Read Gidar 1 Zaŋ 2 Bible Online

1 Zaŋ 2 - Gidar bible

1 Zaŋ 2

¹Kirtuwa wənnəŋ nədwver sukuməŋka, vi kədaɗɗaŋ mambray ɓa yi. Amma an ko naway agəɗək mambraya, mərahək ɗəf na baah səm aba Affəni, Zezu Krestuwi tay də mambray ɓa təstəssi.

²Zezu Krestuwi dəmtə vimə vi Maŋgəlva də viyan səmə gən mambray namə, vi mambray nami kaaka ɓa, amma də mambray net ɗii naka dələv pakə.

³An mərmak ma henziŋ na Maŋgəlva, ndəni dədarbana məsənək Maŋgəlva gesiŋ.

⁴Ɗəf məs dənah na: Nəsənək Maŋgəlva, amma asban ma henziŋ nan ɓa, məwə tepelkeyi goŋga taya Zan ɓa.

⁵Amma ko naway dərma əpel na Maŋgəlva gesiŋ wəŋgla na Maŋgəlva aknahək amakrani. Də aski mədaw sənən na məsappək də Maŋgəlva.

⁶Ɗəf dənah na: Naw nəslerik də Maŋgəlva say dəsan gən va Zezu Krestu asani.

⁷Bayneŋgiɗwa, dawka meleketen nədawver sukum ɓa, amma dawka məsvan məs kəpprəmaŋ daga məpel sukum Wən Nenek dabəŋgəŋki. Dawka məsvanəŋka ndəni əpel an məs kəpprəmaŋ səkayəŋka.

⁸Amma də aspak na dawka meleketen nəver sukum, goŋga nan arbanək zən aza Zezu Krestu də azokum tamə. Ndəni kan guzli adawmbata yaŋ goŋga tay kasak təki səkay.

⁹Ɗəf məs dənah na: Ara təki babar nani, amma tay zel məlməni nan tayara guzliyi tagayɗa.

¹⁰Ɗəf məs dəŋglu məlməni, nan ara təki babari asani, zəga tay azan nasbər gən ɗəf adəv mambray ɓa.

¹¹Amma ɗəf məzu zel məlməni nan ara guzli asani, wədaw nan pak ara guzliyi ha kakaŋka, dəsən na aŋga nədawmbat di ɓa, vi guzli atippik harani.

¹²Intatə ver sukum kirtuwa, vi məviyani mambray nokum vi iya na Zezu Krestu.

¹³Intatə ver sukum munokum effiŋgitti, vi kəsənənək ɗəffan dəsan daga wətəŋ nani. Intatə ver sukum munokum gewleɗi, vi kədayaŋgək ki mbrayen.

¹⁴Intatə ver sukum munokum kirini, vi kəsənənək Affəni. Intatə ver sukum, munokum effiti, vi kəsənənək ɗəffan dəsan daga wətəŋ nani. Intatə ver sukum munokum gewleɗi, vi də sembe kənanaŋ, kəpprəmənək əpel na Maŋgəlva, taya makrokum, yaŋ kədayaŋgək ki mbrayen.

¹⁵Kədaŋgluwən duniya ɓa, walla zəga na duniya ɓa. An ɗəf aŋgluwək duniya, nan wəŋgla Affən taya zan ɓa.

¹⁶Mbarmbari duniya van asan vas di? Ɗii tahəŋ əmbataŋ də zəga na duniya, də wəsim zəga neti, tahəŋ ulanən zəga, yaŋ adaŋglaŋ dərəhən gəni, yaŋ adagakdakanən arya net də wəgakdakan ziti, as pak dəde səza Affən ɓa, amma səza duniya ade.

¹⁷Duniya də zəga nadəv pak wagrak də an məs ɗəf aŋgəl adəvən pakə, amma ɗəf məgəɗ əŋgla na Maŋgəlva nan wasan ha faɗə.

¹⁸Kirtuwa, wəgrak dələv go'oy. Kəsənənka məzuzel na Krestu wade: Yaŋ məzuzelnən Krestu azoŋguk diiɗa, vini məsən kana wəgrak dələv go'oy.

¹⁹Məzuzelin vet bo suwalaŋgəməŋ agilyoŋ, amma ɗii məs də goŋgahəŋ ɓa. Va ɗii nam məs də goŋgaŋ na, appamən na ɓa. Amma appamənka, vi dərbanən gən zit na dəsapaŋ ɗaah də mənam də goŋga ɓa.

²⁰Munokum pak kəsənənək goŋga, vi Krestu apsukumək Əmpəs Salala*.

²¹Nəver sukum wənnəs na vi kəsəŋgən goŋga bay ɓa, amma vi kəsəŋgənək goŋga, kəsəŋgənək bo tepelke agil na səza goŋga ɓa.

²²Ya naway məs tepelke van di? Ko naway dənah na, Zezu na Messiyayi yi ɓa. Ɗəf aska ndəni məzuzel na Krestu. Məs awtaf Affən də Wətən ɓa.

²³Ɗəf məs dətaf Wətən ɓa, dətaf Affən ɓa'a. Ɗəf məs dətaf Wətəni, atafək Affəni.

²⁴Vi vaski məzi zukum də wəga wənna makrokum, labara məs kəpprəmaŋ daga wətəŋ nani. An kərmanənək amakrokum an məs kəpprəmaŋ daga wətəŋ nani, wakəsoŋ də wəsap də Wətəni gəm Affəni.

²⁵Awla an məs Krestu aynan na wapsəmə, ndəni zeŋgille nasuwa ha faɗə.

²⁶Intatə ver sukum aka wənnet ɗii məs dədaŋglaŋ wəmbəɗokuməni.

²⁷Amma nokum Krestu apsukumək əmpəs nani tay san amakrokum, wəray tay naŋgla ɗəf narban sukum zəga ɓa. Vi əmpəs nan tayərban sukum zəga pakə, goŋgayi adarban sukum, zəga na tepelkeyi ɓa. Vi vaski məpprəm ma əmpəsa məsap də Krestu.

²⁸Vaski kirin nawa, məsoŋ amakra Zezu Krestu, vi məsam gən ɓəlɓəllə pay adazani, wil adawdəmən pay wəziya nan ɓa.

²⁹Kəsənənka Krestu təstəssi mambray taya zan ɓa, kəsənənka ko naway məzəɗɗa an təstəssə wətən Maŋgəlvayi.