Read Gidar 1 Zaŋ 4 Bible Online

1 Zaŋ 4 - Gidar bible

1 Zaŋ 4

¹Bayneŋgiɗu na makrawa, kədatafən gu'ləŋ ɗəf məzu pel sukum na tay də əmpəsa ɓa, say məsla əmpəs nani, na Maŋgəlvayi sa, vi məs kleŋɗe məwaŋ tepelke tahəŋ diiɗa aka dəlva.

²Məpprəma tive məs kədaw ɗeketin na aŋki Əmpəs na Maŋgəlva: Ko naway dəgəɗ saydawa də man na Zezu Krestu akpaŋgək ɗəffa, adek aka dəlva, asna ndəni əmpəs məs dəde səza Maŋgəlva.

³Amma an ɗəf azelenək Krestu əmpəs na ɗəf nan dəde səza Maŋgəlva ɓa, ndəni əmpəs na ɗəf məzuzel Krestu, kəpprəmənək na əmpəs nan wade, adek səkay tayaka dəlva.

⁴Amma nokum munokum kirtuwa, kirtin Maŋgəlva kənanaŋ. Nokum kətakənək wəllet məwaŋ tepelke səkay, vi əmpəs ana makrokum ndən də sembe dayki əmpəs ana makret ɗii naka dəlva də gakdaka.

⁵Tahəŋ əpeleŋ də kuket naka dəlva, ɗii naka dələv bo tahəŋ əpprəmən meti, vi ɗii naka dəlvəŋ.

⁶Amma nam na kirtin Maŋgəlva mənani, ɗəf dəsan də Maŋgəlva wapprəm mamə. Amma ɗəffan wətən Maŋgəlvayi ɓa, apprəm na mam ɓa. Də aski mədawɗakan Əmpəs an gesiŋ, walla əmpəs məwə tepelke.

⁷Bayneŋgiɗwa, məŋglu səm zəmə, vi wəŋgla səza Maŋgəlva ade. Ko naway məs tay də wəŋgla, nan wətən Maŋgəlvayi asənək Maŋgəlva.

⁸Ɗəf məs tay də wəŋgla net ɗii ɓa, dəsən Maŋgəlva ɓa, vi Maŋgəlva sən kiyən wəŋglayi.

⁹Apprəma va Maŋgəlva arban wəŋgla nan azamə: Aslənək Wətən anna makrani adek aka dəlva, vi mərah gən zeŋgille dəndən.

¹⁰Aski wəŋgla, mənamtə məŋglu Maŋgəlva dabəŋ ɓa, amma Maŋgəlva dəŋgələm dabəŋ, aslənək Wətəni vi də viyan səmə gən mambray namə.

¹¹Bayneŋgiɗwa, adan Maŋgəlva aŋgələmək vaska, asna aslək azam tam məŋglu gən zəmə.

¹²Ɗəf tay dula ɗaah Maŋgəlva ɓa. Amma an məŋglumək zəmə, asna Maŋgəlva wasan də mənamə, wəŋgla nan bo wagəɗ wəza amakram an məs aŋgəl pakə.

¹³Maŋgəlva apsəmək əmpəs nani. Vini məsən na mənam tat də əsap dəndən, nan bo tay san dəmənamə.

¹⁴Mulaka, məɗɗak saydawa nani Affən aslənək Wətəni vi dəsan gən naw koh git ɗii naka dəlva.

¹⁵Ko naway məs dənah na Zezu Wətən Maŋgəlvayi*, nan Maŋgəlva wasan amakrani, nan bo wasan amakra Maŋgəlva.

¹⁶Nam bo məsənəka mətafək na Maŋgəlva aŋgələməka. Maŋgəlva əŋglayi, ɗəf dədawsan də əŋgla pay pakə, nan taya makra Maŋgəlva, Maŋgəlva bo taya makrani.

¹⁷An əŋgla na Maŋgəlva aɗɗak an məs aŋgəl amakramə, asana məgeslne na pay na kita ɓa, vi wədaw nam annaka dəlvəŋ na, agilik va wədaw na Zezu Krestu.

¹⁸Ɗəf məs də əŋgla geslne adana ɓa, amma wəŋgla an də goŋga wagil gən geslne pakə, an ɗəf tay də geslne, va wənah na wəŋgla dərah wəɗɗa wəza amkran va Maŋgəlva aŋgəl ɓa, vi geslne asapək də kita.

¹⁹Nam məŋglu Maŋgəlva na, vi ndəni dəŋgələm dabəŋ.

²⁰An ɗəf anahək na: Nəŋgluwək Maŋgəlva, amma dəppan wəzel məlmən ɓa, tepelke adawa. An ɗəf dəŋglu məlmən məs adawla aza haran ɓa, mbarmbari adəŋglu Maŋgəlva məs dula ɗaah aza haran ɓa di?

²¹Apprəm dawka an məs Krestu aɗi səm naɗɗa: Ɗəf məs dəŋglu Maŋgəlva, say dəŋglu məlməni.