Read Gidar 1 Piyer 3 Bible Online

1 Piyer 3 - Gidar bible

1 Piyer 3

¹Gili məpprəm met zel nokum, an ɗii meɓɓet suweleŋgit dətafən wənna Maŋgəlva ɓa, asna watafaŋ məza wəpel sit wənnan ɓa, vi wədaw nokum.

²Asna wawlanən wədaw nokum mogoni va kədaw zuliyaŋ sənən Maŋgəlva də goŋga.

³Kədaw kayaŋ wəzaɓan zukum mogon klapaka ɓa, də wətroɗ kikum dit zigeɗ naza sləmokum, zigeɗ na meleŋge dit lukutɗe na sləma, məs məbay sit gawla məs deleɗ net tuwãh ɓa,

⁴amma say mogon nokum dəsan amakrokum, də maɗulokum mogoni, məs agrak ɓa nan zəga na sləmay aba Maŋgəlva.

⁵Vaski bo daga far lahəŋka gil en salala akpaŋganənək zit mogoni, aɗiyənək an məs adaw gaŋ pak aka Maŋgəlva, apprəmənək met zilŋgiti.

⁶Məɗumon wənat Saratu, təpprəmək ma zilit Abraham, yaŋ təya na Ɗəfdaya nawa. Nokum bo kirtət Saratu kənanaŋ kakaŋka, an munokum tatəɗɗaŋ mogoni, məza əgeslne sən zəga maɓɓan ɓa.

⁷Nokum munokum zel bo, məsoŋ dit gil nokum də wəsinit na tahəŋ də sembe va nokum ɓa, məgekdeketi, vi net bo Maŋgəlva wapsit əkoho, va apsukum, Məgəɗ vaska vi wəzuli nokum adattap ɓa.

⁸Aŋki wəgrak na wən məs nədaw ver sukum: Məsoŋ də maɗula taka, wəɗum taka, məwəl saha aka zukum də wəŋglu zukum va məlma, məbaah sən zukum, kədarbanən daya sit milmiŋgiɗkum ɓa.

⁹Kədamnda ganən mambray də mambray ɓa, walla ɗəf arokuko is bo gəm wəran ɓa, amma məgəɗ sit zəzaya, vi Maŋgəlva aynanək wənnapsukum zəzaya, pay an ayukum.

¹⁰Va ɗerewel məsvan annah na: An ko naway aŋgələk əsuwa mogoni, ko naway aŋgələk zən dəsan gən nek pay nanziya nan egge, dəppan gən əpel mbrayen, dəppan gən uwa tepelke.

¹¹Say dəppan gən mbrayen dəgəɗ mogoni, dəkayan gən zam də gurom nan pakə.

¹²Vi hara Ɗəfdaya tay sekke aket ɗii məs salala. Sləman tay pakka vi kapprəm wəkam neti. Amma gədəvən mədani aket məɗɗaŋ mambraya.

¹³Naway naw gəɗ sukum mambray an munokum tatəɗɗaŋ mogon di?

¹⁴Amma an məzəm gukumi saha vi kədaɗɗaŋ mogoni, makrokum wasan zayə. Geslne adawdukum sit ɗii ɓa, maɗulokum adazlaɓ ɓa.

¹⁵Amma Məgakdakan Krestu amakrokum, dəsan gən Ɗəfdaya nokum. Məzaɓan zukum ko dewɗe pak naw zlan sit ɗii məs dəda sohokumən aka zəga məs kədaw gaŋ.

¹⁶Amma məzlan sit ɗii məzə sohokumən də wəɓe gən ziti də gakdakani, wəɗum na makrokum dəsan mogoni, vi an arokumənka, an apeleŋgək mbrayen aka wədaw nokum mogonəŋka, məs dəsap də Krestu wil wedenini.

¹⁷An əŋgla na Maŋgəlvayi na, ɗəɗaah wəzəm saha vi wəza mogoni, ki wəzəm saha vi wəza mambraya.

¹⁸Vaski bo Krestu sən kiyən amtək tel taka vi mambray net ɗii pakə, wətər wəray nan agrak na ɓa ha faɗə, tay də mambray ɓa, amma amtək viyit ɗii mambrayɗe, vi kakukum aza Maŋgəlva. Ɗii abayənka, amma əmpəs Salala asil gənək də zeŋgilleni.

¹⁹Də sembe na əmpəs nani ambat əpel Wən Nenek sit əmpəsɗe na daŋgay.

²⁰Va wənah na: Sit əmpəsɗe net ɗii məs dəsbanən Maŋgəlva lahəŋ ɓa, va Maŋgəlva aɓəs lahəŋka aga Nuwa pay adawzaɓ bəlay. Adəvən bo ɗii dədopoɗo kaaka də kohoŋ səret iŋkile.

²¹Vasna iŋkileŋki, ana baptem adarbanəni. Məs dədaw koh gukum kakaŋka, də wəskoɓ haramba na gəɓa zə ɗəffi ɓa, amma adəvəni mədaw sler də Maŋgəlva, də viyan səmə gən mambray sə makramə, baptem wakoh gukum də wəsil gən Zezu Krestu sətəki əmta.

²²Nan ateŋgik a disiŋ tayaka va dəzəŋ na Maŋgəlva, tay zəm məlĩ aket maslayɗe də aket gakdekɗe, dit sembeɗ na disiŋ.