Read Gidar Hənhən 21 Bible Online

Hənhən 21 - Gidar bible

Hənhən 21

¹Yaŋ nula disiŋ meleketeni, də dələv meleketeni. Disiŋ an dabəŋ də dələv an dabəŋ pak anzoŋko, pe'e bo tay ɓa azəka.

²Nulak walaŋ gəla an salala*, Zerusalem meleketen tay prike sə disiŋ sə maŋgava Maŋgəlva zən sekke, va waŋ məzaɓan zət nambat atəki wəɓele.

³Nəpprəmək wəla ɗəf də sembe aka mazaŋga na məlĩya, yaŋ adawnah na: Kəti nasuwa na Maŋgəlva aweleŋgit ɗiiyi! Wasan dənɗaŋ wasoŋ ka ɗii nani, Maŋgəlva sən kiyən wasan dənɗaŋ, wasan Maŋgəlva neti.

⁴Wapay sit sin siret pakə, əmta bo tay ɓa, wəhəm tay ɓa, wəska morkoyo tay ɓa, wəsiya na zəga taya dak ɓa'a. Zigeɗ en farfar pak agrakaŋka.

⁵Yaŋ ɗəf məs dəsan aka mazaŋga na məlĩ amna: Intatəɗɗa zigeɗ pak meleketeti! Apsu na: Aver wənnəŋka, vi wəpel nawəŋka, goŋgay təstəssi.

⁶Yaŋ asban wənah na: Agəɗək səkay grakə. Əntə an dabəŋ wətəŋ nani, də an dirɓe pakə wəgrak nani. Ɗəf məs meme adaŋ pak wanəpsən iŋkile mima naw saa na zeŋgille na mekeleŋ.

⁷Ɗii məs dədaw dayaŋ, aski nədapsiti, wanəsaw Maŋgəlva neti, wasoŋ kirtuwa.

⁸Amma ɗii mədekti məɓoŋti, məɗɗaŋ zəga an na henziŋ, may məbayaŋ ɗiiyi, məɗɗaŋ mana'a, məɗɗaŋ sokene, məzuliyaŋ sənən tuya, məwaŋ tepelke pakə, net təki net na, ndəni pe'e məs offo adawzla adak va muhurən, ndəni kan əmta an ma sula'ən.

⁹Ɗəf taka sə waleŋgit maslayɗe buhul nek məs də makasli na bonoy buhul avet neki, an dirɓegeti ma buhulet nak ade nah su na: Ade nərbat sukut akən məs Botol na Maŋgəlva adaŋgla wəɓel nakə.

¹⁰Əmpəs na Maŋgəlva adek akawa, maslay nak akuwək aka gərəm məɓayən diiɗa. Arban suwək Zerusalem walaŋ gəla metiŋ, məs salala dəde səza Maŋgəlva ana disiŋ.

¹¹Walaŋ gəla nan tay wiɗ də gakdak na Maŋgəlva, uwiɗ nan tay va gərəm na sləma, va gərəm məs adawyaŋ na yaspa kəɗeslkəɗesl va darawgal.

¹²Walaŋ gəla nan tay də zlava na dələv məɓayən, mative nan tay klaw kiyən sula, dit maslayɗe klaw kiyit sula məzu ganən mative nani. Məverini ma əlfa net Israyelɗe klaw kiyən sula aka mative nani.

¹³Mativeɗ tahəŋ hoku amba pay nampum, hoku tapaslay na dohoŋ, hoku bo tapaslay na disiŋ, hoku tamə dəmba pay na moskoyo.

¹⁴Zlava na dələv nan məɗini gaban aket kuneŋge klaw kiyit sula, aket kuneŋge net məver iya net masləŋɗe na Botol na Maŋgəlva klaw kiyit sula.

¹⁵Maslay məzu pel su naka, tay də sulegere na meleŋge vi kawsla walaŋ gəla metiŋ dəndən dit metiveɗ nani də zlava na dələv nan pakə.

¹⁶Təkzləm walaŋ gəla van daka dakayi pakə, zezek nani də slosloprok pak məstakayi. Maslay nak aslak walaŋ gəla nak də sulegere nan naka, zezek nan agəɗək metir uzine sula də səkat sula (2,200). Ko slosloprok nani də zezek nani də wəɓay nani məstakayi pakə.

¹⁷Aslak zlava na dələv tamə, agəɗək metir kaklaw buhul kiyən sula (72) va an ɗii adawslaŋ zəga.

¹⁸Zlava na dələv nan mərkani dit kuneŋge məs adawyaŋ na Yaspa, amma walaŋ gəla zək nan na, mərkan də meleŋge an mogoni məzu wiɗ va darawgal.

¹⁹Gaba zlava na dələv nan məbaysəni gawla dit kuneŋge na sləma temtem diiɗa: An məɗiyən dabəŋ ndəni yaspa, sula nani safiira, hoku nani, agate, poɗo nani imaradi,

²⁰sle nani onikis, slire nani sardis, buhul nani kirisoliti, dədopoɗo nani gərəm manzakalnyakalnya, vaytak nani topas, klaw nani krisoparasu, klaw kiyən taka nani gərəm lipilaare, klaw kiyən sula nani ametistu.

²¹Metiveɗ klaw kiyit sula, ndəɗaŋgəŋ averzleɗ klaw kiyit sula. Metiveɗ məɗɗet də zev averzle taka, tive na walaŋ gəla nan pak məɗɗani də meleŋge an mogoni məzu wiɗ va darawgal.

²²Nula gəla metiŋ naw zuliya* adəv walaŋ gəla nan ɓa, vi Maŋgəlva Ɗəfdaya məs də sembe aka zəga pakə, ndəni gəla metiŋ naw zuliya na walaŋ gəla vani, də Botol nani.

²³Wəray tay na paya walla na təla ɓa, vi də kasak gən awalaŋ gəla nan ɓa, Botol na Maŋgəlvayi pitirla na walaŋ gəla nani.

²⁴Ɗii nak dələv pak wadawaŋ ara təki babar nani, məlĩyeŋge nak dələv wakinən arya net adaka.

²⁵Pay pak metiveɗ na walaŋ gəla nan tahəŋ viŋge, kampeti ɓa, vi dəfəɗ tayadak əmpa ɓa.

²⁶Gakdak net ɗii də arya net ɗii na dələv, kawkani awalaŋ gəla nani.

²⁷Amma zəga an na ma henziŋ atoŋ na awalaŋ gəla nan ɓa, ɗəf məzəppan ki zən vi zəga mambray pak də məwə tepelke pak atoŋ na adak ɓa. Ɗii məs nawtoŋgoŋ adak na, say ɗii məs məver iya net adəv ɗerewel na zeŋgille nava Botol nak dədawtoŋgoŋ awalaŋ gəla nani.