Read Gidar Hənhən 13 Bible Online

Hənhən 13 - Gidar bible

Hənhən 13

¹Yaŋ nula zəga mamanya agil sə pe'e naka, kiyən tay buhul gəm mohon klaw, mohon pak tay də mətər kiya akani, iya tay mbrayen nawran Maŋgəlva məverin aka kiyən pakə.

²Zəga mamanya məs nuwələŋ na agilik va balgam, tələn bo agilik va təl kəra muya, man bo agilik va ma ɓolu. Ngoŋgoŋ apsənək sembe nani, də mazaŋga nani, də məlĩ nani.

³Nuwələk ki zəga mamanya nak taka arahək vamvi namta, amma vamvi nan anzaɗka. Ɗii na duniya pak agətaŋka, asbanənək zəga mamanya naka.

⁴Ɗii na duniya tahəŋ wəzuliyaŋ sənən ngoŋgoŋ naka, vi apsənək sembe nan sən zəga mamanya naka. Yas bo adazuliyaŋ sənən zəga mamanya naka, yaŋ adawnahaŋ na: Naway dəgil va zəga mamayaŋ di? Naway naw ɓap wəgay dəndən di?

⁵Zəga mamanya arahək tive nawpel wənnaw gakdakan zəni də wənnaw ran Maŋgəlva, arahək sembe naɗɗa vas hagap təla kaklaw poɗo kiyən sula (42).

⁶Yaŋ kan adawpel mbrayen aka Maŋgəlva, də wəran iya nan də kəti məs adawsani, dit məs dədasoŋ a disiŋ pakə.

⁷Arahək tive naw gay dit ɗii na Maŋgəlva, yaŋ bo adayək kiti, yas kəmpa arah sembe aka əlfa pakə, də aka ɗəf pakə, də aka ma net pak də aket ɗii pakə.

⁸Ɗii naka dələv pak wazuliyaŋ sənəni. Ko naway məs iya nan məverini adəv ɗerewel na zeŋgille, daga wətəŋ na dəlva fuŋ ɓa. Botol məs dəmtə naka ɗerewel van nani.

⁹An munokum tat də sləmokum napprəma, məpprəm lewlewi.

¹⁰An məs dədaw ɓəsən dəsan gən mədaŋgay, dewle mədaŋgay adawsani, ɗəffan məs dəsan nawbay də kafahi, dewle də kafahi adawbayini. Aski kan an ɗii na Maŋgəlva adawɓəsaŋ də wətafən.

¹¹Yaŋ nula zəga mamanya maɓɓan wəgilyan sə fuŋ, tay də mohon sula vana botol, yaŋ adawpel vana ngoŋgoŋ.

¹²Yaŋ aɗɗa wəza dit sembeɗ na zəga mamanya an dabəŋ. An dabəŋ van bo, tay ula. Zəga mamanya ma sula'ən agəɗək dewle sən duniya pak dit ɗii na dəvən pak dəzuliyaŋ sənən gən zəga mamanya an dabəŋ, məs huwa nan mbrayen nak anzaɗka.

¹³Zəga mamanya ma sula'ən agəɗək sokeneɗ gugiriɗ temtem diiɗa, yaŋ asɗa offo aprik sə disiŋ afuŋ keret ɗii pakə.

¹⁴Zəga mamanya nan azetik ɗii naka dələv də sokeneɗ məs agəɗ də gakdak na zəga mamanya naka. Yaŋ anah na, ɗii naka dələv pak dəɗɗaŋ gən foto na gakdak na zəga mamanya məs məɗi sən vamvi də kafahi naka, yaŋ tay madarani.

¹⁵Yaŋ zəga mamanya ma sula'ən nak arah sembe napsən əmpəs sən foto na zəga mamanya an dabəŋ naka, vi foto nan dəpel gəni də beyi gən ɗii məs awzuliyaŋ sənən ɓa pakə.

¹⁶Yaŋ zəga mamanya nak adaɗɗa dewle sit ɗii gugiriɗ dit muzliyeɗi, dit məs aryeɗi, dit məs saheŋɗe dit balemɗe, dit ɗii məza balemɗeŋ ɓa, kaɗɗa sit lamba aka vet dəzəŋ gəm amirbisti.

¹⁷Ɗəf tay naw ɓap wəvəl zəga ɓa, walla wəlbaah zəga ɓa, say an tay də lamba nani va wənah na wəŋɗa na zəga mamanya naka walla va iya nani.

¹⁸Aŋki zəga nawsəna. An ɗəf tay də wəsəna, say dəŋɗan wəŋɗa na zəga mamanyaŋka, vi wəŋɗa nan də iya na ɗəffi, wəŋɗa nan tay səkat slire də kaklaw slire kiyən slire (666).