Read Gidar Hənhən 19 Bible Online

Hənhən 19 - Gidar bible

Hənhən 19

¹Dərɓaga aska yaŋ nəpprəm wəpel va wəlet ɗii diiɗa a disiŋ, dawnahaŋ na: Məgəɗ soko sən Maŋgəlva! Wəkoho də gakdaka, də sembe pak na Maŋgəlva nami.

²Tay taw kita də goŋga va an dəslə. Yaŋ ataw kita akat bərviyak matəŋgət nakə, məs təray git ɗii naka dələv pak də wəɗɗa mana'a nata. Maŋgəlva atawək kita akata vi təbeyik gewleɗ nani.

³Annəhaŋ əmpa na: Məgakdakan Maŋgəlva, enene na wəzla na walaŋ gəla metiŋ nak tahəŋ wəserweɗeŋ ha faɗə!

⁴Ɗii gugiriɗ kaklaw sula kiyit poɗo dit zigeɗ mederet poɗo akdukoŋguk afuŋ aba Maŋgəlva məs dəsan aka mazaŋga na məlĩya azuliyaŋ sənənka, aɓɗaŋ na: Amin! Məgakdakan Maŋgəlva!

⁵Yaŋ wəla ɗəf ade daga səka mazaŋga na məlĩ nani, yaŋ adawnah na: Məgakdakan Maŋgəlva namə, munokum gewleɗ nani, dit məzu geslne'eŋ sənəni, ɗii gugiriɗ dit memeɗeŋɗe pakə.

⁶Yaŋ nəpprəm gugoyo diiɗa va ɓaɓəlma məlpa dawdaw aket kuneŋge, va wəhay na buna. Nəpprəmək adawnah na: Məgakdakan Maŋgəlva! Vi ndəni Maŋgəlva Ɗəfdaya namə, sembe pak nani, ndəni məlĩya.

⁷Məneken səm zəm də hĩya, hĩya, məgəɗ səm soko vi gakdak nani, vi pay naw ɓel na Botol na Maŋgəlva agapka, waŋ nawɓel təzaɓanək zəta.

⁸Təguluk lukutɗe kukuɗe məzu wiɗeŋ. Lukutɗe bo ndəni wəza net ɗii na Maŋgəlva en təstəssə.

⁹Yaŋ maslay annah suwa: Avere: Zəzay azet ɗii məs məyet aka zəga naw ɓel na Botol na Maŋgəlva. Yaŋ anah əmpa na: Ndəni wəpel na Maŋgəlva an də goŋga.

¹⁰Nəkdukuk amba tələn kawzuli səni, amma apsu na: Kəɗɗa vas ɓa! Naw bo gawla na Maŋgəlva nan va isi gəm venet milmiŋgiɗuk məs dərəhaŋ goŋga səza Zezu. Məzulisən Maŋgəlva. Goŋga məs Zezu arbani, ndəni an məs kleŋɗe arbaŋ də wəza neti.

¹¹Yaŋ nula disiŋ akolko, pələs babar taya dak zuwwe, ɗəf nakani ndəni ɗəf təstəs də goŋga. Tay taw kita nani, tayəɗɗa wəgay nan va an dəslə.

¹²Haran agilik va anzil offo, atərək kiyən dit mətər kiyaɗe diiɗa akani, iya tay məverin akani, ɗəf tay dəsən iya nan ɓa say ndən kaaka'ə.

¹³Aguluk lukut metiŋ də mbel azan preŋgi. Ndəni adawyaŋ na wəpel na Maŋgəlva.

¹⁴Gewleɗ naw gay sə disiŋ asbanənka apeŋgeŋgək aket pəlseŋge baberɗe, aguloŋguk lukutɗe kukuɗe, salala baberɗe.

¹⁵Yaŋ kafahi məs man va offo agil səmani. Dəndəni adaw day kiyit ɗii pakə. Wazəm məlĩ aket də zleŋge na təbəssa, waɗot uwa net wəleŋɗe na mbazla adəv təki naw ɗotti, ndəni wəda gədəv an tattuwãh na Maŋgəlva məs də san Ɗəfdaya aka zəga pakə.

¹⁶Aka lukut nani də aka metetileni iya tay məverin. Məlĩ net məlĩyeŋge Daya net dayaɗe.

¹⁷Yaŋ nula maslay tay ziwwe adəv paya. Aŋgəsl sitik vamvəl sit biŋgeɗ məzu veŋgeŋ a disiŋ pak də wəlan dayadaya: Mide məkkal aka way metiŋgin na Maŋgəlva!

¹⁸Mide məzəm slu net məlĩyeŋge, də slu net ɗii gugiriɗ net sozeɗi də slu net sozeɗi, də slu net pəlseŋge də slu net ɗii məs dəpeŋgeŋ aket pəlseŋge, də slu net ɗii pakə, balemɗe dit ɗii məza balemɗeŋ ɓa, dit ɗii gugiriɗ dit muzliyeɗi.

¹⁹Yaŋ nula zəga mamanya naka dit məlĩyeŋge na dələv dit sozeɗ neti, asapaŋgək kaɗɗaŋ wəgay də ɗəf məs dəpeŋ aka pələs naka dit sozeɗ nani.

²⁰Agulunək zəga mamanya a daŋgay, gəm məs kleŋ məwə tepelke məgəɗ sokeneɗ abani. Dit sokeneɗ neti ambəɗetin ɗii məs dətafən lamba na zəga mamanya naka də məzu zuliyaŋ sənən foto nani. Zəga mamanya də məs kleŋ məwə tepelke məsgeti maderet adəv vov na offo muhurən.

²¹Kafahi məs dədawgilyen səma ɗəf məs dəpeŋ aka pələs naka abeyik sozeɗ net pakə. Biŋgeɗ pak azəmənək slu neti abaŋgək sawɓa.