Read Gidar 1 Piyer 1 Bible Online

1 Piyer 1 - Gidar bible

1 Piyer 1

¹Letərəŋka, Piyer məs dəsan masləŋ na Zezu Krestu desləna, azet ɗii məs Maŋgəlva aweli, məs dətrayaŋ aket dəlvəŋge, a Pontus, a Galatiya, də Kappadokiya gəm Asiya də Bitiniya.

²Kəkpaŋgaŋgək muwelkum vi wənna əŋgla na Maŋgəlva Affən. Əmpəs nan aɗukumko kəsoŋ gən məzəsbanən Zezu Krestu, vi mbel nan dəskoɓ kumən gəni. Mbəlembəle də zam dənzlər sukum.

³Məgəɗ sən soko sən Maŋgəlva, Affən Ɗəfdaya nam Zezu Krestu. Aɗɗak mogon nan azəmə, apsəmək zeŋgille meleketeni, vi asil gən Zezu Krestu sətəki əmta asan madarani. Aknahək makram də zəga nawga an də goŋga.

⁴Məneken səm zəm vi zəga naw zəm gəla, an məs Maŋgəlva aɗi sit ɗii nani, zəga nan aŋgənna ɓa, haramba arma azan ɓa, awrayɓa, wasan ha faɗə. Maŋgəlva azaɓan a disiŋ na vikum.

⁵Sembe na Maŋgəlva dəga wətaf nokum ha gap wə koh adazani, məs məzaɓan naw gil gən pay dələv adagraka.

⁶Məneken zukum dəndən pay pakə, ko an bonoy arəh kumoko, vaski aslək na kəsoŋ gən zukum sah gap pay suɗike də bonoy temtemi.

⁷Wəzəm saha nan ade na vi kawsla wətaf nokum, gesiŋgi sa. Vaski bo va təbəs na meleŋge məs asna ha faɗ dərəŋ ɓa məslani də offo, vaski bo wətaf nokum tay də sləman dayki təbəssa, məsla wətaf nokum na vi kawla kəkərtəh nani. Vi kərəhaŋ gən wəɗi sukum kikum də gakdaka də sləmokum pay Zezu Krestu adazani.

⁸Kəŋgluwənka ko kulanən ɓa, kətafənka ko kulanən kakaŋ ɓa. Vini kəda nekenən zukum də wənnek diiɗa, məs kawɓapi əpel wənnan ɓa.

⁹Ya wəkərəhən zəga məs kətafaŋ vini, ndəni wəkoh na zeŋgillekum.

¹⁰Məs kleŋɗe aɗɗaŋgək kleŋ aka zəzay məs Maŋgəlva adapsukum, Əmpəs na Maŋgəlva asanək dənɗaŋ arban sitik na Krestu wazəm saha, dərɓagan na warah gakdaka. Məs kleŋɗe nek akayanənək wənnani, akosonənək də maɗuleti vi dərəhən gəni, dewɗe adaɗɗa di, mbarmbari adaw san di.

¹²Maŋgəlva arban sitik məs kleŋɗe na, wənəs məs das kəs na, net sən kiyit awlanən na ɓa, amma wənan vikumi. Yaŋ Wən Nenek nak agapək azokum kakaŋka na. Masləŋɗe məzu pel sukumən wənnəŋka anah sukumənək wənnani. Apel sukumənək də sembe na Əmpəs Salala məs dəde sə disiŋ. Ko maslayɗe bo met tayaka wəsən wənnəŋka.

¹³Vi vaski məzaɓan wəɗum nokum naɗɗa wəza sən Maŋgəlva, məzi zukum, məɗi wəɗum nokum pak aka zəzay məs dədazan sukum pay Zezu Krestu adazani.

¹⁴Məpprəm səm ma Maŋgəlva kədasbanən wəsim zəga nokum məs kədaw simeŋ lahəŋ daga kəɓəllə sənən goŋga ɓaŋ ɓa.

¹⁵Amma va Maŋgəlva məs dəyukum asan salala, nokum bo məsoŋ salala də wədaw nokum pakə.

¹⁶Vi Maŋgəlva annahək na: Məkpaŋgan zukum salala, vi naw bo salala nani.

¹⁷An munokum tatə zuliyaŋ sən Maŋgəlva, munokum tatə yanən na əbba. An tay taw kita aket ɗiiyi awɗeket na ɓa, ko naway pak va aza wəza nan məs agəɗə. Vi vaski, adəv pay nanziya nokum aka dəlvəŋka, məpprəm mani.

¹⁸Kəsənənka, dəzəga na sləma məmokum, vi kədasoŋ məza də wəɗum naga zəga ɓa va net dəhiŋgiɗkum ɓa. Zəga məs məmokuməŋka, amndan na dirɓe ɓa, va təbəs net deleɗ adamndan dirɓe ɓa may va təbəs na meleŋge ɓa.

¹⁹Amma kərəhənək kikum də mbel na Krestu sən kiyən məs azi də tattuwãha, məs dəsan va time botol məza mbrayen azan ɓa, məza haramba azan ɓa.

²⁰Maŋgəlva awelik Krestu dabəŋ ki əzəməɗ dələv pakə, amma yaŋ kan pay dədirɓe pakə, arban wənnan vikum.

²¹Vi zəzay nani kərəhən ətaf Maŋgəlva, Maŋgəlva məs dəsil gən sətəki əmta, apsənək gakdaka, vi wətaf nokum də wəɗum nokum dəsan gən aza Maŋgəlva.

²²Kəkpaŋganənək mokrokum salala də wəsban goŋga, də wiŋgliw milmiŋgiɗkum məs dətafaŋ, vini məŋglu zukum də mokrokum taka məza də mataka taka ɓa pay pakə.

²³Nokum kuwaŋgək meleketekum də əpel na Maŋgəlva madaran məza agrak ɓa, nokum kuwaŋgək də Affukum məza amta ɓa.

²⁴Va ɗerewel annah na: Ɗii pak tahəŋ va gaslembeɗi, gakdak net bo tay va uffiyo net gaslembeɗi, gaslembeɗ bo waɓətaŋ, uffiyo net bo wayo'oŋ.

²⁵Amma əpel na Ɗəfdaya wasan ha faɗə. Wəpel nan ndəni labara nenek məs məpel sukum.