Read Gidar Zak 5 Bible Online

Zak 5 - Gidar bible

Zak 5

¹Məpak sləmokum amba wəpeləŋka, munokum məs aryeɗi. Məhəmə məngəsl vamvəlla vi wəzəm saha məs dədazan diiɗa akokum.

²Arya nokum arayka, ɗəmnya azəmək lukutɗe nokum.

³Təbəs net dələɗ nokum azəlahka, wəzəlah nan wasan va saydawa akokum wazlukum va offo adawzla təkiya, vi kəkalanənək arya nokum ha gap pay nagraka.

⁴Kəfaɗ sitin deleɗ sit məɗɗaŋ wəza agulyo nokumda ɓa. Məpprəm va adawhəmaŋ də munokum, vamvəl net məzu bəlaŋ nokum agapək aslma Maŋgəlva Ɗəfdaya məs də sembe aka ko mi pakə.

⁵Wəsuwa nokum a duniya adəv aryayi də wəɗɗa an naneken zukum. Kəkər gənənək zukum va wəsgəl hãwa ha gap pay nawtaw wəlani.

⁶Kətawənək kita aket ɗii məs tahəŋ də mambray ɓa, kəbeyinke. Net bo dəɓoŋgoŋ ɓa.

⁷Milmiŋgiɗwa, məɓəsa ha gap pay Ɗəfdaya Zezu Krestu adazani. Məsoŋ va məzənse adawɓəsən wəga buwən na mənziya də buwən na mawala, vi zəga nan dəsəɓ gən mogoni.

⁸Nokum bo, say məɓəs vaska, kədawyaŋ də wənnan ɓa, vi pay naziya na Ɗəfdaya go'oy.

⁹Milmiŋgiɗwa, kədaɗɗaŋ wərwər aket ɗii meɓɓet ɓa, vi Maŋgəlva bo adawtaw kita akokum ɓa. Mətaw kita tay ziwe, amadamba manaka toŋgo.

¹⁰Milmiŋgiɗwa, məɗumon wənnet məs kleŋɗe məs dəpeleŋ də iya na Ɗəfdaya va azəmaŋ saha, də as pak aɓəsənka, say məɓəs səm wənna zəm saha nan tam veneti.

¹¹Mənam tatə ɗiyit ka ɗii məs dərəhaŋ zəzaya, vi dəpanən wəɓəs net ɓa. Kəpprəmənək wənna Ayuba bo va aɓəsa. Kəsənənək bo Ɗəfdaya atər sən wəray nan dərɓaga wəzəm saha nani. Vi Ɗəfdaya aknahək də ula saha aket ɗii də wəgəɗ sit mogoni.

¹²Milmiŋgiɗwa, an məs nədawnah sukuməŋ na wən metiŋgini, an munokum tatə peleŋ wənna, kədasuwayaŋ ɓa, kədasuwayaŋ də disiŋ ɓa, ko də dəlva fuŋ kədasuwawaŋ ɓa, walla ko də zəga maɓɓani kədasuwayaŋ ɓa. Say wənah na: Ha'aw walla awwo məkki kədawday gənən ki as ɓa, vi Maŋgəlva adawtaw kita akokum ɓa.

¹³Ɗəf tay dədawzəm saha awalaŋkum sa? Dəkaman Maŋgəlva. Ɗəf tay awalaŋkum dəzən nek sa? Say dəyə gəlya na gakdakan Maŋgəlva.

¹⁴Məs gbəgba' taya waloŋkum sa? Dəye ɗii gugiriɗ nadəv gəla na Maŋgəlva dəzoŋ gən wəpay sən mel də iya na Ɗəfdaya, də kamanən gən Maŋgəlva vini.

¹⁵An wəkaməŋ asapək də wətafa, wambəl gən məs gbəgba'a, Ɗəfdaya wapsən sembe waviyan sən mambray nan an agəɗəŋka.

¹⁶Vi vaski mərban mambray nokum awalaŋ zukum aba Maŋgəlva, viyit ɗii nokum, vi kəmbəlaŋ gəni, wəkam na ɗəf təstəs tay də sembe naɗɗa zəga metiŋgini.

¹⁷Məɗumon wənna Eliyas, ɗəffan laŋka, ɗəffi va mənamə, akamanək Maŋgəlva zən sok sok də makran taka, vi buwən adaw zi ɓa, agəɗək wəsva hoku də mani, buwən də zi ɓa.

¹⁸Yaŋ akaman Maŋgəlva əmpa ka buwən də zi gəni, Maŋgəlva aziyək buna zəga pak agilke.

¹⁹Milmiŋgiɗwa, an ɗəf amzlahək ki tive na Maŋgəlva, an ɗəf amil gənək aka tive,

²⁰say dəsəŋ gən wənnəŋka. Ko naway də mil gən ɗəf mambray səka tive na mambray nani, akoh gənək ɗəffəs səma əmta, ko mambray nan dəsan diiɗa zlaŋ, Maŋgəlva waviyan səni.