Read Gidar Zak 1 Bible Online

Zak 1 - Gidar bible

Zak 1

¹Ɗereweləŋka, in Zak nəvere, əntə məgəɗ wəza na Maŋgəlva də na Ɗəfdaya Zezu Krestu. Nəsɗetik ɗii na Maŋgəlva məs dətrayaŋ aka dələv pakə.

²Milmiŋgiɗwa, məneken zukum diiɗa an wən tattuwãha temtem arəh kumuko.

³Vi kəsənənka pay wən tattuwãh asla wətaf nokum, an munokum tat ɓəlɓəl də wətaf nokum, waɓəlokum aka an məs kəɓəsaŋ.

⁴Amma məzi zukum kəsoŋ gən ɓəlɓəl ha pay wəgrak nani, vi kəsoŋ gən təstəs məza də mambray azokum ɓa.

⁵An ɗəf səmbokum maɗulan nawsən an va adaɗɗa tay diiɗa ɓa, say də kaman Maŋgəlva wapsəni, wapsən ko naway pak də wəŋgla agbakan na ɓa.

⁶Amma say də kam gən də wətafən na Maŋgəlva wapsəni, məza wəɗɗa kuzuŋ ɓa, ɗəf məs dəgəɗ kuzuŋ pak tay va vovolumɗe net iŋkile a pe'e, məs səmnya adawkan atəki məs aŋgəl pakə.

⁷Ɗəffan vaska aɗum nawrəh ko mi səva Ɗəfdaya ɓa.

⁸Vi dəpan kiyən sən Maŋgəlva ɓa, dəsən an va adaɗɗa də wəɗum nan ɓa.

⁹Aza kretiyen məs saha, də neken zəni vi Maŋgəlva waɗi sən kini.

¹⁰Aza kretiyen məs arya bo də neken zən tamə va Maŋgəlva adawgəsani. Vi məs aryeɗ wamtaŋ va wəfiyo na zəga awra.

¹¹An pay tayə zla də təki kakaaha, waɓit wəfiyeɗ net zigeɗi, wayo'oŋ, mogon net pak wagrakə. Vaski bo məs arya bo wəmtə pay adawgay də wəza na arya.

¹²Zəzay aza ko naway məs dəɓəs wən tattuwãha, an asanək də sembe aɓəsəka, warah zəŋgille va an Maŋgəlva anah na wapsit ɗii məs dəŋgluwəni.

¹³An wərak armak ɗəffa, adawnah na Maŋgəlva də rakawa ɓa. Vi ɗəf arakan na Maŋgəlva ɓa, Maŋgəlva bo arakan ko naway ɓa.

¹⁴Amma an wəɗum mbrayen armak ɗəffa, an wəsim zəga nan ambəɗanəka, armak kaɗɗa mbrayen.

¹⁵An wəɗum mbrayen awək amakrani, wakpaŋ mambraya. An mambray aɓayka, waka akəti əmta.

¹⁶Milmiŋgiɗwa ɗəf adawrakokum ɓa.

¹⁷Əvəl mogoni də an Maŋgəlva adapsəmə, pak sə disiŋ ade, zəga nan səza Maŋgəlva ade, məs dəzəmiɗ zigeɗ məzu kasakaŋ pak a disiŋ. Maŋgəlva nan akpaŋ na ɓa, va zigeɗis ada kpaŋgaŋ wəpanən guzli ɓa.

¹⁸Də wəŋgla nani apsəm zeŋgille gəm də wəpel nan an gesiŋ, vi təki nasuwa nam dəsan gən dayki zəga məs azəməɗ pak abani.

¹⁹Milmiŋgiɗu na makrawa: Məɗum aka wənnəŋka, ko naway dəpak sləman wəpprəm wənnəŋka, amma adaw gəm zən wəpel də kakara ɓa, adaw gəm zən wəda gədəv ɓa'a.

²⁰Vi ɗəf mədə gədəva, aɓapna wəɗɗa zəga nenek zə Maŋgəlva ɓa.

²¹Vi wən aski məppan wəza mambray sə makrokum pakə. Kədaɗɗaŋ mambray əmpa ɓa, məpak sləmokum amba wənnəŋka, məs Maŋgəlva aɗi amakrokum, ndəni də sembe nawkoh gukum sə ma əmta.

²²Kəda soŋ məzapprəm wənna Maŋgəlva də sləmokum kaka ɓa, gəssi. Kay, say məɗɗa an məs wənna Maŋgəlva anahə.

²³Ko naway dəpprəm wəpel na Maŋgəlva kaaka'ə amma dəɗɗa an anah ɓa, asna nan tay va ɗəf məzula haran də darawgal, awlak harani va asani.

²⁴Ambatka, asgətək go'ləŋ ki va asani.

²⁵Amma ɗəffan məzə ɗum akani məzəsban wən məs ma henziŋ na Maŋgəlva anahə, Maŋgəlva waɗɗa zəzay aka wəza nani, vi tayəɗum akani, tayəɗum aka ma henziŋ van pay pakə, məza wəpprəmən ɗar mekeleŋ go'ləŋ ndən zəgət kiyən ɓa. Vi ma henziŋ nan mogoni sawɓa, tay də sembe nawgil gəm sədəv balam na mambraya.

²⁶An ɗəf aɗiyək zən va ɗəf na Maŋgəlva, an azi zən aza wəpel na man ɓa, zən adaw ɗiyəs dar mekeleŋgi, tepelke adawa aka zəni.

²⁷Aŋki Maŋgəlva Affən aɗi ka ɗəf dəsban gəni: Wəɗum aket mətiwɗeŋge, dit gil net gəbayɗe aka wəzəm saha neti, də wətaɗ ki zəni adawtoŋ adəv wənna duniya kawray gən ɓa.