Read Gidar Hənhən 11 Bible Online

Hənhən 11 - Gidar bible

Hənhən 11

¹Yaŋ məpsu pəɗəma məs dəgil va zleŋge, kawsla zəga dəndən, yaŋ mənah su na: Asili, asla gəla metiŋ na Maŋgəlva naw zuliya*, gəm kəti nawtaw wəla zəga səni, aŋɗet ɗii məzu zuliyaŋ sənən adəv gəla metiŋ.

²Amma kədawsla daŋgla na gəla metiŋ naw zuliya van ɓa, vi məpsiti avet ɗii məs dəsənən Maŋgəlva ɓa, dəmohən gən walaŋ gəla metiŋ an salala hagap təleɗe kaklaw poɗo kiyit sula (42).

³Wanəslin məɗɗaŋ saydawa naw sula, waguloŋ lukutɗe na sakə, warbanən wənna Maŋgəlva gap wəvoŋ uzinere də səkat sula də kaklaw slire (1.260).

⁴Məɗɗaŋ saydawa sula ndəɗaŋgəŋ heremeɗi, də pitirleɗ sula aba Ɗəfdaya aka dəlva fuŋ.

⁵An ɗəf tay kay tive nawɗi sit vamviya, yaŋ offo adawgilyan sə bereti, adaw zet məzuzelini: Ko naway dəkay tive nawɗi sit vamviya vaski adawbeyti.

⁶Net tahəŋ də sembe nawtak təki a disiŋ məza buwən adaw zi ɓa daga pay məs adaɗɗaŋ kleŋ na Maŋgəlva. Tahəŋ bo də sembe nakpaŋget iŋkile ka mbeli, tahəŋ də sembe bo naɗɗa gbəgba' temtem aka dəlva fuŋ pak an aŋglaŋka.

⁷Pay sən adagrakən wərban wənna Maŋgəlva, zəga mamanya məs dədaw gilyan sə vov məza meŋge nan ɓa, wagay dənɗaŋ, waday kiti wabeye.

⁸Gəbay net wasan aka tive na walaŋ gəla metiŋ, atəki məs məkpa Ɗəfdaya aka məzliwrihe. Walaŋ gəla nan məyani də wən məkpaŋga na, Sodoma walla Misra.

⁹Ɗii daga sə waleŋgit ɗii pakə, daga ma əlfa temtem pakə, dit ɗii zemvit temtem pakə, dələv temtem pakə, wawlanən gəbay net gap wəvoŋ hoku də mangeslin. Angəmaŋ na wəndəkən gəbay net ɓa bo.

¹⁰Ɗii naka dələv pakə, wanekenən zit də əmta net ɗii sulaŋki. Wanekenən zit awalaŋ ziti, də wəpel wənneti, də wəpsən zəga sən ziti, vi məs kleŋɗe suleŋ akiyaŋgək wən tattuwãh aka dələv sawɓa.

¹¹Dərɓaga wəvoŋ hoku də mengeslin, yaŋ əmpəs ade səza Maŋgəlva, agul adəvti, yaŋ asilyoŋ ziwi, ɗii məs dulenin pak geslne armet sawɓa.

¹²Yaŋ məs kleŋɗe sula net apprəmən wəla ɗəf sə disiŋ də sembe dawnah sit na: Məpeŋgi, mədeŋka, yaŋ apeŋgeŋ a disiŋ kla dəv slay buna məzuzel net pak tahəŋ ulenin dawpeŋge.

¹³Dəpaska'a ləŋ dəlva fuŋ aɓəlka, yaŋ maklaw walaŋ gəla metiŋ aɓəzlə, ɗii uzinere buhul dəmtaŋ adəv wəɓla na dələv nani. Ɗii məs dəplaŋ pak ageslen'eŋgək sawɓa, aɗɗaŋgək gakdak sən Maŋgəlva anna disiŋ.

¹⁴Wəzəm saha ma sula'ən atoŋguk vaska, amma məzi zukum wəzəm saha ma hoko'ən tayzan kakaŋka.

¹⁵Yaŋ maslay an mabuhulet affon gozloro nani. Yaŋ wəla ɗəf ade sə disiŋ dayadaya də wənah na: Sembe nazəm məlĩ aka dələv kakaŋ na, na Ɗəfdaya nami də Messiya*, wazəm məlĩ nan ha faɗə.

¹⁶Ɗii gugiriɗ kaklaw sula kiyit poɗo məs tuŋtuŋ aka mazaŋga na məlĩ aba Maŋgəlva, yaŋ akdukoŋ anisin mirbisit afuŋ azuliyaŋ sənənək Maŋgəlva.

¹⁷Aɓɗaŋ na: Mənam tatə gəɗ suk soko aw Ɗəfdaya Maŋgəlva, sembe pak noki. Əstə məs kusok laŋka, əstə kakaŋka'a, vi kəgəmək sembe nok metiŋgini, kəzəmək məlĩ dəni.

¹⁸Ɗii məs dəsənən Maŋgəlva ɓa pak wabayaŋ gagay. Amma pay maɓɓan wade wəda gədəv nok wade, pay məs nawtaw kita aket ɗii mimtiti. Yaŋ pay bo agapka, napsit riba sit məɗɗaŋ wəza noko, məs kleŋɗe dit ɗii nok pakə, dit məzu geslene'eŋ sukuni, ɗii gugiriɗ dit kirin muzliyeɗi, pay agapək nawzet ɗii məzu zanən dəlva.

¹⁹Yaŋ gəla metiŋ naw zuliya* sən Maŋgəlva ana disiŋ akolu, mulani akoti na wən minan adəv gəla metiŋ naka, uwiɗ akutike, də wəhaya, də ɓaɓəlmani, ɓeɓɓrezleɗ aɗɗaŋgək diiɗa, dəlva fuŋ bo aɓəlka.