Read Gidar Zak 3 Bible Online

Zak 3 - Gidar bible

Zak 3

¹Milmiŋgiɗwa, ɗii adasoŋ diiɗa mərbaŋ wənna Maŋgəlva suwalaŋkum ɓa. Kəsənənka mənam mərbə wən kawtawi kita akam daykiyit ɗii pak də tattuwãha.

²Mənam pak mənam tatə ray gən wən pay pak də tive temtem diiɗa. Ɗəf məs awray gən wən də wəpel nan ɓa, nan ɗəf mogoni sawɓa, asənək ərma zən səza mambray pakə.

³Mula va mədawgul sit elzeɗ amet pəlseŋge, vi dədawaŋ gən atəki məs məŋgələ, mərah gən wəket atəki məs məŋgəl pakə.

⁴Məɗumon wənnet bəlayɗe də gugiriɗe net pakə, də səmnya adazan də sembə aket pakə, amma məzəŋkoron tayəŋkoron dət zəgak muzliyakə, tay kan atəki məs aŋgəl pakə.

⁵Vaski bo də hərzləm ɗəffa, də muzliyak nan pakə, tay pel wən nawla zən diiɗa. Məɗumon bo va slay offo muzliyak tədawzla muya pakə.

⁶Hərzləm ɗəf bo tay va offo, akkalanək mambray na duniya pak azani, tay san adəv gəɓa zə ɗəffa, tay tray gən mambray adəv gəɓa zə ɗəf pakə. Hərzləm ɗəf tayəsɗa offo məs naw zla pay nanziya nam pak təŋ səza uwa namə ha gap pay namta, hərzləm ɗəffa offo nan tay va offo məs amta ɓa.

⁷Ɗəf waɓap wəsərək gən zigeɗ nawra pakə: Biŋgeɗi, zəga məkrokoni dit kilif pakə.

⁸Amma ɗəf tay naw ɓap wəsərək gən hərzləmən ɓa, məkuni sawɓa ɗəf tay naw ɓap wəsərək gən ɓa, vi aknahək də muwən nawbay ɗiiyi.

⁹Də hərzləm ɗəffi bo mədaw gakdakan Ɗəfdaya nam Affəmə, dəni mədawret ɗii məs Maŋgəlva azəməɗ də gulyoŋ va ndəni.

¹⁰Wən na gakdakani wənna wəra pak səza ma ɗəf takaŋ pak adawgilyani. Milmiŋgiɗwa an vas tay law ɓa sam.

¹¹Heret iŋkile taka ayəm na iŋkile nenekɗe, dit iŋkile nzonzomɗe pak ɓa.

¹²Milmiŋgiɗwa, sukoyo awəna hereme ɓa, wəlaŋga na biya bo awəna sukoyo ɓa'a. Vaski bo iŋkile mbreyit akpaŋgaŋ na iŋkile gənɗət ɓa.

¹³Ɗəf tay də maɗulan məzu sən zəga awalaŋkum sa? Say dərban gən də wənziya nan mogoni, də wəɗɗa wəza mogoni, də wəɓegən ki zəni də maɗulani.

¹⁴Amma an kotorok taya zokum, an makrokum tay mbrayen, an wəɗum nokum pak say aka zukumi kaaka'ə, kədawɓay gənən ki zukum ɓa, kədawwaŋ tepelke vi kawzla ki goŋga ɓa.

¹⁵Maɗula nawsən zəga zemvin aska, dəde sə disiŋ ɓa, nan səka dəlva fuŋ ade, səza wənna gəɓa zə ɗəf ade, nan səza Satan ade.

¹⁶Vi atəki məs kotorok də wəgay asani adaki bo wəsler tay ɓa də mambray pak asani.

¹⁷Amma maɗula an nawsən zəga məs dəde sə disiŋ, nan salalayi. Nan tay ki zamə də ɓatɓatə, dəbayna, awɗeket ɗii ɓa, awa tepelke aket ɗii ɓa.

¹⁸Ɗii məs mekret zayə, tahəŋ wəsleretin ɗiiyi, wətər wəray neti, ndəni wəza mogon amara Maŋgəlva.