Read Gidar Zuda 1 Bible Online

Zuda 1 - Gidar bible

Zuda 1

¹Letər na Zuda masləŋ na Zezu Krestu məlmən Zakə, əslənən azet ɗiiyen muwelit na Maŋgəlva, məs dəsoŋ adəv əŋgla na Maŋgəlva Affəni, məs Zezu Krestu adawgeti.

²Mbəlembəle də zazay gəm əŋgla dəknah sukum.

³Bayneŋgiɗwa, nəgayək də wənna əver sukum ɗerewel aka wənna əkoh məs məsap akani, amma nulaka nəsokuk zu əver sukum kakaŋka, vi kasɓokum adəv əgay məs mədawgay vi ətaf məs Maŋgəlva apsəm təl taka məkki viyit ɗii nan pakə.

⁴Vi ɗii mbreyit atoŋgoŋguk awalŋmə, məzi zəm aza wənnet ɓa. Aray gənənək labara na mbəlembəle na Maŋgəlva, vi kaw zaɓan wən naɗɗa mambray neti, appanənək wənna Zezu Krestu, ndəni mərbə zəga namə də Ɗəfdaya taka vaŋka. Daga far lahəŋka, ɗerewel na Maŋgəlva arban səmək kita nan arihik ɗiiyiŋ kakaŋka.

⁵Kəsənənək wənnəŋ pakə, amma nəŋgəl əɗumon sukum va Ɗəfdaya akoh git ɗii na Israyel sə Misra. Amma dərɓaga aska azzetik ɗii meɓɓet vi dəpprəmən man ɓa.

⁶Məɗumon wənnet maslayɗe məs dətoŋgoŋ ki meŋge na gakdak məs Maŋgəlva apsiti, appanənək təki nasuwa neti. Maŋgəlva ampetik ara guzli afuŋ, aynetik dit ngiyamɗe məs apəlaŋ na ɓa. Say pay na kita net adawgaŋ kaaka'ə.

⁷Məɗumon wənna dələv na Sodoma də Gomorra, gəm walaŋ gəleɗe en tuwəɗ kini. Ɗii nadəvən aɗɗaŋgək va net maslayɗe nek aɗɗaŋgə, asbanənək wəsim zəga na gəɓa zit mbrayen. Kita na offo məza amta ɓa azəmgitik saha, vi ɗii pak də geslne'eŋ gəni.

⁸Vaski bo, ɗii məs dətoŋgoŋ awaloŋkum neki tahəŋ dit wəsineɗ məzu kenin wəɗɗa mambray də gəɓa ziti, tahəŋ əvərenin sembe na Maŋgəlva, tahəŋ əretin ɗii məs də gakdak sə disiŋ.

⁹Ko Misel ndəni maslay an daya, dəgəɗ vas ɓa. Pay məs adawgayaŋ də Satan aka gəbay na Moyis na naway narəhən kaw gəmən di, ageslne'ək dawran Satan, vini anah sən na: (Ɗəfdaya də hayyoko).

¹⁰Amma ɗiiyiŋki, tahəŋ əpeleŋ mbrayen aka zəga məs dəsənən ɓa. Tahəŋ əsbanən əsim zəga net va zəga mamanya nawra, gesiŋgi wəsim zəga nan wazeti.

¹¹Aw asbanənək tive na Kaynu. Appanənək kizit sit tepelkeɗi, vi kawrəh deleɗ va Balama agəɗə. Azaŋka, aboŋgoŋko va Koora aɓoŋgu.

¹²Pay məs kədaw zəmaŋ, tahəŋ ərbaŋ wil sən əsap nokum də wəsim zəga neti. Net say wəɗum aka zit kaaka'ə. Tahəŋ va slay buwən məs səmnya adaw puweni, awzi ɓa. Tahəŋ va wəleŋɗe məs awaŋ ɓa. Ko dəsan pay nawa net zlaŋ awaŋ ɓa. Tahəŋ va wəleŋɗe məptuti, məs dəmtaŋ.

¹³Tahəŋ də sembe va vovolumɗe a pe'e meteŋgini, wəza mambray net arbanək zən va oŋgofoko. Tahəŋ va ngərzleɗ məzeti, Maŋgəlva azaɓan sitik təki net ara guzli titire. Agulyoŋ na sədak ɓa ha faɗə.

¹⁴Anuwa, məs dəsan buhul net dəhiŋgiɗin əlfən Adam, aɗɗak kleŋ aket ɗii neti, amna: Yaŋ Ɗəfdaya wade dit maslayɗe nan məs salala* wəŋɗa net tay gabal diiɗa.

¹⁵Vi kawtaw kita aket ɗii pakə. Wataw kita aket ɗii məɗɗaŋ mambray vi wəza mambray neti, wataw kita aketi, əpel mbrayen məs adaw peləŋ akani.

¹⁶Ɗii veti, tahəŋ wəpeleŋ wərwər aket ɗii məs dəmbraŋ, tahəŋ wəɗi sitin mambraya. Tahəŋ əsbanən wəsim zəga net mbrayenəŋka, tahəŋ əgakdakanən ziti, tahəŋ wəɗiyən kiziti, vi dərəhaŋ gən an məs aŋglaŋ.

¹⁷Amma bayneŋgiɗwa, məɗumon an məpel sukum lahəŋ də met masləŋɗe na Ɗəfdaya nam Zezu Krestu.

¹⁸Vi anah sukumənək na: An pay wəgrak na dələv agapək na: Ɗii net wazoŋ wamasaŋ akokum, wasbanən wəsim zəga mbrayenəŋka.

¹⁹Ndəɗaŋgəŋ məkayaŋ wənnawɗeket ɗiiyi, wənna gəɓa zit azəmək məlĩ aketi, məza Əmpəs na Maŋgəlvayi ɓa.

²⁰Amma nokum, bayneŋgiɗwa, məsok zukum aza wətaf nokum an salala*. Məkam də sembe na Əmpəs Salala*.

²¹Məga zukum adəv əŋgla na Maŋgəlva. Adan munokum tatə ganən Ɗəfdaya nam Zezu Krestu dəpsukum gən mbəlembəle də zeŋgille nasuwa ha faɗə.

²²Vasna mərma vet ɗii məs məzəɗɗaŋ kuzuŋ də ətaf neti.

²³Migilgit sədəv offo, məkoh giti. Muwəl saha aket ɗii məzəsbanən wəsim zəga neti, amma məga zukum vi mambray net adaw rumkum ɓa.

²⁴Maŋgəlva waɓap wəgukum səza zəga pakə, kəzaŋ na ki tive ɓa, wagəm mambray nokum pakə, wakpaŋgokum salala, wakəzoŋ wizu aban adəv gakdak nan də wanekən zukum diiɗa.

²⁵Ndəni Maŋgəlva taka, ndəni dəkoh gəm də Zezu Krestu Ɗəfdaya namə. Gakdak pak nani, də daya daga far farə, vaski dəpaŋka, wasan ha faɗə. Amin.