Read Gidar Hənhən 14 Bible Online

Hənhən 14 - Gidar bible

Hənhən 14

¹Yaŋ nəzi harawa, nulak Botol ziwe aka gərəm na Siyon, dit ɗii meɓɓet tahəŋ dəndən uzinere səkat də uzine kaklaw poɗo kiyən poɗo, məs dəsoŋ də iya nani də iya na Affən məverin a mirbisti.

²Yaŋ nəpprəm wəla ɗəf sə disiŋ va ɓaɓilmet iŋkile diiɗa, va wəhay na buwən diiɗa, wəla ɗəf məs nəpprəməŋka, tay va ɓaɓəlmet məbayaŋ gazamvəl metiŋgin va adawbayəni.

³Tahəŋ wəyaŋ gəlya meleketen aba mazaŋga na məlĩya, gəm abet zigeɗ madaret poɗo dit ɗii gugiriɗe. Ɗəf tay naw ɓap wəyagan gəlya nan ɓa, say ɗii uzine səkat də uzine kaklaw poɗo kiyit poɗo məs məmet səka dəlva fuŋ naka.

⁴Ndəɗaŋgəŋ ɗii məs dəganən zit məza wəɗɗaŋ mana'a dit gil ɓa, dəkayaŋ gil ɓa. Aga nənək zit lewlewi. Ndəɗaŋ dədasbanən Botol atəki məs adawmbat pakə, net məmeti suweleŋgit ɗiiyi, vi dəsoŋ gən tiziɗe aza Maŋgəlva də aza Botol na Maŋgəlva.

⁵Ɗii net kawrəhi tepelke amet ɓa, mbrayen taya zet ɓa.

⁶Yaŋ nula maslay maɓɓan daw veŋ a disiŋ faraɗa, tay də labara nenek na Maŋgəlva avan ha faɗə, vi kawnah sit ɗii naka dələv pakə, dit ɗii temtem pakə, də ma əlfa pak dit zemvit ɗii pak dit ɗii pakə.

⁷Yaŋ anah sit də wəlan dayadaya: Məgeslnesən Maŋgəlva, mə gakdakani, vi pay na kita nan agapka. Məzulisəni ndəni dəɗɗa disiŋ də dəlva fuŋ də pe'e dit məzimaŋ net iŋkile.

⁸Maslay ma sula'ən adek wənah vaska amna: Aɓəslka, aɓəslka, Babilon walaŋ gəla metiŋgini. Vi apsitik mbazla sit ɗii pakə, yaŋ asaa nən mbazla na wəza an ɗarɗarə ana wil an məs adaɗɗa.

⁹Maslay mohoko'it adek dərɓegeti, yaŋ adawnah də wəlan dayadaya na: An ɗəf azuli sənək zəga mamanya, də foto nani, atafək lamba nan a mirbisin də aka vani,

¹⁰nan wasə mbazla nawdaa gədəv na Maŋgəlva, məs məslahani ɓa, məmbaɗən adəv tasa nawdaa gədəva. Ɗii məzəɗɗaŋ vas pak wasaaŋ bonoy adəv offo də wəzəm saha abet maslayɗe en salala* də aba Botol na Maŋgəlva.

¹¹Enene na daŋgay net tahəŋ wəmbataŋ ha a disiŋ ha dudan. Ɗii məs dəzuliyaŋ sənən zəga mamanya də foto nan pak neki, arəhaŋ na wəfet ɓa kapaya də dəfəɗ pakə, dit ɗii məs dətafən lamba na iya nan nek pakə.

¹²Ndəni kan wəɓəs net ɗii na Maŋgəlva an məs dəɓəsaŋ, də wərma ma henziŋ na Maŋgəlva amekreti də wətaf Zezu.

¹³Nəpprəmək wəla ɗəf dawnah su daga sə disiŋ na: Aver wənnəŋka. Zəzay azet ɗii mimtit kakaŋka, məs dəmtaŋ aka wəza na Ɗəfdaya. Yaŋ Əmpəs anah na: Vaski gesiŋgi, wafeteŋ səka wəza netiŋ tattuwãhəŋ kana, mogon məs aɗɗaŋgəŋka tayəsbeti.

¹⁴Yaŋ nəzi haraw əmpa, nulak slay buwən babara, aka slay buwən naka nuwələk zəga va ɗəffa tay ɗewe akani. Atərək kiyən də mətər kiya na meleŋge, də slogoy məs man adazum diiɗa avani.

¹⁵Maslay maɓɓan agilik sədəv gəla metiŋ na zuliya*, yaŋ adaw təl ma dayadaya sən ɗəf məs dəsan aka slay buwən a disiŋ naka: Agəm slogoy nok aɓəllə, mawala agapka, dəlva fuŋ asəɓək naw ɓəlla.

¹⁶Ɗəf məs dəsan aka slay buwənnak atələk slogoy aka dəlva fuŋ, zəga naka dəlva fuŋ pak məbəlni.

¹⁷Yaŋ maslay maɓɓan agil sədəv gəla metiŋ naw zuliya* na disiŋ, nan bo tay də slogoy məs man dədazum diiɗa.

¹⁸Maslay maɓɓan adek səkəti nawtaw wəla zəga sən Maŋgəlva, tay də sembe aka offo. Atələk wəlan dayadaya, anahsən ɗəf məs də slogoy avan məs man dədazum diiɗa naka: Agəm slogoy noko, ataw uwa net wəleŋɗe na biya naka dəlva fuŋ asɓaŋgək kana.

¹⁹Maslay nak atələk slogoy nan nak aka dəlva fuŋ atawək uwa net wəleŋɗe na biya naka dəlva fuŋ, yaŋ asget atəki naw ɗotti, ndəni wəda gədəv na Maŋgəlva.

²⁰Məŋkinti uwa net wəleŋɗe na biya atəki naw ɗottit maɓɓani ama poho na walaŋ gəla metiŋ. Mbel agulyoŋko, anzoŋguk koɗkoɗ gap kilometər səkat hoku, kpumkpum net mbel net bo, tay va wərga va ɗəf hoku.