Read Gidar Yahudiyen 7 Bible Online

Yahudiyen 7 - Gidar bible

Yahudiyen 7

¹Malkisada kaŋka məlĩ na zəga Salalayi*, məsdələv na Maŋgəlva məs də gakdaki. Adan Abraham adawmilyan səma wəgay məs abay məlĩyeŋge, Malkisadaka aləmək dəndən, agəɗ sənək zəzaya.

²Abraham apsənək klaw na zəga məs arah pak sən Malkisadaka va wənah na ndəni məlĩ na goŋga. Ndəni məlĩ na Salim, va wənah na, məlĩ na zamə.

³Ɗəf dəsən affən, dət man ɓa, walla dəhiŋgiɗin ɓa, ɗəf dəsən pay muwan ɓa, walla pay amtə ɓa. Agilik va Wət Maŋgəlva, wasan məs dələv na Maŋgəlva ha faɗə.

⁴Mula gakdak na Malkisadaka. Dəhəm Abraham apsənək klaw na zəga nan məs arah sə ma wəgaya.

⁵Ma henziŋ apsitik tive sit kirtin Lewi məs dəsoŋ məs dəlveŋge, dətafən gən klaw na zəga net ɗii na Israyel, va wənah na dəŋglaŋ gən avet əlfiŋgiti, məs zev Abraham kaaka'ə.

⁶Malkisadaka bo nan zev Lewiyi ɓa, amma atafək klaw zəga səva Abraham, agəɗ sənək zəzay sən ɗəf məs dərah wən minan na Maŋgəlva.

⁷Wəbay ma tay ɓa, ɗəf dəgəɗ sən zəzaya, adayək ki ɗəf dərah zəzay də gakdaka.

⁸Adəv wəza net məs dəlveŋge, məzutafaŋ klaw na zəga amtaŋka, amma adəv wəza na Malkisadaka atafək klaw zəga, amtə na ɓa, va ɗerewel anahə.

⁹Va wənah na: Adan Abraham apsən klaw zəga nani, Lewi bo apsənəka ko vi kirtin adawtafən klaw na zəga nan zlaŋ.

¹⁰Pay nani muwani Lewi tagay ɓa, amma taya dəv dəhəm Abraham tagayɗa daga Malkisadaka aləm də Abraham.

¹¹Maŋgəlva apsitik ma henziŋ sit Israyelɗe, aziw gənək wəza nan avet məs dəlveŋge, va wəza net məs dəlveŋge kirtin Lewi məkki na, wəray tay na məs dələv maɓɓan dəde gən məs dəgil va Malkisadaka ɓa, məza zev Aron ni ɓaɓa.

¹²An wəza na məs dələv akpaŋka, dewle ma henziŋɗe bo wakpaŋgaŋ.

¹³Zəga pak aka Ɗəfdaya nam apeli. Nani ma əlfa maɓɓani, ɗəf tay dəsan ɗaah məs dələv səza ma əlfa nan atəki nawtaw wəlla zəga ɓa.

¹⁴Ko naway pak asənək na adəv ma əlfa na Zuda muwani. Pay Moyis adawpel wənnet məs dəlveŋge, dəpel ɗaah wənna ma əlfa ɓa.

¹⁵Apprəm an məs dədawgil gən gabba wənnəŋka, məs dələv maɓɓan adeke, məs dəgil va Malkisadaka.

¹⁶Nan dərəh məs dələv nan də ma henziŋ net ɗii ɓa, amma arəhək məs dələv nan də sembe də zeŋgille naswa ha faɗə.

¹⁷Vi ɗerewel anəhək na: Wakəsok məs dələv ha faɗə va Malkisadaka.

¹⁸Ma henziŋ an laŋka, məsgani vi məverni, dətər wəray ɓa.

¹⁹Vi ma henziŋ na Moyis aɓapna kaɗɗa ɗəf təstəs ɓa, amma an məs mədaw ga adek kana, ndəni dədaw kəm gu'o də Maŋgəlva.

²⁰An dəday kiyən pak na, wəsuway na Maŋgəlva taya kani, məs dələv an lahəŋ məɗiyən məza də wəsuway ɓa yi.

²¹Amma Maŋgəlva aɗiyək Zezu aka wəza na məsdələv nan də wəsuwaya, yaŋ Maŋgəlva amna: Ɗəfdaya asuwayka, akpaŋgana wəɗum nan ɓa. Wakəsok məs dələv naw ha faɗə.

²²Vini məsənək gesiŋ, Zezu tay də wən minan metiŋgin dayki an laŋka.

²³Wən maɓɓan tay, məs dəlveŋge en laŋka, net diiɗa həŋ, vi ɗii meɓɓet wamtaŋ, aɓapəna wəsban wəza net ɓa.

²⁴Amma na Zezu, nan tay san madaran ha faɗə, wəza na məs dələv nan agrak na ɓa.

²⁵Vi vaski waɓap wəkoh git ɗii məs akə aza Maŋgəlva kakaŋka də an nawmbat abe ha faɗə, vi tay san madaran ha faɗə wakaman Maŋgəlva viti.

²⁶Zezuwi məs dələv metiŋgini, də sembe nawtər səm wəray nam pakə. Salalayi*, mambray taya zan ko suɗike ɓa, awɗakək dit məɗɗaŋ mambraya, məslani a disiŋ ki disiŋ.

²⁷Dəgil va məs dəlveŋge meɓɓet ɓa, nan wərayən taya za wəpsən zəga mətaw wəlan pay pak ɓa, vanet adapsənən dabəŋ vi mambray neti, asna wapsənən vi mambray net ɗiiyi. Amma yaŋ nan apsən zeŋgillen ka sazlaga, ndəni sazlaga an taka, təl taka bo məkki ha faɗə.

²⁸Ma henziŋ na Moyis awelik ɗii dəsoŋ gən məs dəlveŋge. Amma wəsuway na Maŋgəlva məs dəde dərɓaga ma henziŋ, awelik Wətəni məs təstəssə dəsan gən məs dələv ha faɗə.