Read Gidar Hənhən 20 Bible Online

Hənhən 20 - Gidar bible

Hənhən 20

¹Yaŋ nula maslay dawpriken sə disiŋ, lakile nakol ma vov kpukpum mbrayen taya vani gəm ngiyamɗe.

²Armak zəga darawən, doho an məgalən, va wənah na Ibilisa walla Satan, aynanək dəgəɗ gən wəsva dubu taka.

³Maslay nak asganək a vov kpukpum mbrayen naka, ampanək mani asləratək lamba azani, vi adaw mbəɗet ɗaah ɗii əmpa ɓa, say an wəsva dubu taka atoŋko. Dərɓaga askəmpa bo kapani pay suɗike əmpa.

⁴Yaŋ nula mazeŋgeɗ na məlĩya, ɗii məs dəsoŋ aket bo, arəhaŋgək sembe nawtaw kita. Nulak zeŋgillet ɗii məs məbeyit vi adarbanən goŋga məs Zezu arbanəŋka, gəm vi arbanən wənna Maŋgəlva. Dəzuliyaŋ sənən zəga mamanya ɓa, də foto nan pakə, dətafən lamba nan amirbisit ɓa, walla aza vet ɓa. Tahəŋ maderet də Krestu, tahəŋ wəzəmaŋ məlĩ dəndən gap wəsva dubu taka.

⁵Ɗii mimtit meɓɓet dəsoŋ maderet ɓa ha wəsva dubu taka grakə. Ndəni wəsilyo səkəti əmta an dabəŋ.

⁶Ɗii məs dədawsilyoŋ dabəŋ veti, zit wasan neki də zəzay pak aketi. Wəmta ma sula'ən tay də sembe aket ɓa, wakpaŋgaŋ məs dəlveŋge məɗɗaŋ wəza na Maŋgəlva də Krestu, wazəmaŋ məlĩ də Krestu wəsva dubu taka.

⁷An wəsva dubu taka atoŋko, kapani Satan sə daŋgay.

⁸Wambat wəmbəɗet ɗii meɓɓet aka dələv pakə, va wənah na: Gog də Mogog. Satan wakkeleti kawgaya, wasoŋ diiɗa va hoyoŋko a məlpa.

⁹Watrayaŋ aka dələv pakə, wakaraŋ ki gizlirke net ɗii na Maŋgəlva. Amma offo waprik sə disiŋ wazet pakə.

¹⁰Asna Satan məs dəmbəɗetiŋka kasgani avov na offo an muhurən, atəki məs məsgan zəga mamanya də məs kleŋ məwə tepelke dabəŋ naka, wasaaŋ bonoy adak kapay də dəfəɗ pak ha faɗə.

¹¹Yaŋ nula mazaŋga babar na məlĩya də ɗəf məs dəsan akani. Dəlva fuŋ də disiŋ tahəŋ wənzoŋ sənəni, kawleti ɗaah əmpa ɓa.

¹²Nulak ɗii mimtit pakə, ɗii gugiriɗ dit muzliyeɗ pakə, tahəŋ ziw ziw aba mazaŋga na məlĩya. Məkolti ɗerewelɗe, yaŋ məkol ɗerewel maɓɓani, ndəni ɗerewel na zeŋgille. Ɗii mimtit pak mətawi kita aket va wəza net aɗɗaŋ məverin adəvit ɗerewelɗe.

¹³Yaŋ məlpa metiŋ agilgitik ɗii məs nadəvən. Wəmta də təki net ɗii mimtit pakə, agilgitinik ɗii neti. Ndəɗaŋ pak mətawi kita aket va wəza net məs aɗɗaŋ.

¹⁴Yaskan wəmta də təki net ɗii mimtit pak məsgeti avov na offo. Vov na offo nan ndəni wəmta ma sula'ən.

¹⁵Ko naway pak məs iya nan meverini adəv ɗerewel na zeŋgille ɓa, kasgani adəv vov na offo.