Read Gidar 1 Zaŋ 1 Bible Online

1 Zaŋ 1 - Gidar bible

1 Zaŋ 1

¹Mənam tatə versukum, aka wənna ɗəf məs adawyaŋ na əpel na zeŋgille, daga duniya tay tagay ɓa, əpel nan tay dabəŋ ki wətəŋ zəga pakə. Məpprəmək pay adaw pele, mulak də haramə, gesiŋ mulaka, mərəŋ gənək də vamə.

²Daga əpeliŋ ade, arbanək zəni, mulaka. Vini mədaw pel sukum wənnani, zəga an muwəl mədarbani ndəni zeŋgille məs nasan ha faɗə, tay də Maŋgəlva daga farfarə. Ndəni kan Maŋgəlva arban səmə.

³Zəga an məs muwəl də haramə, an məs məpprəm də sləmamə, ndəni mədaw nah sukum tamə, vi kəsapaŋ gən də mənamə, vi wəsap nam dəsan gən də Affəni gəm də Wətəni ndəni Zezu Krestu.

⁴Mədaw ver sukum wənnəs na, vi wənek dəknah gən amakramə.

⁵Aŋki labara an məs məpprəm səza Zezu Krestu, annani mədarban sukum: Maŋgəlvayi təki babara, guzli taya zan ko suɗike ɓa.

⁶An mənahək na məslerik də Maŋgəlva, yaŋ bo mənam tatə sam ara guzliyo, məs tepelkeɗ mənani də əpel namə də wəza namə.

⁷Amma an mənam tatə daw ara təki babara va Maŋgəlva sən kiyən asan atəki babara, asna məsappək awalaŋ zəmə, mbel na Wətən waviyanən mambray nam pakə.

⁸An mənahək na məgəɗ mambray ɓa, dərwa na zəm mədaw mbəɗani, goŋga na Maŋgəlva taya makram ɓa.

⁹An məɗiyək marava vi mambray nam aba Maŋgəlva mərban sənəka, waməɓap wəsənən gesiŋ vi əpel nan aziwik gesiŋ waviyan səm mambray namə, waskoɓ səm an məgəɗ pakə.

¹⁰An mənahək na mənam tat də mambray ɓa, asna məɗiyək Maŋgəlva ka məs tepelke əpel nan bo atər na wəray azam ɓa.