Read Gidar Hənhən 17 Bible Online

Hənhən 17 - Gidar bible

Hənhən 17

¹Yaŋ maslay taka suweleŋgit maslayɗe buhul də makasli buhul avet nak ade nah su na: Ade awla, va adawtawən kita akat bərviyak matəŋgət nakə, walaŋ gəla metiŋgin mərkan aket məlpeŋge.

²Məlĩyeŋge naka dələv aɗɗaŋgək mana'a dənta, ɗii na ka dələv atemeŋgək də mbazla na ɗarɗar nata.

³Əmpəs na Maŋgəlva agəm wəka, maslay akəwək awra. Adaki nulət guluk nakə, tat ɗewwe aka zəga mamanya peppreŋge, zən pak sərət də iya nawran Maŋgəlva məverin aza zəga mamanya naka, tay də kiyən buhul, mohon bo tay klaw.

⁴Yaŋ guluk nak təgul lukutɗe preŋpreŋ dit lukutɗe peppreŋɗe, zigeɗ naza sləmat bo na meleŋge, dit kuneŋge ana sləma diiɗa, dit averzleɗi. Də zəga naw saa zəga avat na meleŋge məknahən dit zigeɗ mbreyiti dit zigeɗ na ma henziŋ na ɗarɗar nata.

⁵Amirbisit bo iya na wən məɗama tay məverin: Babilon metiŋgini met bərviyeɗi dit məɗɗaŋ ɗarɗar na duniya pakə.

⁶Nulətək guluk nak titemik dit mbel net ɗii na Maŋgəlva, gəm dit mbel net ɗii məbeyit vi aɗiyən kiyit aka Zezu. Adan nula, nəgətək sawɓa.

⁷Maslay nak assohowəka: Vimi kədagət di? Wanərban suk wən məɗama nat gulukəŋkə, də wənna zəga mamanya məs təpeŋ akan pakə, məs də kiyən buhul gəm mohon klaw naka.

⁸Zəga mamanya məs kədawlaŋka, taylaŋka, amma kakaŋ na tay ɓa. Gu'oy aza wəgilyan sədəv vov kpukpum mbrayen, kadan atəki nawza kana. Ɗii məs iya net tay məverin adəv ɗerewel nawkoh ɓa daga wətəŋ na duniya, an awlanənək zəga mamanyaŋ na wagətaŋ, vi tay laŋka amma tay kakaŋ ɓa, ya wamil əmpa'a.

⁹Kapprəman wənnəs na, say ɗəf dəsan də maɗula də wəsəna. Kiyən buhul, ndəni mosorgeɗe buhul. Guluk tat tuŋgo aketi. Ndəɗaŋgəŋ məlĩyeŋge buhule'e bo,

¹⁰sle asbəraŋka, an taka tay zəm məlĩya, an taka bo dəɓəl wəzzan ɓa. An adeke, anzina aka məlĩ nan ɓa.

¹¹Zəga mamanya nak tay laŋka, amma tay kakaŋ ɓa, ndəni məlĩ ma dədopoɗeti, ndəni bo ma buhulet en dabəŋ neki, amma wambat atəki nawza.

¹²Mohon məs kuwəl klaw wəŋka, ndəɗaŋgəŋ məlĩyeŋge klaw, dətəŋgən wəzəm məlĩ net tagay ɓa, amma ler taka kaaka adawzəmaŋ məlĩ sap də zəga mamanya naka.

¹³Ndəɗaŋ klaw pak maɗulet takay, ndəɗaŋ pak wasapanən sembe neti də gakdak net pak sən zəga mamanya naka.

¹⁴Wagayaŋ də Botol na Maŋgəlva. Amma botol dit ɗii nan məs məyeti məwelti dəɗiyən kiyit akani wadayaŋ kiti, vi ndəni Ɗəfdaya net ɗiiyen dayeɗe, ndəni məlĩ net məlĩyeŋge.

¹⁵Maslay nak anah suwək əmpa, apsu na: Iŋkile məs kuwəl neki məs guluk nak təsat aket neki, ndəɗaŋgəŋ ɗiiyi, ɗii diiɗa, ɗii naka dələv temtem də ma temtemi.

¹⁶Moho zəga mamanya məs kuwəl klaw nek pak wazeltən guluk məs ɗarɗar nakə. Wandanən zəga nat pakə, wappatən zət mekeleŋ, wazəmən slu na zəta, wazlətən də offo.

¹⁷Vi Maŋgəlvayi dəpsit wəɗum nan amekreti vi dəɗɗanən gən wəŋgla nani, dəɗɗanən gən də madulet taka, dəpsənən gən sembe sən zəga mamanya dəzəm gən məlĩya, ha wəpel na Maŋgəlva dəsan gən gesiŋ.

¹⁸Guluk məs kuwəl kəŋkə, ndətə walaŋ gəla metiŋ məs məlĩyeŋge na dələv pak adawzəmaŋ məlĩ adaka.