Read Gidar Zak 2 Bible Online

Zak 2 - Gidar bible

Zak 2

¹Milmiŋgiɗu na makrawa, adan kətafənək Ɗəfdaya nam Zezu Krestu məs də gakdaka, kədawɗeketin ɗii vi wənna arya ɓa.

²An ɗii azoŋguk sula atəki nakkal nokum, məs arya aguluk lukut mogoni də ndama na meleŋge aka vani, ɗəf maɓɓan bo məs sahayi, aguluk lukut məŋgarən.

³Wakəgakdakanən ɗəf də lukut mogoni, wakənah sənən na: Asok aka mazaŋga mogoni. Asna wakənah sənən məs saha tam na: Aziw eskiŋ walla asok afuŋ.

⁴An munokum tatə uɗeketin ɗii vaska, mbrayen kədaɗɗaŋ, də wəɗum nokum mbrayenəŋka.

⁵Milmiŋgiɗu na makrawa, məpak sləmokum amba wəpel nawa. Maŋgəlva awelik məs saheŋɗe na zəga na duniya dəsoŋ gən məs aryeɗ də wətaf Zezu Krestu: Vi dəsoŋ gən adəv məlĩ na Maŋgəlva va an məs anah na wapsit ɗii məs dəŋgluwəni.

⁶Amma nokum munokum tatə gəsetin məs saheŋɗe. Ya naway dədawzəm gukum saha di? Naway dədawkukum abet mətawaŋ kita di? Məs aryeɗeŋ ɓa sa?

⁷Ndəɗaŋgəŋ məzu ray gənən iya mogon məs Maŋgəlva apsukuməŋka.

⁸An kəsbanənək ma henziŋ na Maŋgəlva, məs məverin adəv ɗerewel na Maŋgəlva məs dənah na: Aŋglu meggeko va kəŋglu zuko, asna kəɗɗaŋgək mogoni.

⁹Amma an kuɗeketinik ɗii vi wənna arya neti, kəɗɗaŋgək mambray dəndən ma henziŋ van bo wataw kita akokum vi kəgəsanənək ma henziŋ.

¹⁰An ɗəf asbanək ma henziŋ pakə, amma agəsanək antaka, kawtawi kita akan va agəset ma henziŋɗe pakə.

¹¹Vi Maŋgəlva məs də nah na kədaɗɗa mana'a ɓa, anahək bo na: Kədawbay gəbay ɓa. Ya ko an kəgəɗ mana'a ɓa, amma kəbayək gəbaya, kəgəsanək ma henziŋ na Maŋgəlva pakə.

¹²Də wən məs kədawnahaŋ pakə, də an məs kədaɗɗaŋ pakə, məsəna Maŋgəlva wataw kita akokum də ma henziŋ məs nawgil git ɗii səka balam neti.

¹³Vi ɗəf məs awla saha aka ɗəf ɓa, Maŋgəlva bo wataw kita akan məza ula saha akan ɓa. Amma an kawla saha aket ɗiiyi, asna nok bo kita arumuk na ɓa.

¹⁴Milmiŋgiɗwa, an ɗəf anahək də man ɗar na atafək Maŋgəlva, amma wəza nan dəgil gən wətaf nan ɓa, mi adawtərsən di? Wətaf zemvin as wakoh gən sa?

¹⁵An milmiŋgiɗuk kretiyenɗe tahəŋ dit lukutɗe ɓa, tahəŋ də zəga nawzəm ɓa.

¹⁶An kənah sitik na: Maŋgəlva dəgəɗ sukum zəzaya, dəpsukum lukutɗe dəzəm gukum kəbaŋ gəni. Amma an kəpsit zəga məs wərayit azan ɓana madawtər di?

¹⁷Vaski bo an ɗəf atafək Maŋgəlva, ya tayəɗɗa wəza məs Maŋgəlva anah ɓa, wətaf nan atərna wəray ɓa.

¹⁸Amma an ɗəf anahək na: Atafək Maŋgəlva, naw bo əntat də wəza. Wanəzlan sən na: Arban su wətaf nok məza wəza nan ɓaŋka, naw bo wanərban suk wətaf naw də wəza nawa.

¹⁹Kətafək na Maŋgəlva, ndəni taka kaaka'ə, lewi kəgəɗə, tuyeŋɗe bo atafənək vaska ha wəkereŋ sən geslne nani.

²⁰Dərwa kənani, wakəŋglu nərban suk gən na wətaf məza wəza ɓana atərna wəray ɓaŋ sa?

²¹Də mi dəhəm Abraham asan ɗəf təstəs aba Maŋgəlva di? Vi wəza nani, məs apsən wətən an Isak ka sazlaga sən Maŋgəlva.

²²Kəsən ɓa sa? Wətaf na Abraham asapək də wəza nani. Ndəni kan wəza aknahan wətaf nani.

²³Vaski bo aknahan wən an məs Maŋgəlva anah adəv ɗerewel məsvani, amna: Abraham atafək Maŋgəlva, Maŋgəlva aŋɗanək ka ɗəf təstəs abani. Yas Maŋgəlva aya na baynawa.

²⁴Kəsənək kana, ɗəf wasan təstəs aba Maŋgəlva vi wəza nani də wətafi kaaka ɓa.

²⁵Vaski bo məɗumon wənnat Rahap məs akən təsat bərviyak laŋka. Təkpaŋgək ɗak təstəs aba Maŋgəlva vi wəza nata, məs tətaf masləŋɗe net Yahudiyenɗe annat da, də təbaah sit də wəmilyoŋ dəka tive maɓɓani, də dəkohoŋ gəni.

²⁶Vaski bo an gəɓa zə ɗəf tay də əmpəs ɓa amtəka atərna wəray əmpa ɓa, vaski wətaf məza wəza ɓa məmtəni atərna wəray ɓa.