Read Girawa Matiu 11 Bible Online

Matiu 11 - Girawa bible

Matiu 11

¹Jesu fune e vua fuone fievo ije vua ijiege nijasiama areme fune uri aesakae Gareri guove are isesina ijia oenoekinu e ijene vua maeje abe nijasiakinu kuarianoe.

²Fu ijiege renoekoga Joni fu dibure ijia fina Kuraesi irere fu renoeno ije fie. Ijadufuo fune uri e vua fuone fievo gue kiamo bu Jesu kuagakuae vae.

³Bune vakuma fu fino ijia usiaena kuae, Aeje a e ije Godi fu kua fu ruakono kuaema ije ke a bakido no una e be samuakono kuae?

⁴Bu ijiege Jesu kuaravoga fu kiae, Nine una va Joni irere boeje ja fiekinu giaeva ijene kuarafo.

⁵Ro ni kua e ije bu ni kuzeva ije bune una ni nafaekinu ro e aekirariaeva ije bune una uri oenoeve. Ro e ije bu adame reforasi abeva ije bune una madiakoke e ada bijuki ije bune una vua fievono kuafo. Ro kuke kua e ije bu oeva ije bune una urikoke e iseki ije bune Godido vua maeje fieve.

⁶Ro kuke erare fu ire ige na renoejo ije fu naebe giana totenami ro fume zinune na ma vierafemo ije funika oemareno kiae.

⁷Jesu fu e Jonido vua fievo ije ijiege kuariamo bune vakoga fu una dakude e boeje bu afuiva ijene Jonisina kuariae. Fu kiae, Ja Joni fu are sao ijia oenoeno ja fiena usiae vaeva ije ja irere ije gakuae vae? Jabite e garuki be fu majaufi nubuane nijamo igeki ja ije gakuae vae. Ke, ja irere ijia gakuae vaeva ni kuarie na fiefo. Ro baga na vierafe jate ja e be fu ugone ni mukore sana ijia oenoeno ja ije gakuae vae. Na vierafe ije fu baki ijadufuo maeje e ijiege ugone mukore savo ije bu e mamekanu aesakae samuavo ijiebuo are maeje ijia karijo.

⁹Ro ja vaeva ije ja irere gakuae vae? Ja e Godido vua vierafena kuaemo ije gakuae vae ke ja era gakuae usiae vae? Ni kuarie na fiefo. Ke, na vierafe e ije ja gakuae vaeva ije fuje fu ma e anuigi. Fure e Godido vua vierafena kuaevo ije fu ma asidiae.

¹⁰Ijadufuo maeje Godi fune isuibe buki akae ije bu isoeva ijia fu e Jonido ijiege kuae,Na e vua none abe oenoeno be kuaga fu ude vuake. Fure ude vame one ije amaeria vakono kuae.

¹¹Ro vua ige naka ma kuariavo fiefo. E mamekanu gue bu ude kari ruaeva ije bu Joni e do ruoriamo ijieki baki. Ro fune Jonire e anuigi ume igeko ije ma asidiae. Rove e ije erare fu Godi e ije fu oe buone ije samuagiamo ijiebuo uve ijia una e isekube remo e ijare fuka Joni ma asi.

¹²Ro maza ije Joni fu uri zinuivena Godido vua maeje fu abe kuariaema ijia ruoma iviama ige Godido e ije fu samuagiamo ije buneka ma e uruvana reve. E uruvana bune ise bu renoevo ije arena una Godi e ije fu oe buone samuagiamo ijena maziekuae buka giriesave.

¹³Ro maza ije e Godido vua vierafena kuaevo bu kariva ijia ruoma e Mosisido akae bu iko abeva ijia e ije buka karina maza ije Godi fu veze e fuone ijiebuo oe ijia samuagiadufuo ijene dabe karina kuaenoe. Bu vua ije dabe ijiege karina kuaena ruoma Joni e do ruoriamo ijadufuo maza ijia usiae.

¹⁴Ro ja vua buone ije jane ma vierafekuae samuaejoga na vierafe e Joni ja gaeva ijeja fu e Eraeja. Fu e ije bu kuae fu ruakono kuaeva ijene.

¹⁵Ijadufuo ja adanekikuva ni vua ige mukoreigia fiena ma vierafefo.

¹⁶Ro na be bijana kuariako ni fiefo. E ige iviama karina vua maeje naebe mukoe fievo ije buka ame isesina ige bu are ije e uruvana bu afuina ire fuaevejo ijia afuivo ijieki.

¹⁷Ame isesina gue bu una gue kia, No joefuo zae vajaejia rove ja naebe dua uruve. Ro no sise bijaejiave rove ja naebe oefiane abena niraevono kiavo bu ijieki.

¹⁸E mamekanu jone ije budua buka karina ijiege reve. Bu Joni fu maza bino ire atokinu ro do kugi naebe ikinu ro kuke maza ije fu uri Godido vua maeje abe kuariamone bu gana buka ijuoneve. Bu kuae, E ije fuka kavene ise ijare niroemano kuae.

¹⁹Ro una Ema ijiebuo Fari ige na keke ire ikinu do vuaeni ivone bu una kuke ijene ijuoneve. Bu ijuonena kuaevo, Jame e guraeje gafo, fu ire boeje funeka abe i furina uri do vuaeni uibe ino gafo. Ro kuke fuka e ije takesi abenoevo ijiakiro e ise revo ijena kaikaranoeno kuaeve. Rove igia fie, e ma vierafevo ije bu Joni i irere fu menoeno ro na renoevo ije bune guona vierafei. Bu vierafe Godi irere fu vierafena remo ije fune mukoreigia remoro bu ijiege vierafevono kiae. E ije bu ise buone ijia naebe oe kuderiavo ijene

²⁰Ijadufuo Jesu fu ve ijia urina sidove bino fu ude oenoekinu vame sumiki boeje e ijiebuo nidua ijia renoema ijene kame isekafiakiro buesina kuae. Ijadufuo maeje e ijia kariva ije bu ire ise bu revo ije bu naebe arena una oe kuderiana fu ma vierafei.

²¹Ijadufuo fu uri e ije kiae, E ije are Korazikiro Besaeda kariva ije na vierafe ire ka ma ise be fu jone rekono nika jumefo. Ja vame sumiki na nidua jone ijia renoeva ije na una e are Taeakiro Saedoni kariva ijiebuo revabitie e ije buka una ise buone ijadufuo oefiane abedufuo. Bu oefiane abena niraena ire atoga e bu ijia giana vierafero bune una oe kuderiaevaro bu ijiege vierafeke.

²²Ro vua ige naka ma kuariavo fiefo, Vakuma rade maza ije Godi fu una e umeigia ise revo ije kena isekafiamo ijia e are Taeakiro Saedoni kariva ije fume sibaneke isekafiake. Ro una e ije are Besaedakiro Korazi kariva ije ja fuka kame vame ma ise ijia isekafiadufuo.

²³Ro e Kafoniamuko jaeje jade vierafero Godi fu ja fuka kena aroriana kame kave gufia uniakiro jade ijiege vierafevo. Jaeje Godi fuka kame una are ise miane naeno ijia koredufuo. Ja vame sumiki ije na ni jone ijia renoevo ja gieva ije na ude e are Sodome kariva ijia revabitie e ije bune isuibe oe kuderiaevado Godi fube ude bu kena isekafiaema ijiege isekafiake.

²⁴Ro igia fie, rade maza ije Godi fu e boegiebuo ise fu kena mazie giamo ijia fu e are Sodome kariva ije fume kena sibaneke isekafiake. Ro una e Kafoniamuko ije jaeje fuka kena vame ma ise ijia isekafiakono kiae. Jesu fu una Asoe fuone ijadufuo oemarema ijene

²⁵Jesu fu ve ijia ijiege kuariama areme una dakude Asoefuo baname isoena kuae, Godi Asoeno, aesakae igiakiro saove gufe samuamo naka ireobo one oemareve. Ijadufuo maeje a e ije bu umeigia vua mukoe vierafena kenoejo ije vua maeje a izege ire binobino remo ije aka kena bu nisauikuriae. A bu ijiege regaro vua maeje aka dabe una e isesina ije bu vierafe isesina keva ije samadirejiae.

²⁶Ijadufuo Asoeno vame ijiege a vierafena kema ije ane one izege a kekiro vierafema a ijia kemano kuae.

²⁷Jesu fu ijiege baname isoema areme una e ije kiae, Ire boeje na vierafekinu renoevo ije fune Asoe none ijare kuariema na ijia renoeve. Rove fu erare na mukoreigia giena vierafekuma baki. Ro fune Asoe none ijare fuosukua na fune vierafe. Ro kuke fu erare Asoe none ije gana vierafema baki ro nane Fari fuone ige nare nosukua fu gana vierafe. Ro na kono era na vierafekuva na e ije ifejaga bu Asoe none ije mukoreigia gana vierafekono kiae.

²⁸Jesu fu ijiege kuariama areme kiae, Erare fu irufui uruvana abenoeko funeka aemaevoga ni una none roga nare dasumane.

²⁹Na vierafe naka ja samuagiakiro vierafe ijadufuo ni una agane none na samuagiavo ijena maziefo. Ro ni none roga na vame none maeje nijasiafo. Ijadufuo maeje nanaka e oe soegi ro kuke naka kabuaekabuaeki kenoejo. Ja naena maziekuva kavene jone bu dasu karidufuo.

³⁰Ijadufuo maeje vame none ije fuka mukore ro i ije ja menoedufuo na vajiavo ije fuka gikikimana baki.