Read Gidar 1 Zaŋ 5 Bible Online

1 Zaŋ 5 - Gidar bible

1 Zaŋ 5

¹Ko naway dətaf na Messiyayi Krestu, nan wətən Maŋgəlvayi. Ko naway dəŋglu affən waŋglu wətəni.

²Mbarmbari mədaw sənən na məŋliwik kirtin Maŋgəlva di? Say də wəŋglu Maŋgəlva də wəsban dawka nani.

³Mi əŋglu Maŋgəlva di? An Məsbanək an anah səm məɗɗa gəni, an məs anah səm naɗɗa van bo tay tuwãh azam ɓa.

⁴Vi wətən Maŋgəlva pak waɓap wətak wəlla wənziya egge. Də wətaf nami mədawtak wəla wənziya egge.

⁵Naway naw tak wəla wənziya egge di? Say ɗəf dətaf na Zezuwi Wətən Maŋgəlva*.

⁶Zezu Krestu adek dit iŋkile na baptem nani, gəm dit mbel na əmta nani. Dəde dit iŋkile kaaka ɓa, amma dit iŋkile gəm dit mbel pakə. Vi əmpəs sən kiyən asɓanək na.

⁷Vi məɗɗaŋ saydawa tahəŋ hoku.

⁸Əmpəsa dit iŋkile, gəm mbeli, ndəɗaŋ hoku pak məs takaŋ.

⁹Mənam tatə taf saydawa net ɗiiyi, ya saydawa na Maŋgəlva daykiti. Vi ndəni saydawa an Maŋgəlva agəɗ aka Wətəni.

¹⁰Ko naway dətaf Wətən Maŋgəlva*, nan tay də saydawa van amkrani. Amma ɗəf məs dətaf Maŋgəlva ɓa, nan akpaŋganək Maŋgəlva məs tepelke, vi dətaf saydawa an məs Maŋgəlva adaɗɗa aka Wətən ɓa.

¹¹Apprəm saydawa na Maŋgəlva kana: Apsəmək zeŋgille nasuwa ha faɗə, zeŋgille van səza Wətən ade.

¹²Ɗəf məs dətaf Wətən Maŋgəlva*, nan warah zeŋgille, ɗəf məs dətaf Wətən Maŋgəlva ɓa, nan arah nan zeŋgille ɓa.

¹³Nəver sukum wənnəs na, vi kəsənən gən na munokum tat də zeŋgille nasuwa ha faɗə, munokum məs kətafən Wətən Maŋgəlva*.

¹⁴Aŋki mənam tatə sən Maŋgəlva, an mənam tatəɗɗa an məs aŋgələ: Asna an mənam tatə soh zəga avanna, wapprəm səmə.

¹⁵Adan məsənək na, an məs məkaman pak na tay əpprəmən, məsənka wamərah zəga an məssoh avani.

¹⁶An ɗəf awlak məlmən tayəɗɗa mambraya, amma nawkan atəki əmtay ɓa, say dəkam gən vini. Maŋgəlva bo wapsən zeŋgille, vasna ɗii meɓɓet mambray net nawket atəki əmtay ɓa, mambray maɓɓan tay nawka ɗəf atəki əmta, vini nənah sukum na məkamə ɓa.

¹⁷Wəza mogoni ɓa pak mambrayi, amma mambray maɓɓan awka ɗəf atəki namta ɓa.

¹⁸Məsənka an wətən Maŋgəlva kənani, kəsbana wəɗɗa mambray ɓa, amma Wətən Maŋgəlva* tay gani, ɗəf mbrayen aɓapna wəgəɗ sən zəga ɓa.

¹⁹Məsənka nam na Maŋgəlva menani, ɗiiyen dəpaŋ egge pak net ava Satan nəŋ.

²⁰Məsənka Wətən Maŋgəlva* adeke, apsəmək maɗula, vi məsən gən Maŋgəlva an gesiŋ. Mərahək wəsap də Maŋgəlva an gesiŋ də Wətən Zezu Krestu, ndəni Maŋgəlva an gesiŋ ndəni də zeŋgille nasuwa ha faɗə.

²¹Kirin nawa, məga zukum səzet maŋgəlveɗi.