŋ adaka, vi mi atoŋ adaka, akpaŋgək daya net məs dəlveŋge ha faɗə va Malkisadaka asani.