Read Gidar 2 Piyer 2 Bible Online

2 Piyer 2 - Gidar bible

2 Piyer 2

¹Va məs kleŋɗe muwaŋ tepelke azoŋ aweleŋgit ɗii lahəŋka, vaski bo mərbaŋ wənna tepelke adazoŋ awaloŋkum. Wakiyaŋ zəga narba na tepelke məs nawkan atəki nawza, wazelenən Ɗəfdaya an məs dəkoh giti, vi vaski wəzza warihe.

²Də as pak ɗii diiɗa wasbanən tive nawza neti, vi wənna wəza netiŋ vaskəŋka, ɗii wanəhaŋ wən aza tive an də goŋga.

³Mərbaŋ zəga na tepelkeŋki, tahəŋ wəsimeŋ deleɗi vi kawə sukum wənna də labara ɗarə, vi kawzəm riba səzokum, daga farə, mətaw kita aket azaɓanək zəni.

⁴Ko ɗəf nawzeti awleŋ ɓa, maslayɗe məɗɗaŋ mambray bo, Maŋgəlva asgetik adəv təki na offo məza amta ɓa, aynetik adak dit ngiyamɗe ha gap pay nawga kita.

⁵Dəppəl zigeɗ məs agəɗ far ko taka ɓa, azanək dəlva fuŋ mbrayen dit iŋkile metiŋgiti, amma akoh gənək Nuwa, məzu pel wən təstəssə, dit ɗii nan buhulu.

⁶Maŋgəlva atawək kita aka walaŋ gəla metiŋ na Sodoma də Gomorra azlak dit ɗii net pakə, də offo, vi məɗɗaŋ mambray pak dulanən gən an dədazan azeti.

⁷Akoh gənək Ludu, ɗəf mogoni. Pay na Ludu, ɗii məs mambrayɗe azəm gənənək saha də əsuwa net mbrayni.

⁸Ludu ɗəf mogonəŋka, asanək aweleŋti, apprəmək wənna mambray neti, awlak də harani, makran asanək aka wənnan sawɓa.

⁹Ɗəfdaya asənək va adaw koh git ɗii məzu dawaŋ amban səka wəzəm saha neti, asənək bo va adawge məɗɗaŋ mambraya, vi kawtaw kita aket pay na kita.

¹⁰An dəday pak na, ɗiiyen məɗumoŋ aka wəsim zəga na gəɓa ziti mbrayen, dit məzu zelenən gakdak na Maŋgəlva. Ɗii mərbaŋ zəga na tepelkeŋki, aw geslne'eŋ ɓa, tahəŋ əgakdakanən ziti, tahəŋ əzeletin ɗii məs də gakdak sə disiŋ tahəŋ əretini.

¹¹Amma ko maslayɗe məs dədayaŋ də sembe də gakdaka, awkanən kita walla wəret ɗii məs də gakdak sə disiŋ aba Ɗəfdaya ɓa.

¹²Amma ɗiiyeŋki tahəŋ va sluɗe nawra məza tahəŋ də wəsən ɓa, məzuwaŋ vi karmet kawbeti, tahəŋ wəranən an məs dəsənən ɓa, vaski adawzaŋ vanet sluɗe nawraski.

¹³Wazəmaŋ saha va azəm gitin saha net ɗii meɓɓet dəndəni. Tahəŋ ənekenən zit də wəknahan wəsim zəga na gəɓa zit mbrayen ama heret ɗii yi, tahəŋ əzəmaŋ də munokum, tahəŋ ənekenən zit də wəɗɗa vurum neti. Mi di! Zəga na wili sawɓa.

¹⁴Ula net pak say azet gil bərviyeɗi, awyaŋ daɗɗa mambray ɓa. Azaɗənək mazaɗ abet ɗiiyen tahəŋ də sembe ɓa. Azaɓanənək makret pak aka wəsim nawrəh deleɗi. Net Maŋgəlva araygitike.

¹⁵Yaŋ apanən tive mogoni, azaŋka, asbanənək tive na Balama wətən Be'or məs dəŋglu deleɗ məs adaw rəh də wəɗɗa mambraya,

¹⁶amma arahək əhay vi wəza nani. Vi koro zəga məza awpel ɓa, yaŋ apel sən va ɗəffa, atakək wəza na məs kleŋ dərwaŋka.

¹⁷Net tahəŋ va haret iŋkile məs dəklaŋ, tahəŋ va buwən miman məs səmnya adawka, guzli titir tay geti atəki Maŋgəlva aɗisiti.

¹⁸Tahəŋ wəpeleŋ wənnaɗi kizit ɗarə. Tahəŋ wəɗɗaŋ wəza də wəsim zəga na gəɓa zit də mambraya, vi karme ɗii məs dəgilyoŋ səzet ɗii məɗɗaŋ mambraya.

¹⁹Tahəŋ wəpanən tive sit ɗii dəsoŋ gən məza balemɗe ɓa, yaŋ ndəɗaŋ sən kiyiti balemɗe na zəga nawzaŋ. Vi zəga məs dədayki ɗəf pak balam nani.

²⁰An ɗii akohoŋguk səza mambray naka dəlva, vi asənən Ɗəfdaya nam məzu koh gəmə, ndəni Zezu Krestu, yaŋ dərɓaga askəmpa atoŋgoŋguk adəv mambray nak əmpa, wəgrak net wasan mbrayen dayki an lahəŋka.

²¹Ɗəɗaah va dəsənən tive an təstəs ɓa, ki asənənka, ya dəsbanən ɓa, apanənək ma henziŋ nan məs apsiti.

²²Gesiŋgi wən məkpaŋga nadəv ɗerewel lahəŋ arihike: Kəra aparka amilik əzəm əpar nani, vedem aslayka amndanək ara ndərɓa.