Read Girawa Matiu 10 Bible Online

Matiu 10 - Girawa bible

Matiu 10

¹Jesu fune e vua fuone fievo tuero (12) ije kiamo bu rovoga fu daro fuone ije miae. Fu daro ije bu abena kavene ise kiaga bu e ije arena vadufuo ro e adame abevo ije amaeriadufuo ijene miae.

²Ro e vua fuone abe oenoevo tuero ive buone ije ijiege. Amure ije fu Saemoni e ije bu kua Fitano kuavo ijiakiro uviafuo e Aduru ijene kei. Areme fu e Zebedido anafa inokiro ino uviaki e Jemisikiro Joni ro e Firifikiro Batoromiu ije kei. Ro e Tomasikiro Matiu e ije takesi abeno ijiakiro e Arefiasedo fari Jemisikiro e Tadiasi ije kei.

³(null)

⁴Ro kuke Saemoni e ije bu kua Serotino kuavo ijiakiro Judiasi e ije bu kua Isikariotino kuavo e ije fu Jesu abe una e ise revo ije miaema ijene kei. E tuero ije bu usiae ime vaeva ijene

⁵Jesu fu e tuero e i fuone medufuo ijene kena are tire ijia uniana vua ijiege kuariamo bu vae. Fu kiae, Ja vakuva jade e Jiusi baki ijiebuo aesakae ijia vako ro kuke jade e Sameriakobuo sidove ijia bino aru vako.

⁶Ro ja vakuva nime e Isureroko ije bu mave-sifi igege sauina ka isema karinoevo ijiebuo are ijia vafo.

⁷Ni va bu kariva ijia vua ige kuariana kia, Maza ije Godi fu e fuone ijiebuo oe ije samuagiadufuo ije fune ivuaremano kiafo.

⁸Ja va vua ije kuariakinu ro e adagi ije amaeria bu una madiakinu ro e oevo ije kiaga bu una urifo. Ro kuke ni e ije bu adame reforasi abevo ije amaeria bu una madiafo. Ro e ije bu kavene ise ijiebe nirokiaeva ijene kuriaerena kiaga bu e ije arena usiae vafo. Ro igia fie, daro none ige na vajiaeva ije ja monido fuaevena keva baki. Ijadufuo irere ja va renoevo ije jade una ve ijadufuo ire bino kekuae vierafevo.

⁹Ro kuke igia fie, jade ire gorodi ro siriva ro moni kavuane bino kedena oenoejo.

¹⁰Ro kamui ije jade kena oenoejo ro nime ugone ja savo ijiakiro dia suri ja savo ro mudu ja bijuanoejo ijiaru kena oenoefo. Ijadufuo maeje irere boeje e imenoejo bu kedufuo ije bu e ije bu ifejiavo ijiebe ja samuagiakinu ifejiake.

¹¹Ro kuke igia fie, ja oenoena sidove mamekanu bino ijia vaga erare fu ja oemarejiakinu kaenamiavoga ni ijia fuina karifo. Ja ijia karina areme nine are ije arena vafo.

¹²Ro ja gire be ijia ajiakuva ni e ijia kariva ije mukoreigia anadiana oemarejiafo.

¹³Ro ja ijia ajia vaga bu ja oemarejiakinu kaenamiaga ni ifejiana baname isoena Godi kuaga fu bu samuagiafo. Ro bu naebe ijiege ja oemarejiana kaenamiaga jade baname isoena Godi kuaga fu bu samuagiamo.

¹⁴Ja maziena are tire ijia oenoega e bu naebe ja oemarejiana kaenamiakinu vua jone fiekuva ni are ro sidove ije arena vafo. Ro kuke ni uri dia suri jone ja savo ije azona kuokuo ije kaniakaniama areme ni are ije arena vafo.

¹⁵Ro vua ige naka ma kuariave, Maza radekuma ije Godi fu una ume igia e ise renoevo ije kena mazie giakuma ijia are Sodomekiro Gomora ije fume sibaneke kena isekafiake. Ro una e ije erarebe bu ja ijuoegafiavo ije fuka kame vame ise ijia isekafiaga bu isejavaeke. Irufui binobino ruovo ijene

¹⁶Ro igia fie, jaeje na ume kukoruko igege kena e ise siroe kuriae e sakiavo igeki uve ijia uniaga ja vake. Ijadufuo ja va i menoekuva ni mukoreigia jone samuanamikinu oe vafaena kabuaekabuaeki i jone ma ijiaru menoefo. Ro jade uri bijaekinu ro ire ise bino rega bu ijadufuo ja kame isekafiavo.

¹⁷Ro ja oenoekuva ni e ije mukoe giakinu oenoefo. E ije buka oenoene ja toenamiana kame e koto fievo ijiebuo vadufuo. Ro kuke buka e Jiusibuo are isesina bu vua kuaevo guove ijia ifiadufuo.

¹⁸Ro kuke ja noefuo i menoevo ijadufuo buka ja toenamia kame e kini bino ro e Romukobuo e mamekanu ijiebuo vadufuo. Bu kaenamia ijia vaga ja e mamekanu ije abero e Jiusi baki ijiebuo nidua ijia irena Godido vua maeje kuariadufuo.

¹⁹Bu ja ijiege toenamiana kaenamia vaga jade uri oeseradiavo. Ro kuke jade vua irere ja bu kuariadufuo ije ro kuke izege ja kuariakuva ijadufuo oefiane abevo. Ja maza ijieki ije biediavo ijia vua irere ja una bu kuariadufuo ije ja jare vierafekuva baki. Ro vua ije fu Asoe jone ijadufuo Kavene Akae ijare vierafejiaga ja kuariadufuo.

²⁰(null)

²¹Ro vakuma maza ijieki ije abekuma e buka uri uviarafa ro anafa buone ije korubuo kena una forisi vajiaga bu kania bu oeke. Ro kuke ame ije bu una kuderia orafa buone ije korubuo sikiaga forisi bu va kania bu oeke.

²²Ja noefuo imevo ijadufuo e boeje buka ja ziegafiadufuo. Rove erarebe bu uria giriesa faememarena noefuo imena vakuma ubine ijia usiaevo e ije Godi fu karauniake.

²³Ro kuke ja sidove be ijia vaga e bu ja kaniakinu vame ise bino jone rekuva ni sidove ije arena una be ijia vafo. Ro igia fie, sidove boeje are Isurero guove ijia karinoeva ije gue vua none ja naebe abe kuaria furiva ijia Ema ijiebuo Fari ige na una ruakono kiae.

²⁴Jesu fu ijiege kuaria vakuma kia, E ije fu sikuru remo ije fu e fuone fu nijaemo ije asima baki. Ro kuke e monifuo imeno baki ije fu e ireobo fuone ije asima baki.

²⁵Ijadufuo e ije fu sikuru remo ijiakiro e ije fu monifuo imeno baki ije bu e mamekanu buone matiana buenina kenoevo ije fune marei. Ro igia fie, e ije na bu kie aeje a Setani e kavene ise ijiebuo e ireobono kieve. Rove naeje nane ma E Ireobo jone. Ijadufuo bu na dabe ijiege kiekuva na vierafega e none ije jaeje bu kame ive ma omeise ijia imiadufuo. E ije ja jumedufuo ijene

²⁶Ijadufuo e ise bu ire ise binobino jone rega jade giana jumevo. Ijadufuo maeje vame ise buone boeje binobino bu mauike nuriete renoejo ije rade Godi fu kena una e boeje ijiebuo niome ijia samadirega bu giake.

²⁷Ro vua irere na mugu kuariavo ije ni jase maza ijia usiaena dabe e boeje kuariafo. Ro vua irere no mauike nuvuosukua kuaenoeva ije nika abe usiaena are irore boegia kuaria vafo.

²⁸Ro jade e ije bu kavene jone bu bakiro bume vajae surive jone ijiaru kaniakuvejo ije giana jumevo. Ro e ije ja jumedufuo ije nika Godi ije fu surive abero kavene jone ije kena miane ije maza boeje naevako ijia korega ja naona bakiredufuo ijene jumefo.

²⁹Ro igia fie, e bu ume isesina gue kena una e guebuo fuaevekuva buka moni isesina bino kedufuo. Ijiegero Godi Asoe jone ije fu fuone vierafema ijia fu ire ka isesina ijieki ije fu ijuoegafiamo baki ro fuka oetuakinu samuagiamo.

³⁰Ro kuke nigofo u jone besubesu bu ijia ireva ije Godi fune vierafe.

³¹Ro ume isesina ijiakiro nigofo u ije buka ire isesina rove Godi fune fuone vierafema ijia ire ije fu uria mukoe samuagiame. Ro jadua jaka Godido ire anuigi fu oetuakinu mukoreigia samuagiamo ijadufuo jade jumevo.

³²Ro erare fu e niome ijia oenoekinu kuae nana Jesudo aganeno kuaemo ije nase saove ijia Asoe none ije kuako e ije fu e noneno kuake.

³³Ro erare fu e niome ijia na ijuonemo ije nase saove ijia Asoe none ijadufuo nidua ijia kuako e ije fu e none bakino kuakono kiae. Godi amure vierafero ire bino ije rade vierafedufuo ijene

³⁴Jesu fu ijiege kuaria areme kiae, Umeigia na ruaeva ije na e ige kaenamia una besu afuikiro ruaeva bakiro na e ige dabe atakiro ruae. Na e dabe ataga e gue bu na iriniena una none ruakiro gue buka na ijuoegafieke. Bu ijiege rena fari fu uri asoe fuone ziegafake ro kabae fu uri asie fuone ziegafake. Ro kuke asaefuo fu uri asaefuo ziegafake.

³⁵

³⁶Ro e gariebure bume vajae fiane sibaneke vajiadufuo. Ro e ije bu vajae fiane ma uruvana vajadufuo ije buneka e aena gire besu karijo ijiebe a dabe arafiraga a isejavaeke.

³⁷Ro kuke e be erare fu asoe ro asie ro fari ro kabae fuone ijene uruke oetuagaro na fume sibaneke oetuamo ije fu izege kuaeko nana Jesudo aganeno kuaeke.

³⁸Ro erare fu naebe na oetuana uri makae none ijia nuvediena isejavaenoeno e ije fuka naebe manido fu e vua none fiemo reke.

³⁹Ro erare fu ume igia maza boeje fuone vierafema ije oetuakinu kenoeno ije rade fu una izege vame ma fivako ije abekuma baki. Ro erare fu ume igia maza boeje fuone ma fivadufuo ije fuka toteganaro una e gue vierafekinu oetuana ifejianoeno e ije fu rade vame ma karivako ije abeke. Ire maeje saove ijia kedufuo ijene

⁴⁰Ro igia fie, erare fu ja oemarekinu kaenamiamo ije fu kuke na oemarekinu mesirieme. Ro erare fu na oemarekinu mesiriemo ije fu kuke e ije fu kiemo na ruaeva ije oemarekinu mesirime.

⁴¹Ro kuke erare fu e ije Godido vua vierafena kuaevo ije mukoreigia giana oemarekinu kaenamiana samuagiamo ije fune mare. Fu ijiege remo ijadufuo fu ire maeje Godi fu e fuone vajiamo ije gue kedufuo. Ro kuke erare fu e ije Godido vame ma ijiaru kenoeno ije mukoreigia gana oemarekinu mesirina samuamo ije fune mare. Fu ijiege remo ijadufuo fu ire maeje Godi fu e fuone vajiamo ije gue kedufuo.

⁴²Ro igia fie, e be erare fu vierafero jaeje ja e vua none fievo ijero fu uri ire isesina bino ifejiamo ije Godire rade vame ma bino fuone rekono kiae.