Read Gidar 1 Piyer 2 Bible Online

1 Piyer 2 - Gidar bible

1 Piyer 2

¹Vi vaski məppan mambray sə makrokum pakə, məppan uwa tepelke, də prufprufu, kədaɗɗaŋ kotorok ɓa, kədaraŋ ɗəf ɓa.

²Məsoŋ va kirin muwet kakaŋka, adaŋglaŋ momvo, məŋglu əpel na Maŋgəlva an də goŋga, vi kəɓayaŋ gən dəndən kəkohoŋ gən dəndəni, kənanənək nenek na Ɗəfdaya.

³Va ɗerewel məsvan annahə:

⁴Məde zani, ndəni gərəm məs də zeŋgille, məs ɗii asgaŋ, amma Maŋgəlva awelike vi zəga na sləmayi diiɗa.

⁵Məde, məkpaŋ gərəm madarokum, karka gəla nasuwa na Əmpəs Salala də munokum. Məppan Zezu Krestu amakrokum dəpsukum gən sembe nakpaŋ məs dəlvəŋge en salala, napsən zəga an dəslə sən Maŋgəlva.

⁶Vaski bo va məverin adəv ɗerewel na Maŋgəlva. Məpprəma: Nəwelik gərəm na sləma, nəɗiyək ka gərəm məs təkzləmən mogon də gakdaka a Siyon. Ko naway dətafa wil adanən na ɓa.

⁷Vi vaski, azokum munokum məs kətafaŋ na gərəm na sləmay sawɓa, amma azet ɗii məs dətafaŋ ɓana: Gərməŋka mərkaŋ gəla asganənka, yaŋ akpaŋ gərəm na sləma.

⁸Wənnan məverini adəv ɗerewel na Maŋgəlva: Gərməŋka waŋgbay git ɗiiyi, milɓeŋka wasbir git ɗiiyi. Adaŋgbayaŋ na vi dətafən əpel na Maŋgəlva ɓa, agəɗək va an Maŋgəlva aŋgəl azeti.

⁹Amma nokum munokumtə əlfa an muwelin, munokumtə məs dəlvəŋge na məlĩya, ɗii yen salala, na Maŋgəlva kənanaŋ. Agil gukumək səra guzliyo, akukumək ara təki babar nan nagət akani. Awel kumuko ka kəpelin gən wənna wəza nan məs mogonəŋka.

¹⁰Lahəŋka, ɗii na Maŋgəlva kənanaŋ ɓa, amma kakaŋka ɗii nan kənanaŋ: Lahəŋka, kəsənən ula saha na Maŋgəlva ɓa, amma kakaŋkana kərəhənək ula saha nani.

¹¹Bayneŋgiɗu na makrawa, melekeɗ kənanaŋ aka dəlvəŋka. Vi ni nəda komokum kədapaŋ tive sən əsim zəga na gəɓa zə ɗəf ɓa, vi tay kay tive pay pak kaw zan zeŋgillekum.

¹²Wədaw nokum dəsan mogon aweleŋgit ɗii məs dəsənən Maŋgəlva ɓeŋki, an aɗikumənək va məɗɗaŋ mambraya, an tahəŋ ulanən wəza mogon nokum, wagakdakanən Maŋgəlva pay adazani.

¹³Məɓe sit ɗii gugiriɗ na dəlva, vi wənna Ɗəfdaya, ko məlĩ metiŋ vi gakdak nan adayək kiyit ɗii meɓɓeti.

¹⁴Ko ɗii gugiriɗ na dəlva masləŋɗe nanəŋ vi kasge sit məɗɗaŋ mambray də wəgakdeket məɗɗaŋ mogoni.

¹⁵Vi aŋki wəŋgla na Maŋgəlva, kəkpaŋgetin gin ɗii məs dəsənaŋ zəga ɓa dit dirweŋge, də mogon məs kədaɗɗaŋ.

¹⁶Kərəhaŋgək əsso məza balemɗe ɓa də Zezu Krestu, kədaɗɗaŋ mambray də wənah na nam balemɗe mənan ɓaɓa, amma va məɗɗaŋ wəza na Maŋgəlva.

¹⁷Məgakdeket ɗii pakə, məŋliw milmiŋgiɗkum kretiyenɗe, məgeslne sən Maŋgəlva, məgakdakan məlĩya.

¹⁸Məɗɗaŋ wəza, məpprəm met dayeɗe nokum də wəgeslne siti, say sit ɗii mogetti kaaka ɓa, amma dit ɗiiyen mbreyit pakə.

¹⁹Mogoni, an kəɓəsənək bonoy məs dədazan akokum pakə, vi wənna Maŋgəlva.

²⁰Madaw tər sukum an kəɓəsənək əraga aka mambray nokum di? Amma an kəɓəsənək də wəzəm saha nani vi wəɗɗa mogoni, asna Maŋgəlva wagəɗ sukum zəzaya.

²¹Sən aski Maŋgəlva ayukum, vaski bo Krestu sən kiyən azəm saha vikum, appan sukumək tive kəsbanən gən an məs agəɗə.

²²Dəgəɗ ɗaah mambray ɓa. Duwə ɗaah tepelke ɓa.

²³Yaŋ aranənni, dəzlan sit də wəret ɓa, amma appanək kiyən ava Maŋgəlva məs mətaw kita də təstəssə.

²⁴Krestu sən kiyən aslanək mambray namə adəv gəɓa zəni, aka wəlaŋga məzliwrihe vi məsam gən madaram klaza wən təstəssə, asna məsam gən məmtəm klaza mambraya. Vi gəla huwa nani kərəhaŋ əmbəla.

²⁵Lahəŋka munokum tat va timeŋgiɗ məzeti, amma kakaŋ na kəzoŋguk aza məzutaɗa məzuga zeŋgillekum.