Read Gidar Zak 4 Bible Online

Zak 4 - Gidar bible

Zak 4

¹Səŋgay wəzlba də wəgay ade awalaŋkum di? Səza wəsim zəga nokum məs dədawgay amakrokum məza aw ɓəta ɓa ade.

²Mokum tayaka wərah zəga, amma kawrəhaŋ ɓa, vini kan kədawzaɓanən zukum kawbay ɗiiyi, munokum tatəɗɗa kotoroku. Munokum tatə kayaŋ zəga, amma kərəhaŋ ɓa. Vini kan kədawgayaŋ, kədazlbaŋ vi kərəhaŋ an məs kəŋglaŋ ɓa, vi kəssohonən ava Maŋgəlva ɓa.

³Ko an munokum tatə kamanən Maŋgəlva, dəpsukum gəni, kərəhaŋ na ɓa, vi wəkam nokum də wəɗum mbrayenni, munokum tatə sohoŋ vi keneken gəɓa zukum dəndən.

⁴Munokum məɓoŋkum aka Maŋgəlva, kəsənən na an kəɗɗaŋgək bayna na duniya na məzuzeleŋ na Maŋgəlva kənanaŋ ɓa sa? Ɗəf məs dəŋgəl wəsban wənna duniya na wakpaŋ məzuzel na Maŋgəlva.

⁵Kədaɗumoŋ na an məs ɗerewel na Maŋgəlva anah na ɗar mekeleŋgi ɓa, amna: Maŋgəlva tay də kotoroku vi əmpəs məs aɗi amakram dəsan gən dəndən.

⁶Amma sembe məs Maŋgəlva apsukuməŋka ndən dayki zəga pak də metiŋgini. Vi ɗerewel na Maŋgəlva anahək na: Maŋgəlva atokuk ki haran sit ɗii məzə gakdakanən ziti, amma tayəpsit sembe sit ɗii məzu ɓegənən ziti.

⁷Məɓegən ki zukum aba Maŋgəlva, məsok zukum Satan wanzan sukum.

⁸Məzar aza Maŋgəlva nan bo wazar azokum. Məɗa vokum səza mambraya, məskoɓ mokrokum munokum muluvuluvuɗe.

⁹Məssahan zukum məskə morkoyo, məhəmə vi mambray nokum, wəmas nokum dəkpaŋ wəhəma, kəda nekenən zukum ɓa məssahan zukum.

¹⁰Məɓegən kizukum aba Ɗəfdaya, asna ndən sən kiyən wasil gukum.

¹¹Milmiŋgiɗwa, kədawndanən gebbet ɗii meɓɓet ɓa, ko naway dədawpel mbrayen aka məlməni, walla andak gabbani, apelik mbrayen aka ma henziŋ na Maŋgəlva, kita ataw aka ma henziŋ na Maŋgəlva. An kətawək kita aka ma henziŋ, asna ɗəf məzəsban kənan ɓa, amma nok mətaw kita akan kənani.

¹²Maŋgəlvayi katər gən dəpsəm ma henziŋ ndəni dədawtaw kita akan katər gəni, ndəni katər gən dədawɓap wəkoh git ɗiiyi, ndəni dədaw zeti. Ya nok is nawa kan kədawnda gabba məlmukəŋ di?

¹³Munokum, məpprəm an məs nədaŋgəla wənahəŋ ɗa, munokum məzu nahaŋ na: Dəpaŋka walla pumpum waməmbat awalaŋ gəla, atəki vana məzəv gən taka adaka, məgəɗ gən terere, məzəm gən riba diiɗa.

¹⁴Kəsənən an məs dədaɗɗa pumpum ɓa. Munokum tat va enene məs dədawgulyoŋ an anziyaŋgək suɗike bo go'ləŋ atrayaŋka.

¹⁵Aslək kənahaŋ gən na: An Ɗəfdaya aŋgerke appamək madaramə, waməgəɗ vana də zəga vana.

¹⁶Amma munokum dal wə gakdakan zukum də wəɗi kizukum də wəpel nokum. Zev wəɗi kizukum an vas tay lew ɓa. Aŋki məs wənnaŋ pak akkal adəvən.

¹⁷An ɗəf asənək wəɗɗa mogoni, amma dəŋger wəɗɗan ɓa, asna mambray agəɗɗə.