Read Girawa Matiu 27 Bible Online

Matiu 27 - Girawa bible

Matiu 27

¹Areme suoke mugamia ve iko abaesako ijia e zinone ifaejevo ijiebuo e mamekanu ijiakina e Jiusi ijiebuo e mamekanu ije bune vame izege bu Jesu kanaga fu baronedufuo ije kuaena ijusanami.

²Areme bune Jesu ije bu toeva ijiakuma mesirina una usiae Faereti e Romuko ijiebuo e ireobo ijadufuo vae. Judasi fu fue kananamima ijene

³Bu Jesu mesiri vakoga Judasi e ije fu Jesu abena e ani miaema ije fu gake bune Jesu dabe kana fu baronekuvenoga fu ve ijia oe dakudei. Areme fu moni sunine teti (30) fu kema ijene kena una va e zinone ifaejevo ijiebuo e mamekanu ijiakina e Jiusi ijiebuo e mamekanu ije kariva ije vajiakiro vae.

⁴Fu va ijia kekena kiae, Na vierafe naka isema rena e ije fu ise bino naebe rema ijene dabe e ani ije miaedo bune kana fu baroneke. Ijadufuo ni moni jone ige ja vajieva ije una keno kiae. Rove e mamekanu ije bu una kuae, Vame ije no nore reva baki ro ane are koro rema ijadufuo irufui ije ni koro gano kuae.

⁵Bu ijiege kuaravoga Judasi fu moni ije dabe Godido Are guove ijia akoziana fune keke va iki ina baronei.

⁶Areme e zinone ifaejevo ijiebuo e mamekanu ije bune urina moni sunine ije abena kuae, Moni ige bu abena e fuaevena kanae ijadufuo nobe abena una moni ije no Godi vajavo ijiakuma nijakono kuae.

⁷Ijadufuo bu urina moni ije abe izege redufuo ije kuaema areme bune abena sakae ao be bu e ae binoko oega bu kena uniadufuo ijene fuaeve. Ro ude sakae ije bu e sukore amaeriavo ijiebuo. Rove iviama sakae ije bu kua, Aesakae E Kavuane Arimono kuavo.

⁸(null)

⁹Bu ijiege revoga fune vua irere Jerimaea e Godido vua vierafena kuaemo fu isuibe kuaema ijiakuma riarei. Ro vua ije fu kuaema ije bu ijiege isoe,Moni ije e Isureroko bu abena Jesu fuaevedufuo bu kuaena abe mareva ije bu moni sunine teti (30) ijiege. Ro moni ije bu abe e sukore amaeriavo ijiebuo sakae ije fuaevekono kuae. Ro vame ije bu keva ije bune izege Godi fu kuariema bu ijiege revano kuae. Faereti fu duna binobino Jesu kuaraema ijene

¹⁰

¹¹Ijiege rena e mamekanu ije bune Jesu mesirina va e Romuko ijiebuo e ireobo Faereti fu fino ijia vae. Areme bune kuavo fu Faeretido nidua ijia manikoga Faereti fu urina kuae, A vierafega aeje ane ma e Jiusi ijiebuo kini ijeno kuae? Fu ijiege kuamoga Jesu fu una gue kuae, Ke vua ije a kuaemo ije a ma kuaemono kuae.

¹²Rove e zinone ifaejevo ijiebuo e mamekanu ijiakina e Jiusi ijiebuo e mamekanu ije bu urina vame ise bino fu kenoema ijadufuo kuarae. Rove Jesu fu naebe una ve gue vua bino kuariae ro fume itibirei.

¹³Ijadufuo Faereti fu kuke una Jesu kuae, A vua boeje bu oesina kuaevo ije ane fiejoga a irerefuo vua bino naebe una ve gue kuariamono kuae.

¹⁴Faereti fu ijiege kuaramoga Jesu fu naebe una vua bino kuarae. Ijadufuo Faereti fu ije gamo fuka ireobo oeserei. Faereti fu Jesu abe kurosi kanadufuo kuaema ijene

¹⁵Ro juaevasia besubesu bu iro Fasova ijo ije e boeje bu e Romuko ijiebuo e ireobo ije kuaga fu e dibure karijo ijia era bu vierafevo ije kenujaga fu keke vako.

¹⁶Ijadufuo maza ijia e ise renoeno be ive fuone Jesu Barabasi fu dibure fino. Ro kuke e ije fu e izeki ije e boeje bune vierafe.

¹⁷Ijadufuo Faereti fu urina e boeje kiae, Ja vierafega na e Jesu Barabasi kenuja ke na Jesu Kuraesi kenujaga fu vakono kumei.

¹⁸Rove Faereti fune vierafega bu Jesu oe isema vierafekinu fuina nigaraenoejo ijadufuo bu mesiri fuone ruae.

¹⁹Ro ve ije Faereti fu fata ije bu ijia ajia karina koto fievo ijia fino ijia bara fuone fu vua be ijiege nijae. Fu nijaena kuae, Ade fino e ije fu ise bino naebe rema ije ire bino fuone remo. Ijadufuo maeje na muge naka ise be naena fu gavo naka ireobo oefiadiemano kume.

²⁰Rove e zinone ifaejevo ijiebuo e mamekanu ijiakina e mamekanu gue bu urina e boeje soesoena kia, Janika E Romuko ijiebuo e ireobo ije ijiege kuarafo. Ja ni kua, No vierafe aka e Barabasi kenujaga fu vakiro Jesu Kuraesi ije kanaga fu baroneno kuano kiae.

²¹Ijadufuo bu ijiege kumevoga Faereti fu una kiae, E inokiro ige ja vierafe na joefuo era kuaga fu keke vakono kiae. Fu ijiege kuariamoga bu una ve gue kumei, No vierafe aka Barabasi kuaga fu keke vano kumei.

²²Areme Faereti fu una kuke urina kiae, Ro ja Jesu e ije Kuraesino kuavo ije na izege rekono kiae? Rove e boeje buka urina una ve gue urukeigia vijena kumei, E ije dabe kurosi kanano kumei.

²³Rove Faereti fu una kiae, Ro fu ise ije fu irere rema ijadufuo ja abe kurosi kanakuae vierafevano kiae? Fu ijiege kuariamoga buka una kuke urukeigia vijekinu kumei, E ije dabe kurosi kanano kumei.

²⁴Bu ijiege kumevoga Faereti fu vierafero fu una vua bino kuaekuma buka bijaekiro fu ijiege vierafe. Ijadufuo fu uri kiamo bu do jiana abe mavoga fu abena e boeje ijiebuo nidua ijia umui do rue. Areme fu urina kiae, E ige fu baronedufuo ije na nare rekuva baki. Ijadufuo ni kojo abena izege ja vierafeva ijia reno kiae.

²⁵Fu ijiege kuariamoga e boeje ijia ireva bu una kumei, Ijiekino ni arega e ije no fu kanaga fu isejavaena baronekuma ije nore anafa nuvuone ijena irufui ije abeno kumei.

²⁶Ijadufuo Faereti fune urina e Barabasi buefuo kenujamo fu vae. Areme fune kiamo bu Jesu ifima arevoga e azokenoejo ije bune mesirina dabe kurosi kanakuae vae. E azokenoejo bu Jesu dabe uti ifaejeva ijene

²⁷Ijiege rena Faeretido e ije azokenoejo ije bune uri Jesu mesirina dabe usiae Faeretido are maeje ijadufuo makave ijia ruae. Areme e azokenoejo boeje bune usiaena Jesu dabe okurae.

²⁸Bu ijiege rena uri ugone fuone fu saema ije azoeja areme uri ugone jaraeki kavuane ije be dabe abiesejae.

²⁹Areme bune ukiese ufuna abe atevema dabe Jesudo nigofo ijia abiesejae areme uri mudu abe umui maeneke ijia mavo fu farena mani. Fu ijiege farena manikoga bune nidua fuone ijia auge sakinu varaemena kuavo, E ige fu e Jiusi ijiebuo Kini fu maza boeje ijia fivako ijeno kuae.

³⁰Areme bune uri fu vi ufemadikinu mudu ije fu farema ijare dabe ukiese fu abiema ado ijia nizuruve.

³¹Bu ijiege rema areme uri ugone kavuane bu abe abiesejaeva ije fare daove. Areme bune ugone fuone bu azoejaeva ijene kena una saeja areme bune mesirina usiae kurosi kanakuae vae. Jesu bu abe kurosi kanaeva ijene

³²Bune mesirina usiae vame ijia vako ijia bu e Saeriniko be ive fuone Saemoni ijene bie. Areme bune uri e ije kuriaerevoga fu urina Jesudo kurosi ijene dabe dabei.

³³Areme bune ruoma are Gorogotano kuavo ijia usiae. (Ro ive Gorogota ijadufuo maeje, Uruo E Nigofo Ane).

³⁴Areme e azo kevo ije bune urina do vuaeni abena ia kugi bino ijiakuma medima abe Jesu mae. Bu ijiege rekina fu abe iga fube vajae fiane abekiro bu ijiege re rove fu sia fiena fuka ijuonei.

³⁵Bu ijiege rema areme bune uri Jesu dabe kurosi ijia kanae. Areme bune uri ugone fuone ije kame nana kasi dabe akoe arega erare kegaro bu ijiege rei.

³⁶Bu ijiege rekinu karina Jesu kurosi kave ije fu kiramo ijene verive.

³⁷Ro Jesudo kurosi ubine ijia bu vua be ijiege fuesina isoena kanae. Ro vua ije bu ijiege isoe, E ige Jesu fu e Jiusi ijiebuo Kini ijeno kuae.

³⁸E azo kevo ije bune Jesu dabe ijiege kurosi ijia kana areme bune una kuke e inieki inokiro kame kurosi gue ijia kaniae. E be bu dabe Jesudo umui maeneke ijia kanaga be bu umui aeneke ijia kanae.

³⁹Ro e gue bu vame ije bu Jesu abe kurosi kanaeva ivuake ijane ruovo ije bu usiae gavone buka nigofo kuriatekinu dabe varaemevo. Bu kua, A kuae a Godido Are ije farae kore ro mu inokubeke a una sa furikono kuae. Ijadufuo ane makuma ni koro kenujanamine. Ro kuke ane ma Godido farikuma ni kurosi ije arena una ari roga no gano kuae.

⁴⁰

⁴¹Bu ijiege kuaekoga e zinone ifaejevo ijiebuo e mamekanu ijiakiro e vua akae nijasiavo ijiakina e mamekanu gue ije budua buka Jesu dabe vame besu ijiege varaemei.

⁴²Bu kuaevo, E ije fuka e gue karauniae rove fu izege una korufuo fuone kenujanamikuma baki. Ro kuke fu kuae fuje fuka e Isureroko ijiebuo Kini ireobono kuae. Ijadufuo ni arega fu korufuo kurosi kave ijia iviama ari roga no gana fu ma vierafedufuo.

⁴³Ro kuke fu kuaemo fuje fuka Godido fari ro fu Godi ma vierafemono kuae. Ijadufuo ni areke Godi fu iviama fu kenujaro fu baga no ije gano kuae.

⁴⁴Ro kuke e inieki inokiro ije bu ke fuina kurosi kaniaeva ije budua bu vame besu ijiege una Jesusina vua ise bino kuae. Jesu fu baronema ijene

⁴⁵Areme maza uvuoka maniko ijia amite utina ruakoga are boeje fuka ve titutena vakuma maza tiri kiroki abei. Ijiege rekoga Jesu fuka urukeigia vijena kumei, Irae, Irae rema sabatanino kumei. Ro vua ijadufuo maeje Godi none Godi none, a irerefuo na abuozie vae?

⁴⁶

⁴⁷Fu ijiege kumenoga e bino ijia ireva ije bu fie areme kuaevo, E ije no vierafe fuka e Iraeja kumeno kuae.

⁴⁸Rove e be fuka una difurina keke atebae be abena ine ubine ijia bijana abe do vuaeni ijia abiena Jesudo itire ijia azirae arega fu iga fu gakiro fu ijiege rei.

⁴⁹Ro e gue bu urina kuae, Areke no irena gaga Eraeja fu ro kenujaga no gano kuae.

⁵⁰Rove Jesu fuka una urukeigia vijema arekoga kavene fuone fu ijia nujana vakoga fune baronei.

⁵¹Ijiege rena ve ijia Jesu fu iko baronekoga ugone jiamado ije bu abena Godido Are guove ijia kiraeva ije fu dabe ukua ijia faraena ari ruoma ubine gumia kekei. Areme sakae ije fuka dabe urukeigia uvekoga munuage ije bu kame ukua ijia visusena guegue rei.

⁵²Fu ijiege uvekoga e mako viene ije buka kame furakorekoga Godido e akae bu oevo bu ke mako ruiva ije Godire e boeje fuka karauniamo bu una uri.

⁵³Areme rade Jesu fu una urimoga Godido e akae ije bu una uriva ije bune Jerusareme sidove akae ijia aru vakoga e boeje bu giae.

⁵⁴Ro e azo kevo ijiakiro e buone ireobo ije bu karina Jesu verivo ije bu sakae ije uvemo ijiakiro ire boeje bu revo ije giavo buka ireobo judiae. Ijadufuo bu una bue kuaevo, No vierafe e gure fune ma Godido Farino kuae.

⁵⁵Ro bara uruvana erarebe bu Gareri gamia Jesu nuvena ifejiakinu ruaeva ije buka mumabo gafia irena giave.

⁵⁶Ro bara ijia buina ruaeva ijeja bara Meri Magedara ijiakiro Meri e Jemisikiro Josofu ijiebuo asie ro e Zebedido bara ijiebe ijia ruae. Jesu bu abe mako ruiva ijene

⁵⁷Ijiege rena ve fune musirema ijia e sinuome zaraema be are Arimatiako ive fuone ije Josofu fu ijia ruae. Ro fudua fu e Jesudo vua fiemo be.

⁵⁸Ijadufuo e ije fune va Faereti fino ijia kekena Jesudo vajae surive ije nafena arikiro kuae. Fu kuamoga Faereti fu una kuae, Ije fune maremano ni va surive fuone ije nafeno kuae.

⁵⁹Ijadufuo Josofu fune una va Jesudo surive fare nafena ugone iviaeko ijia abena uti.

⁶⁰Areme fune abena va munua be fure korufuo iviama runa amaerima ijia nujae. Areme fune uri mune ireobo be mako viene ijia namo ije vajamanina dabe munua viene ije bijukurana fune vae.

⁶¹Fune vakoga bara Meri Magedarakiro bara Meri be ije bune mako viene ivuake ijia samuakinu kari. E azo kevo bu mako viene ije samuaeva ijene

⁶²Ro ire boeje fu rema ije fu mazani Faraede ijia ijiege rei. Ro nituame ije fu e Jiusi ijiebuo mazani bu mauike karina Godido baname isoevo ijene. Ijadufuo e zinone ifaejevo ijiebuo e mamekanu ijiakiro e Feresi ije bune Faeretina vua kuaekuae vae.

⁶³Bune va usiaena kuae, E ireobo, e ije ka iti kufuiki ije fu uria finoema ijia fu kuae, Na mu inokubeke furike na una urina fivakono kuae. Ro vua ije fu kuaema ije no uria vierafei.

⁶⁴Ijadufuo ni kuoga no e gue kega bu va mako viene ije samuake fu vakuma maza inokube ije fu kuaema ije asine. Ro no naebe ijiege rekuva e vua fuone fievo buka mauike una ro vajae surive fuone abe vake. Areme bu e biesiriana kiako Jesu fune una urina ni uria fino kiake. Ijadufuo maeje fu ude kufuimena kuae, Nana Godido Farino kuae. Ro bu una kuke kufuimena kuaeko fune una urimano kuaekuva ije no vierafe funeka mukoreigia iserekono kuae.

⁶⁵Bu ijiege Faereti kuaravoga fu una kiae, Na vierafe jaka ma kuaeve. Ijadufuo ni una va e juo karivo bino kaenamiana vaga bu mako viene ijene mukoreigia samuano kiae.

⁶⁶Ijadufuo e ije bune una va e juo karivo gue kaenamiana mako ije samuakuae vae. E ije bune uri mako viene ijia ane oena areme bu ijia samuana kari.