Read Gidar Hənhən 3 Bible Online

Hənhən 3 - Gidar bible

Hənhən 3

¹Aver aza maslay net kretiyenɗe na Sardis: Ɗəf məs dərme Əmpəsɗe na Maŋgəlva buhul dit ngərzleɗ buhul nek amna: Nəsənək an məs kədaɗɗa pakə, nəsənka istatə ɗi zuk va madarokok kənani, mbaraka na məmtuk kənani.

²Afɗaahə, asok zuk aza zəga navoko, vi manaka əmta grakə. Vi nulak na, wəza nok tay mogon aba Maŋgəlva naw ɓa.

³Aɗumon zəga məs kəyagani də zəga məs kəpprəmə, asban wənnani. Akpaŋgan makrok səza mambray noko. An kəŋger wəfɗaah ɓa, wanəde azok va mamal va mahala, məza is wəsən pay məs nəda zaw ɓa.

⁴Amma istat dit ɗii meɓɓet suɗike a Sardisəŋka, məza dərdufonən lukutɗe net ɓa. Tahəŋ wədawaŋ də in də lukutɗe net baberɗe, net agapaŋka.

⁵Ɗii məs dədayaŋ ki zəga nan pak waguloŋ lukutɗe baberɗe, nəviyan na iya net sədəv ɗerewel na zeŋgille ɓa. Amma wanənah aba Affu gəm abet maslayɗe net na, ɗii nawəŋ.

⁶Ɗəf məs də sləman napprəma say dəpprəm mogoni, an məs Əmpəs adawnah sit kretiyenɗe.

⁷Aver aza maslay net kretiyenɗe na Filadelfiya: Ɗəf məs təstəssə də goŋga tay də lakle na Davit avani, an akoluko, ɗəf tay naɓap wəmpan ɓa, an ampanəka ɗəf tay naɓap əkolən ɓa, amna:

⁸Nəsənək wəza nok məs kədaɗɗa, nəsənka istat də sembe suɗike, də as pak kəsbanək wəpel nawa, də goŋga kənan azawa. Nəkoluk madamba aboko, ɗəf tay naw ɓap wəmpan ɓa.

⁹Aŋki zəga məs nədawgəɗ sit ɗii na Satan, məs tepelkeɗi məɗəyən zit na Yahudiyenɗeŋ, mbaraka na Yahudiyenɗeŋ ɓa, wanəgəɗ sit dewle dəzoŋ gən wəkdukun takpret aboko də gakdokokun gəni. Wasənən na nəŋglukuko.

¹⁰Vi kəgak wəpel nawa də wəɓəsən, naw bo wanəguk sədəv pay na bonoy məs dədazan aka dələv pakə, vi kawsle ɗii naka dələv pakə.

¹¹Wanəde go'u, aga wən məs kərah lewlewi, vi ɗəf adawzəm sembe na wəza nok ɓa.

¹²Ɗəf məs dədayə wanəɗɗa dəsan gən ka dədəka nadəv gəla metiŋ naw zuliya* na Maŋgəlva nawa, agil na əmpa ɓa. Wanəver iya na Maŋgəlva naw akani, də iya na walaŋ gəla na Maŋgəlva nawa də iya na Zerusalem meleketeni məs dədaw priken sə disiŋ sə maŋgava Maŋgəlva nawa. Wanəver iya naw meleketen akani.

¹³Ɗəf məs də sləman say dəpprəm an Əmpəs adawnah sit kretiyenɗe.

¹⁴Aver wənnəŋ aza maslay net kretiyenɗe na Lawdikiya: Wən məs Amin məgəɗ saydawa də təstəssə də goŋga, ndəni slalway zəga məs Maŋgəlva azəməɗə, ndəni adawnah na:

¹⁵Nəsənək wəza noko, zay kənan ɓa, ya kaãh kənan ɓa'a. Nəŋgəl kətana kəsok gən zayə, walla kaãh.

¹⁶Vi kəsokuk adak təki gərəŋgə, zay kənan ɓa, ya kaãh kənan ɓa'a, wanəptekuk sə mawa.

¹⁷Yaŋ kəmna məs arya kənani, məgəɗ wəza mogon kənani, zəga tay dəmbər suk ɓa. Amma kəsənna adəv tattuwãh də wəzəm saha kənani ɓa, məs saha kənani, zuk mekeleŋ kənani, daŋgar kənani.

¹⁸Naw wanəppeteko, albah təbəs na meleŋge mədan də offo səvawa, kəsok gən məs arya. Albah lukut babara kugul gən azoko, dəɗamet gən wil na zuk mekeleŋ. Vas bo kəlbaah gən miya na hara ɗəffa kəɗa gən aroko kuwəl gəni.

¹⁹Ɗii məs nəŋgəl pak əntatə hayeti, əntat əsgaa siti. Vini asok də əŋgla nan wəzluk amkrok va offo, apan mambray noko.

²⁰Awla əntat ziwe amadamba, an ɗəf apprəmək wəllawa, akoluk madamba, wanətoŋ annanda, wanəzəm dəndən, nan bo wazəm də ina.

²¹Ɗii məs dədayaŋ ki wənnəska, wanəpsit tive nasuwa aka mazaŋga na məlĩ naw amaŋga vawa, va nawəŋka nədayək kini, nəsawək də Affuwa aka mazaŋga na məlĩ nani.

²²Ɗəf məs də sləmani, dəpprəm lewlewi an məs Əmpəs adawnah sit kretiyenɗe.