Read Gidar Hənhən 9 Bible Online

Hənhən 9 - Gidar bible

Hənhən 9

¹Yaŋ kəmpa maslay ma sle'et affon gozloro nani. Yaŋ nula ngərzla abət afuŋ sə disiŋ: Yaŋ məpsən lekile nawkol ma vov kpukpum məza meŋge nan ɓa.

²Ngərzla nak akoluk vov məza meŋge nan ɓanaka, yaŋ enene agulyoŋ diiɗa va enene sə mavoro. Paya də təki a disiŋ pak kiritkiriti vi enene məs də gulyoŋ sə vov neki.

³Yaŋ zaray agil sədəvət enene neki, aprikeŋ aka dəlva, yaŋ məpsit sembe naɗɗa zəga va hərziyeɗi,

⁴yaŋ mənah sit na adawkanən met aza kevile ɓa, ko azet wəleŋɗe ɓa, ko azet gaslembeɗ ɓa, ka aza zəga pak ɓa, say azet ɗii məs tahəŋ də tampoŋ na Maŋgəlva amirbizit ɓa kədaw haraŋ.

⁵Zaray nan bo, məpsəni tive nawbay ɗii ɓa, say də heretgin gap təla sle'i. Wəsiya na wəhar na met bo, tay va wəsiya na ma hərziya adasan ɗəffa.

⁶Adəv təla sle'əŋka, ɗii wakayanən əmta, amma arəhən na ɓa. Waɗumoŋ dəmtaŋ gəni, əmta bo wanzan faraɗa səzeti.

⁷Zaray nan tay va pəlseŋge məzu mbataŋ ama wəgaya, mətər kiya tayaket va mətər kiya na meleŋge, haret bo va haret ɗiiyi.

⁸Muhur kiyit bo va muhur kiyit gili, slayi bo va slayit ɓoliɗi.

⁹Baray taya makret va təbəssa, ɓaɓəlma persleket bo tay va ɓaɓəlma saret məs pəlseŋge adanzoŋ dəndən wəmbat ama wəgaya.

¹⁰Kuturit bo vanet hərziyeɗi, də kuturtiski məpsit sembe naw har ɗii hagap təla sle.

¹¹Məlĩ net tayi, maslay na vov kpukpum məza meŋge nan ɓa, (wəya nan də ma Yahudiyen na Abadon, də ma Grek bo Apolliyon. Va wənah na məzan zəga.)

¹²Wəzəm saha an dabəŋ atoŋko vaska, an məs dəpəl bo tay nazan dərɓaga as təl sula.

¹³Maslay ma slire'it affonək gozloro nani. Yaŋ nəpprəm wəla ɗəf klaka təkzləm təki nawtaw wəla zəga məɗɗan na meleŋge aba Maŋgəlva naka.

¹⁴Yaŋ adawnahsən maslay maslire'it məzərma gozloreɗ neki, apet maslayɗe poɗo məs minet gu'o də məlpa metiŋ na Efratis neki.

¹⁵Məppeti maslayɗe poɗo neki, azaɓanənək zit vi ler nani, də pay nani, də təla nani, də wəsva nani, vi kawzet ɗii zlaŋgataka na ma hoko'ən.

¹⁶Mərban suwi wəŋɗa net sozeɗ net dit pəlseŋge neti, tahəŋ dubu səkat sula (200,000,000).

¹⁷Adəv wəsine nawa: Nulek pəlseŋge dit ɗii neki, tahəŋ də lukutɗe azet peppreŋɗe va offo, kəram kəram va təki a disiŋ, va ma məlma, kiyit pəlseŋge net va kiyit ɓoliɗi. Yaŋ offo dit enene adawgulyoŋ səmet va offo muhurən.

¹⁸Bonoy as abeyik ɗii səka təkzləmən zlaŋgataka ma hoko'ən, bonoy nan ndəni: Offo, muhurən enene dit məs dəgil səmet pəlseŋge neki.

¹⁹Vi sembe net pəlseŋge net pak aza metti, də kutirti. Kuturit bo vit vanet dohoŋɗe, tahəŋ də kiiti, dəni adap sitin bonoy sit ɗii dənɗaŋ.

²⁰Ɗii məs dəmbraŋ bo, məs dəmtaŋ də bonoy as ɓa, dəppanən wəza net wəzulisən tuyeŋɗe, də Maŋgəlva maɓɓan məɗɗan də təbəs na meleŋge, də təbəs ne deleɗi, may məɗɗan də gərəm məzaɓən mogoni, gəm məɗɗan də wəlaŋga məzaɓən pakə, zəga məzulayi ɓa bo, məzapprəmi ɓa, məzu dawi ɓa pakə.

²¹Ko də tubiyaŋ aka wənnabay gəbay net ɓa, dəppanən wənna wəska helik net ɓa, də wənna wəɗɗa mana'a net də wəhal net ɓa.