Read Gidar 1 Piyer 5 Bible Online

1 Piyer 5 - Gidar bible

1 Piyer 5

¹Kakaŋ na, intatə səɓ sit ɗii gugiriɗ net kretiyenɗe suwaloŋkum, naw bo ɗəf daya nani. Məgəɗ saydawa na wəzəm saha na Krestu nani, wanərəh haran naw aza gakdak məs Maŋgəlva adarban səmə.

²Mətaɗ ngaɓa na Maŋgəlva məs apəl sukum, məteɗ də əŋgla va an Maŋgəlva aŋgələ, məza də dewle ɓa. Məɗɗa məza wəɗum narəh deleɗ ɗar ɓa, amma vi kəŋgluwənək vaska.

³Kədaw zəmaŋ məlĩ aket ɗii na Maŋgəlva ɓa, məs apsukəməŋ amma va məzərbaŋ sit zəga dəsbokumən gəni.

⁴An məzutaɗa an daya adek na, wakərəhaŋ mətər kiya an də gakdaka, an məza awray ɓa.

⁵Nokum tamə gewleɗi, məpprəm met ɗii gugiriɗ nokum. Məgəɗ wəza sən zukum, də əɓe sən zukum. Va məverin adəv ɗerewel anahə: Maŋgəlva tay bay gagay sit məzu gakdakanən ziti, amma wapsit mbəlembəle sit ɗii məzə ɓegənən ziti.

⁶Məvoŋ gən zukum ava Maŋgəlva məs də sembe, vi dəsil gukum gən pay məs aŋgələ.

⁷Məpsən wəɗum nokum pakə, vi tay gukum.

⁸Məzi zukum, məga, vi məzuzel nokum Satan, tay va ɓolu adawhay daw kay zəga naw zəm nani.

⁹Məsoŋ ɓəlɓəl də wətaf nokum, məɓoŋ akani, vi kəsənənka ɗii na Maŋgəlva va munokum tahəŋ wəzəmaŋ saha aka dələv pakə.

¹⁰Amma dərɓaga saha məs kədaw zəmaŋ suɗike, Maŋgəlva Affən mbəlembəle pakə, məs dəyukum aka gakdak nan məza agrak ɓa ka kəsapaŋ gən də Zezu Krestu, wasugukum ɓəlɓəl va aka milɓe. Ndən sən kiyən waɓəlokum, wapsukum sembe.

¹¹Sembe pak nani ha faɗ dudan. Amin.

¹²Nəver sukum wənnəs suɗike də əbaah na Silas, ndəni məlmu an nəsən fəkatə vikum. Mawaka əsɓokum, də əɗɗa sukum, saydawa aka wənnəska, ndəni mbəlembəle an gesiŋ gesiŋ. Məsok zukum də sembe adəvən.

¹³Kretiyenɗe na Babilon məs Maŋgəlva awel va munokum, asɗokumənka, də wətu Markus pakə

¹⁴Məsɗan zukum də wəsɗa ana wəŋgla na məlma. Zam nan dəsan də munokum ɗii na Krestu.