Read Girawa Matiu 26 Bible Online

Matiu 26 - Girawa bible

Matiu 26

¹Jesu fu vua boeje ijiege kuariama furi areme una e vua fuone fievo ije kiae, Maza ije e Jiusi bu iro Fasova bu idufuo ije fune mu inokiro namo ije jane vierafe. Ijadufuo igia fie, maza ijia Ema ijiebuo Fari ige na bu abena e ani ije miaga bu dabe kurosi ijia kaniekono kiae.

²(null)

³Jesu fu ijiege kuariakoga maza besu ijia e Godido zinone ifaejevo ijiebuo e mamekanu ijiakina e Jiusibuo e mamekanu gue bune e Godido zinone ifaejevo ijiebuo e ireobo e Kaefasido are ijia afui.

⁴Bu ijia afuina mauike nuriete izege bu Jesu kanadufuo ijene kuae. Bu kuae, No Jesu kanakuva nobe maza ije no iro ivo ijia kanake. Ijadufuo maeje e igia ruaeva ije buka defarudiakuva buka urina noena bijaekono kuae. Bara ijare ire ma mukore Jesudo reima ijene

⁵(null)

⁶Areme maza be Jesu fune are Beteni e Saemoni e ije ire tatie igeki ije abena una maema ijadufuo are ijia fine.

⁷Jesu fu ijia fino ijia bara be fu ire udi mukore urimo bu kena moni mamekanu fuaevevo ije be sukore ijia usiama abena fu fino ijia ruae. Fu ijia keke gake Jesu fu ire inoga bara ije fu ire ije dabe nigofo fuone ijia usiae.

⁸Rove e vua fuone fievo bu ire ije fu remo ije gavo buka isediae. Ijadufuo bu una bue kuae, Bara ije fu irerefuo ire maeje dabe niseme? Funika arekina fu abe fuaevena moni ireobo abena una e sinuome baki ije vajiakido fu aremano kuae.

⁹(null)

¹⁰Bu ijiege kuaevoga Jesu fune giana uri kiae, Ja irerefuo bara guradufuo vierafe ijene dabe arifirijave. Na vierafe ire ije fure rema ije fuka ire mukore ije noefuo rei.

¹¹Ijadufuo maeje e ije sinuome baki ije bu maza boeje uria jaena igia karinoeke. Ro naeje na vierafe nabe maza boeje uria jaena igia finoedufuo.

¹²Ro fu irerefuo ire udi mukore urimo ige abe na usiaejiema ije fu vierafe fuka uria ige na naebe mako ariva ijia abe usiaejiena amaeriekiro fu ije vierafe.

¹³Ro vua ige naka ma kuariave, e bu vua maege abe are irore igia kuaenoevo ijia bu bara ige irere fu rema ije vierafekono kiae.

¹⁴Areme e tuero Jesudo vua fievo ijia e be ive fuone ije Judasi Isikarioti ije fune e zinone ifaejevo ijiebuo e mamekanu ije kariva ijia vae.

¹⁵Fune va ijia kekena kiae, Ja vierafe na Jesu abe una ja miakuva ja irere abe na miekono kiae? Judasi fu ijiege kuariamoga bune urina moni sunine teti (30) ijiege karana vajae. Areme fune ve ijia urina vame izege fu Jesu abe miaga bu kanadufuo ije rerenoe. Jesu e vua fuone fievo ijena ire radekuma ije ima ijene

¹⁶(null)

¹⁷Areme maza ije bu burete ire isiti baki ifaejevo ijadufuo maza amure ije bu zinuivena ire idufuo ije fune ruae. Ijadufuo e ije Jesudo vua fievo ije bune usiaena Jesu kuae, A vierafe no izia oefuo ire kanafuiga a iro Fasova ije ikono kuae.

¹⁸Bu ijiege kuaravoga Jesu fu una kiae, Ni va Jerusareme ijia aruna e be fu na vierafema fu ijia fino ije gafo. Ja e ije gakuva ni kua, E Ireobo ije fu kume, Mazani none fune ivuareme. Ijadufuo na vierafe na e vua none fievo ijena are one ijia iro Fasova ije ikiro vierafevano kuano kiae.

¹⁹Ijadufuo bune va gafia usiaena vua irere boeje Jesu fu kuariaema ijia nuvena iro Fasova bu idufuo ijene kanafui.

²⁰Areme ve fune musiremoga Jesu fune e tuero (12) vua fuone fievo ijena fata irifo ijia kari ufuaenoena areme ire i.

²¹Bu karina ire ivo ijia Jesu fu urina kiae, Vua ige naka ma kuariave. E ige ja naena kariva ijia e be fu na abena una e ani ije miaga bu kanie na baronekono kiae.

²²Jesu fu ijiege kuariamoga e vua fuone fievo ije bu vua ije fievo buka oefiadiae. Ijadufuo e besubesu bu uri zinuevena Jesu kuae, E Ireobo a vierafega nabite nare ijiege reke ke na bakino kuae.

²³Bu ijiege Jesu kuaravoga fu una kiae, Ja gaga erare burete fuone ije abena nosiki disi guria abiemo e ijare na abena una e ani ije miake.

²⁴Ema ijiebuo Fari ige naeje na bu dabe izege bu buki akae ijia noesina isoena kuaeva ijiege rena kaniega na baroneke. Rove igia fie, e ije erare na abena una e ani ije miamo ije fu iseko. Ijadufuo maeje Godi fuka e ije dabe vame ise ijia isekafake. Ro kuke asie fuone fu naebe e ije bietevabitie ije fune marekono kiae.

²⁵Jesu fu ijiege kuariamoga Judasi e ije Jesu abe una e ani ije miadufuo ije fu uri Jesu kuae, E Ireobo, a vierafega e ije na nareno kuae. Ro Jesu fu una gue kuae, Ke ije na vierafe ire ije are rekono kuae.

²⁶Areme bu uria karina ire ivo ijia Jesu fu urina burete abe Godido baname isoena oemarei. Areme fu abe tuasena ke e vua fuone fievo ije vajiakinu kiae, Burete ige na kena vajiavo ije fu vajae surive none igeki ijadufuo ni kena ino kiae.

²⁷Areme fu kuke una kafusi ije abena Godido baname isoena oemare. Areme fu abena miakinu kiae, Do vuaeni ige na vesena abe miavo ije fu kavuane none igeki ijadufuo ni abe ifo. Ijadufuo maeje Godire kavuane none ijadufuo duvado ijia e boeje ijiebuo ise ije giana areke. Ro ise ije fu giana aremo ijia fu vame iviaeko ije amaerike.

²⁸(null)

²⁹Ro igia fie, naeje na iviama igia una gafege nabe una jaena do vuaeni ige ike. Ro na sone vakuma rade Godido are maeje ijia jaena ikono kiae.

³⁰Jesu fu ijiege kuariama furi areme bune uri dua urukinu usiaena uruo Orivi kuavo ijia vae. Jesu fu Fitado kuariaema ijene

³¹Bu vakuma ijia usiaevoga Jesu fu urina kiae, Ivia muge e boege jaka subinae vagana na ja ijia arena vake. Ijadufuo maeje bune buki akae ijia ijiege isoena kuae.Bu e ije mave-sifi samuagiamo ije kanaga mave-sifi fuone bu dabe giegisana vakono kuae.

³²Ro rade Godi fu kiega na una uri areme na ude Gareri vake ja rade vuakono kiae.

³³Jesu fu ijiege kuariamoga Fita fu una kuae, E Ireobo, na vierafe bu e gue ijiebe a nujana subinae vakiro naeje nabe a nujana kovakono kuae.

³⁴Rove Jesu fu una kuae, Fita, vua ige naka ma kuaravono ni mukoe fiene. Ivia muge kukoruko fu naebe kumema ijia e bu noefuo kuakuva aka feke. A maza inokubeke fena kiako, Na e ije naka naebe vierafevano kiake kukoruko fu ijia kumekono kuae.

³⁵Jesu fu ijiege kuaramoga Fita fu una kuae, Na vierafe bu kieko a e fuone beno kiekuva nabe feke. Ijadufuo maeje na vierafe naeje naneka osiki baronekiro samuaevano kuae. Fita fu ijiege kuaramoga e Jesudo vua fievo ije budua buka urina vua besu ijiege Jesu kuarae. Jesu fu are Gesemeni kuavo ijia baname isoema ijene

³⁶Areme Jesu fune e vua fuone fievo ijena are Gesemenino kuavo ijia vae. Bu va ijia usiae areme Jesu fune urina e vua fuone fievo ije kiae, Jani igia karike na va gafia baname isoeno kiae.

³⁷Areme fune urina e inokubeke Fitakina e Zebedido anafa inokiro e Jemisikiro Joni ijene kaenamiana fuina vae. Ro Jesu fuka urukeigia oefiae ro kuke fuka ma urukeigia oeserei.

³⁸Ijadufuo fu urina kiae, Na oe none ige funeka ma urukeigia oefiadiedo na nabite na baronedufuo. Ijadufuo janika igia karina na samuagieno kiae.

³⁹Fu ijiege kuaria areme fune fuosukua sibaneke biona mumabo ijia tuana sakaedo ijia dijena baname isoe. Fu baname isoena kuae, Ate, asoeno, a vierafe fune marekuma ni vajae fiane ige na abekuvejo ije abe bio najane. Ro baga ni one vierafema ijia reno kuae.

⁴⁰Jesu fu ijiege baname isoema furi areme una ruogake e vua fuone fievo inokubeke ije bune ninaoe. Ijadufuo fu uri Fita kuae, Fita, ja irerefuo ni naove? Ja irerefuo ja naebe maza aokube uri ni nafaena naena karive?

⁴¹Urina kojo samuanakinu baname isoekina kavene ise Setani fu ja biesiriakuma jabe mamoeke. Na vierafe oe jone buka baname isoekuae vierafe rove buka vajae jone ijiebe mamoevono kiae.

⁴²Fu ijiege kuaria areme fune una fuosukua kuke baname isoekiro vae. Fu va baname isoena kuae, Ate Asoeno, a vierafega vajae fiane ige na abekuvejo ije na uria ijia isejavaena vakuma baronekuva ije fune mare. Ijadufuo maeje na vierafe irere are vierafema ije fuka rekono kuae.

⁴³Fu ijiege baname isoema areme una kuke ruogake e ije buneka ninaokiamoga bune ninaoe.

⁴⁴Ijadufuo fu ijia uniana una kuke va baname besu fu ude isoema ijiege una isoe.

⁴⁵Areme fune una kekena e vua fuone fievo ije kiae, Jaeje jaka uria ninaokuae vierafe? Rove igia fie, maza ije bu Ema ijiebuo Fari ige na abena una e ise revo ije miadufuo ije fune ivuare.

⁴⁶Ro e ije fu na abe e ani none miadufuo ije fune gafia ruomono ni uri no vano kiae. Jesu bu toeva ijene

⁴⁷Jesu fu uria manina vua kuariamo ijia e vua fuone fiemo be e Judasino kuavo ije fune ijia kekei. E ije fune e azo kenoejo ijiakina e zinone ifaejevo ijiebuo e mamekanu ijiakiro e Jiusibuo e mamekanu bu uniaejaeva ijena ijia keke. E boeje bune uri simekina magu ije kena ijia usiae.

⁴⁸Ro Judasi fune uria e ije fu kaenamiana ruaema ije ijuriana kiae, Ja giega na va e izene fare uimiga ni e ijene fare tono kiae.

⁴⁹Ijadufuo Judasi fune migegire kekena Jesu manino ijia manime kuae, E nijasiamo kafaevo ije fu obikino kuana fune uri Jesu farena uimi.

⁵⁰Areme Jesu fu urina kuae, Kaino ni migegire irere a vierafema ije reno kuae. Jesu fu ijiege kuarakoga e ani ije bune ijia usiaena Jesu farena dabe toe.

⁵¹Ro e ije Jesuna oenoevo be fune urina sime fuone ijare meruna dabe e be e ireobo zinone ifaejemo ijadufuo imeno ijadufuo adane ije kana daturae.

⁵²Rove Jesu fu una kuae, Eko, sime one ije abena una suave fuone ijia abiesene. Ijadufuo maeje e ije erarebe bu sime buone ijia kena e kaniavo ije buka sime ijiebe una bu kaniadufuo.

⁵³Ro igia fie, na vierafe na Asoe none ije kua fu anera fuone ka ma uruvana kiaga bu iviamaigia migegire na nafariebitie na ijiege redufuo.

⁵⁴Rove na vierafe na ijiege rekuva vua ije bu buki akae ijia isoena noesina kuaema ije fube riaredufuo. Ijadufuo ni areke irere fu kuaema ije fu reno kiae.

⁵⁵Jesu fu ijiege kuaria areme una e boeje ruaeva ije kiae, E gure jaja vierafero nanaka e kuriae na e kaniavo ijadufuo jaka simekina magu ije kena na okuriena toenamiekuae ruae. Na maza boeje naka e Jiusi ijiebuo are bu baname isoevo ijia aruna vua nijasiavo rove ja naebe ijia aruna na toenamie.

⁵⁶Rove na vierafe ire boeje iviama remo ije fuka ijiege rekina vua irere boeje e Godido vua vierafena kuaevo bu buki akae ijia isoeva ije fu ijiakuma riareno kiae. Jesu fu ijiege kuariako ijia e vua fuone fievo boeje bune ijia uri fu nujana subinae vae. Bu Jesu mesirina e Jiusibuo e mamekanu ijiebuo vaeva ijene

⁵⁷Ijiege rena e ije Jesu farena toeva ije bune fu mesirina e Kaefasedo are ijia vae. Ijadufuo maeje e vua akae nijasiavo ijiakina e mamekanu boeje bu besu ijia afui.

⁵⁸Bu Jesu mesirina vakoga Fita fu muma gamia giagiakinu nuvedia ruoma e zinone ifaejevo ijiebuo e ireobo ijadufuo ae makave ijia kekei. Fu ijia kekena aru va e ije juo karijo ijena ijia fina gia arega bu Jesu abe izege rega fu giakiro.

⁵⁹Areme e zinone ifaejevo ijiebuo e mamekanu ijiakina e mamekanu boeje koto fievo ije bune uri vua kufui bino Jesusina kuaena rerei. Bu ijiege rerena gaga fu ise bino rejoga bu abena kurosi kanakuae bu ijiege rei.

⁶⁰Rove bu vua fuone ise bino buka naebe fie. Ro kuke e uruvana buka aruna Jesusina vua kufui kuaena rere rove bu vua ise fuone bino naebe fie. Bu ijiege revo ijia e inokiro bu aruna kiae, E gure fu kuae, Nana manido na Godido Are bu baname isoevo ije faraekore areme mu inokube furike na una sa furikono kuaemano kiae.

⁶¹(null)

⁶²Ro e zinone ifaejevo ijiebuo e ireobo ije fu urina una Jesu kuae, A vierafe abe vua bino una e gure bu oesina kuaevo ije gue kuariake ke a bakino kuae.

⁶³Fu ijiege kuaramoga Jesu fu vua bino naebe una vegue kuarae. Ijadufuo fu una kuae, Nika Godi ijia fivako ijadufuo ive ijia kurana vua maeje kuaruone. A vierafega ane ma Godido Fari e ije fu ruakono kuaema ijega ni ijiege kuaruo no fieno kuae.

⁶⁴Fu ijiege kuaramoga Jesu fu una gue kuae, Vua ije ane koro ijifureki kuaeme ijadufuo naeje na e ijene. Rove na ige kuariako ni fiene. Ivia igia una gafege vako ijia Ema ijiebuo Fari ige naeje na Godi e daroki ijadufuo umui maeneke ijia fike. Ro rade na saove gufia una amite uve ijia ari roga ja giekono kiae.

⁶⁵Fu ijiege kuariamoga e zinone ifaejevo ijiebuo e ireobo ije fu vua ije fiemo fuka defarui. Ijadufuo fu urina ugone fuone fu saema ije faradia farae. Areme fu urina e ije koto fievo ije kiae, Vua ije fune korufuo ijifureki kuaeme. Ijadufuo na vierafe no una e bino erane kiaga bu vua ise fuone bino kuaruoga no fiekuva baki. Ro iviama jane vua ise izege fu Godisina kuaema ije jane fie. Ijadufuo ja vierafega e gure ja dabe izege rekono kiae? Fu ijiege kuariamoga e boeje bu una gue kuae, E ije fu kuae fuje fuka Godiki besuno kuae. Ijadufuo no vierafe noka dabe kana fu baronekono kuae.

⁶⁶(null)

⁶⁷Areme e ije koto fievo ije bune urina ugone fae be abena Jesudo niome ije okurana kirajae. Bu ijiege rena uri uikubae fuone ijia vi ufemadikinu ijia kanae. Ro e gue bu urina kuae, A kume naeje na Kuraesi e ije Godi fu kuamo fu ari ruaema ijeno kume. Ijadufuo ni e ije erare a kanamo ije kuoga no fiene. Areme no ijia vierafero aje ane ma e ije Godi fu kuamo fu ari ruaema ijero no ijiege vierafeno kuae. Fita bu Jesudo kuavo fu fema ijene

⁶⁸

⁶⁹Bu ijiege rekoga Fita fu Kaefasido are makave ijia fine. Areme bara be fu ijia imeno ijare keke gana kuae, Na vierafega adua a e be Jesu e Gareriko ijiaki oenoeno na gaevano kuae.

⁷⁰Bara ije fu ijiege kuamoga Fita fuka urina e boeje ijiebuo nidua ijia fei. Fu fena kiae, Na e ije ja kuaevo ije naka naebe vierafevano kiae.

⁷¹Areme fune una kekena e Kaefasido are makave viene ijia vae. Fu iko keke vako ijia bara be fu ijia imeno ijare gana uri e ije ireva ije kiae, E gure fu Jesu e Nasaretiko ijiaki oenoeno na gaevano kiae.

⁷²Bara ije fu ijiege kuaemoga Fita fu kuke una fena kiae, Na Godi kuraedo e ije ja kuaevo ije naka naebe vierafevano kiae.

⁷³Areme maza sibaneke furiko e gue ivuake ijia ireva ijiebe uri Fita kuae, No vierafe bara ije fuka ma kuaeme. Ijadufuo maeje no vierafega adua a e be fuosiki oenoeno ijene. Ro kuke itire one no fiega aka e be fuosiki oenoeno ijeno kuae.

⁷⁴Rove Fita fuka uri Godi kurana kiae, Na vierafe na kufuimekuva ije fu Godire na dabe isekafieke. Ijadufuo naka ma kuariavo igia fiefo. E ije ja kuaevo ije naka naebe vierafevano kiae. Fita fu ijiege kuariakoga saroruba kukoruko fu ijia kumei.

⁷⁵Areme Fita fu ve ijia una vua ije Jesu fu ude kuaraema ije vierafe. Fu kuae, A maza inokubeke bu noesina kuaga a femo ijia kukoruko fu kumekono kuaema fu ije vierafei. Ijadufuo fuka urukeigia oefiaemoga fu kekena makave ijia ireobo nimei.