Read Gidar 2 Piyer 3 Bible Online

2 Piyer 3 - Gidar bible

2 Piyer 3

¹Bayneŋgiɗwa, aŋki ɗerewel an nəver sukum ma sula'ən, adivit ɗerewelɗe net sula git pak na, nəŋgəl kaɗumon sukum, kaw sil gən maɗulokum mogoni, ɗe əɗumon sukum aka zəga məs kəyaganəni.

²Nəŋgəl na kəɗumonən gən wən an məs kleŋɗe salala apeleŋ lahəŋka, də dawka na Ɗəfdaya məzu koh gəmə, də əpel məs ɗii məsliŋgit azokum aki sukuməni.

³Kəsənən gən tagay na, pay wəgrak dəlva, ɗii meɓɓet wazoŋ məzə soŋ adəv əŋgla na gəɓa ziti: Wamasaŋ akokum.

⁴Wanahaŋ na: Minani wənnan wade, vaski ɓasa? Ya ngay kan di? Daga səzet migilmə ha kakaŋka amtaŋgək səkay, amma zəga pak dəkpaŋ ɓa, vaŋki daga məɗɗa dəlva fuŋ!

⁵Asgətaŋgək ki disiŋ də dəlva fuŋ daga far fari, dəlva fuŋ səret iŋkile agili, aziwik aket iŋkile də əpel na Maŋgəlva.

⁶Vaski dəlva fuŋ məsvan azanək dit iŋkile məs adawyaŋ na iŋkile dənzləŋgaŋ.

⁷Amma disiŋ də dəlva fuŋ an kakaŋkiŋki, də wəpel na Maŋgəlva vani asuwaŋ tagay vi kagrekit də offo. Məzeɓeti ha pay nawtaw kita aket ɗii mbreyit də wəzeti.

⁸Amma bayneŋgiɗwa, kədasgətaŋ ki wən takas ɓa, vi Ɗəfdaya awɗakan pay taka də wəsva dubu ɓa. Azana zəga takayi pakə.

⁹Ɗii meɓɓet tahəŋ əɗumoŋ na Ɗəfdaya tay liya daɗɗa an məs annahə, amma vaski ɓa, awli gən ɓa. Amma tay ɓəs sukum vi dəŋgəl ko naway dəzə gən ɓa, say ɗii pak dəzoŋ gən də tubiyaŋ gəni, dəppanən gən mambray neti.

¹⁰Də as pak na, pay wəziya na Ɗəfdaya tay va məhal adazani. Dəpasna disiŋ watray də gugoyo metiŋgini, ngərzleɗ na disiŋ pak wazlaŋ pak də offo dəlva fuŋ bo zigeɗ nadəvən pak wazaŋ.

¹¹Adan zigeɗ pak wazaŋ vaska, kəsənənək va kədasoŋ. Say məsoŋ adəv salala, məsban Maŋgəlva də goŋga.

¹²Dawga pay nani, məgəɗ wəza pay nan dəgap gən gu'u, va wənah na pay məs disiŋ adawzla də wəzza, ngirzleɗ bo wewereŋ sənən offo.

¹³Amma Maŋgəlva amna wapsəm disiŋ meleketen də dəlva fuŋ meleketeni, adak na mambray tay ɓa, vi əŋgla na Maŋgəlva tayadaka, anani mədawga.

¹⁴Vi vaski bayneŋgiɗwa, dawga pay naməŋka məsok zukum kəsoŋ gən salala, məza də mambray azokum ɓa aba Maŋgəlva, məsoŋ zay dəndəni.

¹⁵Məsən na əɓəs na Ɗəfdaya akol sukumək ma tive ka kəkohoŋ gəni, va məlməm namakram Pol aver sukum də maɗulan məs Maŋgəlva apsəni.

¹⁶An məs aver adivit letərɗe nan pak atəki məs adaw pel aka wənəŋka, atəki maɓɓan temtem tuwãhi wəpprəma, ndəni kan ɗii məs dəsənaŋ zəga ɓa, məs tahəŋ də wəɓəs zit naw sənən ɓa, yaŋ ada kpaŋganən wənnani adawray gitini, va adaɗɗaŋ dit ɗerewelɗe məverit meɓɓeti. Də əɗɗan vaski adaw kiyən kita aketi kawzan ziti.

¹⁷Amma munokum bayneŋgiɗwa, kəsənənək wənnan dabəŋ. Məzi zukum, vi ɗii məs aɓe'eŋ sənən Maŋgəlva ɓeŋ adawtoŋ gukumən adəv mambray net kapan wədaw nokum də sembe mogonəŋ ɓa.

¹⁸Amma məsok zukum məɓay adəv mbəlembəle də wəsən na Ɗəfdaya məzu kohgəmə, ndəni Zezu Krestu. Gakdak nani daga kakaŋka ha faɗə. Amin.