Read Girawa Matiu 20 Bible Online

Matiu 20 - Girawa bible

Matiu 20

¹Ijadufuo e ije Godi fu oe buone ije samuagiamo ije fu e juare koeki ije fu suoke mugamia kekena va e kiaga bu fuefuo imejake fu moni vajiakuma igeki.

²Ijadufuo e ije fu vierafe fuka e bino kega bu fuefuo imeke. Ijadufuo fune va e ije kiae, Ja mazani besu noefuo imekuva na e besubesu moni sunine bino enafu vajiakono kiae. Fu ijiege kiamo bune oemarena juare fuone ijia imekuae vae.

³Bune vakoga fune maza ajia ruaema ijia una kuke are bu ire fuaevejo ijia vaga e gue bu ijia irenoevo fu giae.

⁴Ijadufuo fu kekena kiae, Na vierafe jadua ja va juare none ijia imeke na moni besu enafu vajiano kiae.

⁵Fu ijiege kuariamo bune vako fu una maza uvuoka ijia ro mufuo ijia fu una e bino duaku kemo bu fuefuo imekuae vae.

⁶Fu una va fina vakuma maza fune kokuveno ijia una vaga e gue bu ijia irenoevo fu giae. Fu giana uri kiae, Ja irerefuo maza ige dabe nisena jame igia irenoevono kiae.

⁷Fu ijiege kiamoga bu una gue kuae, No e bino bu naebe no buefuo imedufuo kueva ijadufuo no ijene irevano kuae. Ijadufuo fu urina kiae, Na vierafe nine jadua va kofu juare none ijia imeno kiae.

⁸Areme ve fune musiremoga e ije juare koeki ije fune uri e ireobo fuone fu e imejo ije samuagiamo ijene kuae, E ije imevo ije kume bu roga ni moni buone ije vajiane. Ro moni a vajiakuma ni e ije erarebe bu rade vaeva ijia zinuivena vajiaja vakuma amure vaeva ijia furino kuae.

⁹Ijadufuo e ije rade maza kokuveno ijia imekuae vaeva ije bune i buone bu meva ijadufuo moni sunine buone abei.

¹⁰Ro e ije bu ude imekuae vaeva ije bu vierafero buka bure suoke zinuivena imena ruaedo bu moni sunine sibaneke ireobo abekuae bu ijiege vierafei. Rove e besubesu funeka moni sunine ni besu ijiaru abei.

¹¹Bu moni buone abe areme rade e ije bune una e juare koeki ijena zienami.

¹²Bu urina kuae, E gure a rade kiaema ije bume maza isekube imei. Ro noeje noka suoke ijia zinuivena ruako maza kanue. Ro a irerefuo moni noeje a e ije bu rade ruaeva ijena besu enafu vajuemano kuae?

¹³Bu ijiege kuaravoga e juare koeki ije fu urina e ije vua kuaemo ije kuae, Kaino nana ja biesiraeva baki. Ro vua irere na ja kuariaeva ije nane ijiege rena moni jone ije vajiave.

¹⁴Na vierafe naka e ije bu rade imeva ijene moni izege na ja vajiavo ijiege una bu vajiakiro vierafe. Ijadufuo ni moni jone ige kena vafo.

¹⁵Ijadufuo maeje moni ije fu none ijadufuo na daro nado na kena izege na vierafeva ijia reke. Ro a ziemo ije abite ige na e vajuki rena moni enafu vajiaeva a ijadufuo ziemono kuae.

¹⁶Jesu fu vua ijiege kuaria furikiro kiae, Vame besu ijiege e ije bu rane gamia ruovo ije ve be bu una ude vake. Ro e ije bu ude vako ije ve be bu una rane gamia ruakono kiae. Jesu fu una kuke fu baronedufuo ije kuariaema ijene

¹⁷Jesu fu e vua fuone fievo tuero (12) ijena bune Jerusareme vakuae vako ijia fu e bu Jerusareme ijia fu dabe izege redufuo ijene mauike kuariae.

¹⁸Fu kiae, Igia fie, no vakuma Jerusareme usiaevo ijia Ema ijiebuo Fari ige naeje bu dabe e zinone ifaejevo ijiebuo e mamekanu ijiakina e vua akae nijasiavo ije miake. Areme e ije bu vua ise noesina kuaekinu na dabe kaniedufuo kuaeke.

¹⁹E ijiebe na dabe una e Jiusi baki ije miaga bure na abe uti ifaejena vi ufemadiekinu ifiema areme na dabe kurosi kanieke. Ro mu inokubeke furikuma Godi fu kiega na una urina ni uria fivakono kiae. Bara be fu Jesu ire befuo kuaema ijene

²⁰Areme rade e Zebedido bara ijare farirafa fuone ijena Jesu fino ijia vae. Bara ije fu ire be vierafema ijadufuo fu va Jesu manino niome ijia augesana uri ire befuo kuarae.

²¹Fu ijiege kuamoga Jesu fu urina kuae, Ro ire a vierafema ije a irere ijene vierafemano kuae? Ijadufuo bara ije fu una gue kuae, E Ireobo a isekie, na vierafe maza ije a una E Ireobo rena Godido e ije samuagiakiro ruomo ijia ame fari none inokiro ige be fu umui one maeneke ijia fikiro be fu aeneke ijia fino kuae.

²²Areme Jesu fu una kiae, Vua ije ja kuarievo ije ja naebe mukoe vierafe ro jame ijia kuarieve. Ja vierafero vajae fiane ige na abekuvejo ije jane manido jadua ja ijiege abekuae ja ije vierafevano kiae? Fu ijiege kuariamoga bu una gue kuae, No vierafe no manido no rekono kuae.

²³Areme Jesu fu una kiae, Ire ije e bu none rega na isejavaekuvejo ije na vierafe jadua bu ijiege jone rega ja isejavaeke. Ro igia fie, e ije bu are umui none maeneke ro aeneke ijia karidufuo ije ja kuarievo ije nare rekuva baki. Ro are ije fu Asoe none ijare e ije fu kemo ijiebuo amaerijiamono kiae.

²⁴Ijadufuo ve ijia e Jesudo vua fievo gue bu vua ije fievo buka defarudiamo bu urina ino uviaki ije ziegafiae.

²⁵Ijadufuo Jesu fu urina e vua fuone fievo boeje kiamo bu besu afuivoga fu kiae, E Jiusi baki ijiebuo e mamekanu ije bu daro buone ijia e buone samuagiavo. Ro kuke e aeko ijiebuo e mamekanu ije bu daro buone ijia e aeko buone ije samuagiavo.

²⁶Ro igia fie, jaeje jade vame ije bu kevo ijiege kenoevo. Erare fu uve jone ijia e anuigi rekiro vierafekuma e ije fuka una joefuo imedufuo. Ro erare fu e nigofo rekiro vierafekuma e ije funika una joefuo imedufuo. Ijiege ro Ema ijiebuo Fari ige na ruaeva ije na e ireobo rekiro ruaeva baki. Ro name e be fu e befuo imeno na ijiege rekiro ruae. Ro kuke na ruaeva ije na kurosi ijia baronena kavuane none ijia usiaena e boeje karauniakiro ruae. Jesu e ni kuzeki inokiro karauniaema ijene

²⁹Areme Jesu fune e vua fuone fievo ijena are Jeriko arena vakoga e ka uruvana bu usiaena bu nuvediae.

³⁰Ro e ni kuzeki inokiro bu vame irifo ijia karido bu fieke Jesu fu ijia asidiana ruvako bu fie. Ijadufuo bu uri kumei, E Ireobo, e Devido uifari gare, a isekie ni no guona oe fiane abena ifejuono kumei.

³¹Bu ijiege karina kumevoga e ijia ruovo ije buka urina kuriaerena vafiae. Rove e inokiro ije buka una urukeigia vijena kumei, E Ireobo, e Devidido uifari gare, a isekie ni no guona oe fiane abena ifejuono kumei.

³²Ijadufuo Jesu fu vako ije fu ijia arena uri kiae, Ja vierafe na irere joefuo rekiro ja ije vierafevano kiae?

³³Fu ijiege kiamoga bu una gue kuae, E Ireobo no vierafe a ni nuvuone ige amaeriajuoga no una ni nafaeno kuae.

³⁴Areme Jesu fu vua ije bu kumevo ije fiena fuka una buone oefiane abei. Ijadufuo fune uri ni buone ijia niriakiamoga bu ve ijia una ni nafae. Areme e inokiro ije buka ireobo oemadiamoga bu uri fu nuvena vae.