Read Gidar Hənhən 16 Bible Online

Hənhən 16 - Gidar bible

Hənhən 16

¹Nəpprəmək dawpel dayadaya daga sədəv gəla metiŋ naw zuliya* naka, yaŋ adawnah sit maslayɗe buhul nek na: Mədoŋ məgba' wəda gədəv na Maŋgəlva sədəvət makasliɗe buhul nek aka dəlva fuŋ.

²Maslay an dabəŋ ambatka agba'ək sədəv makasli nani, yaŋ kurtiya məzasiyaŋ diiɗa, aɗɗaŋ azet ɗii məs də lamba na zəga mamanya azet neki, dit məzu zuliyaŋ sənən foto nan pakə.

³Maslay ma sula'ən adek də makasli nani, agba'ək aret iŋkile na məlpa an metiŋgin, iŋkile pak akpaŋgaŋgək mbeli va mbel na ɗəf məs dəmtə, zigeɗ maderet naret Iŋkile aməlpa pak amtaŋka.

⁴Maslay mohoko'it agba'ək ana dəv makasli adivit məlpeŋɗe də aket iŋkile məzimaŋ pakə, iŋkile pak akpaŋgaŋgək mbeli.

⁵Yaŋ nəpprəm wəla maslay məs də sembe aket iŋkile, yaŋ adawnah na: Əstə təstəssə, məs kəsok kakaŋka va kəsok laŋka, əstə Salala*, adəv kita nok məs kədatawa,

⁶vi aziyinik mbel net ɗii na Maŋgəlva, dit mbel net məs kleŋɗe nan pakə, kəpsitik mbel dəsaaŋ gəni, as bo aslək aza wəza neti.

⁷Nəpprəmək wəla ɗəf səkəti nawtaw wəla zəga sən Maŋgəlva dawnah na: Vaski aw Ɗəfdaya Maŋgəlva sembe pak noki, kita nok də goŋgayi, asləka bo.

⁸Maslay mapoɗo'it agba'ək ana dəv makasli nan aka paya, məpsəni tive sən pay dəzle gin ɗii də offo nani.

⁹Ɗii azlaŋgək də kakaah na offo nan sawɓa, vi adaw ranən iya na Maŋgəlva an məs də sembe, aket bonoyɗe neti, amma dəŋgereŋ də tubiyaŋ sənən gən vi mambray net ɓa, də gakdakanən ɓa bo.

¹⁰Yaŋ maslay masle'et agba' ana dəv makasli nan aka mazaŋga na məlĩ na zəga mamanya naka. Guzli titir agəɗək aka məlĩ nan pakə. Ɗii arslanənək hərzlimti vi wəsiya nani,

¹¹aranənək Maŋgəlva ana disiŋ vi wəsiya məs dədaset dit kurtiya. Amma dəŋgereŋ wəppan wəza mambray net ɓa.

¹²Yaŋ maslay maslire'it agba' ana dəv makasli nan adəv məlpa metiŋgin məs adawyaŋ na Efratis. Iŋkile na məlpa nan akpa'aŋka akəlka, ha məlĩyeŋge namba pay nampum arəhaŋgək tive nawtoŋ dədaka.

¹³Yaŋ nula tuyeŋɗe hoku tuyeŋɗe net mbraytiŋ sawɓa, agulyoŋguk va oŋgornekeɗi, səma zəga darawən də zəga mamanya naka, gəm səmet məs kleŋ məwə tepelke adawgilyoŋ.

¹⁴Tuyeŋɗe net səza Satan azoŋ, tahəŋ wəɗɗaŋ sokeneɗi. Yaŋ adoŋ azet məlĩyeŋge namba dələv pakə, akeletinke vi kaɗɗa wəlpa an metiŋgini, an məs Maŋgəlva an də sembe aka zəga pak aɗi pay nani.

¹⁵Məpprəma! Intatə zaw va məhala! Zəzay aza məzugani də wəga lukut nani, vi adawdaw zən mekeleŋ ɓa, wil bo adawdanən abet ɗii ɓa.

¹⁶Tuya nak bo akkeletik məlĩyeŋge atəki məs adawyaŋ də met Yahudiyenɗe na Harmagedon.

¹⁷Yaŋ maslay mabuhulet agba' ana dəv makasli nan a disiŋ. Yas wəla ɗəf ade daga sə disiŋ də gagay adəv gəla metiŋ naw zuliya* aba mazaŋga na məlĩya, amna: Agəɗka agraka!

¹⁸Awiɗke, ahayka, yaŋ dəlva fuŋ aɓələk də sembe sawɓa. Dələv dəɓəl ɗaah vas ɓa, daga ɗii assoŋ aka dəlva.

¹⁹Walaŋ gəla metiŋ aŋgarək təɓələn hoku, walaŋ gəleɗe naka dələv pak azaŋka. Maŋgəlva aɗumonək wənna Babilon, walaŋ gəla metiŋgini, apsənək mbazla na dəv makasli naw saani, ndəni mbazla na wəda gədəv nan an tattuwãha.

²⁰Məlpeŋɗe diiɗa dit massorgeɗe pak azaŋka.

²¹Ɓeɓɓrezleɗ abətaŋgək gugiriɗ daga sə disiŋ aket ɗiiyi, gakdak na beɓɓrezle nan taka pak tay va kilo kaklaw poɗo. Ɗii aranənək Maŋgəlva sawɓa, vi bonoy məs dəde aketi, vi bonoy nan tuwãhi diiɗa sawɓa.