Read Girawa Matiu 6 Bible Online

Matiu 6 - Girawa bible

Matiu 6

¹Jesu fu ijiege kuaria areme kiae, Ja i jone maeje ja menoejo ijia jade vierafero are bu ebe kame aroruoro urina e niome ijia aroekaravo. Ro ja ijiege kenoekuva Godi Asoe jone saove gufia fino ije fube vame ma bino jone reke.

²Ijadufuo ja e ire baki ije ire bino vajiakuva jade aroekarana e niome ijia vajiavo. Ro ja ifejiakuae vierafekuva ni mauike sauina ifejiafo. Ro jade uri e ije bu vame ijia ro are e bu afuivo ijia vua ijia marenoejo ije matiavo. E ijiege renoejo ije bu kuae, Are e gariebe no kame aroruoro bu ijadufuo ijiege renoeve. Rove na ige kuariako fiefo. E ijiege renoevo ije bune ema ijiebe sibane ijifureki aroriave. Ijadufuo Godi fu irerefuo una ve vame ma bino e ijieki ijiebuo rejiake.

³Ro ja oenoene e iseki ijieki ije ifejiakuva ije nika sauina ifejiaekina kairafa jaena besu oenoejo ije bu irere ja revo ije bube giana vierafedufuo.

⁴Ja mauike ijiege sauina renoekina Godi Asoe jone fu vame sauiki ja revo ije giakuma fu rade ve ijadufuo vame ma bino jone rejiano kiae. Izege Godido baname isoedufuo ijene

⁵Jesu fu ijiege kuaria areme kiae, Ja oenoene Godido baname isoekuva jade e iti kufuiki ije matiana buenina baname isoevo. Bu maza boeje Godido are ijia aruna vierafero are ebe fiejuoro buka uri arire irena baname jiamadogo isoevo. Ro kuke buka usiae makave ijia ijiege vierafenoekinu baname isoenoeve. Rove na kuariako ni fiefo, e ije ijiege renoevo ije bune ema ijiebe sibane ijifureki aroriave. Ijadufuo Godi fu irerefuo rade una vame ma bino ve ijadufuo buone rejiakuma baki.

⁶Ijadufuo ja oenoene baname isoekuva jade buenina vako. Ro nime mauike josukua va are guove jone ijia aruna viene kame bijuna ijia karina Asoe jone ije e bu gavo baki ijadufuo baname isoefo. Ja ijiege rekina Asoe jone fu baname sauiki ije ja isoeko fu giamo ije fu vame ma bino jone rejiake.

⁷Ro ja oenoene baname isoekuva jade e Godi naebe ma vierafevo ije matiana baname buone ma baki ije bu kukuma isoevo ijiege baname isoevo. Bu vierafero bu baname ijiege jiamadogo isoe Godi fuka fiekiro bu ijiege vierafe.

⁸Ijadufuo jade bu kevo ijiege renoevo ijadufuo maeje Asoe jone ije fu irere ja fu kuakuae vierafeva ije fune isuibe giana vierafe.

⁹Ro ja baname isoekuva ni ijiege isoefo.Godi Asoe nuvuone kabo gufe samuamo. No ive one Akae ije aroeke.

¹⁰No vierafe are ro ire boeje ume igia naovo ije samuagiadufuo. Ro kuke no vierafe izege saove gufia bu kevo ijiege e ume igia kariva ije bu vame besu ijiege kenoedufuo.

¹¹Ivia ire no mumaza inoedufuo ije vajuone.

¹²Ro ni izege e binobuo ise ije no giana arevo ijiege ni ise nuvuone guona arene.

¹³Ro ade no kena una vame ise ijia biesiruomo. Ro kuke ni ifejuoga no ire ise ije Setani fu kena vame nuvuone arafiruomo ijia akariakinu oenoene.

¹⁴Jesu fu ijiege baname isoe nijasiama areme kiae, Ja ebe ise bino jone rega ja giana arekuva Godi Asoe jone kabo gufia fino ije fudua ise jone fu giana areke.

¹⁵Ro ja ebuo ise ije ja naebe giana arekuva Godi Asoe jone kabo gufia fino ije fu ise jone ja reva ije fube giana arekono kiae. Ire atovo ijene

¹⁶Fu ijiege kuaria areme kiae, Ja oenoene ire bino atokuae vierafekuva jade uri e iti kufuiki bu kenoevo ijiege kevo. Bu kuae are e guebe giakuae bu usiae e niome ijia buka vasia abeva igege oenoeve. Rove na ige kuariako fiefo. Bu ijiege renoevo ije bune ema ijiebe sibane ijifure giana aroriave. Ijadufuo Godi fu irerefuo una bu kame aroriakuma baki.

¹⁷Ijadufuo ja ire bino ijiege atokuva nime dazena do ruena nige bijama oemarekinu oenoefo. Ja ijiege rekina e gue bube ire ije ja atonoejo ije giana vierafedufuo. Ro fune Godi Asoe jone kabo gufia fino ijare fuosukua vame ije ja josukua mauike vierafena renoejo ije giakuma fu ire ma bino jone redufuo. E ije bu ume igia monikiro sinuome ijia zaraevo ijene

¹⁹Ro kuke igia fie, jade ume igadufuo sinuome ro moni uruvana zaraena karivo. Ijadufuo maeje sinuome mukore boeje rade buka burae ro ire faruaebe ufusekinu ziribijiake ro kuke buka e iniekibe iniemejiake.

²⁰Ijadufuo sinuome ume igadufuo ja uruke vierafevo ije arekiro nika una saove gufadufuo sinuome ijiebe uruke vierafekinu ijadufuo imefo. Sinuome ije bu ire faruae bube ufuse ro kuke bube ziribijiana isereke. Ro kuke e inieki bube aruna iniemero burae ro faraena isereke.

²¹Ijadufuo maza boeje nika ire jone maeje bu izia naovo ije oe jone nika ijia nadufuo.

²²Ro kuke igia fie, niome jone ije fu vajae jone foteke ijadufuo raete igeki. Ijadufuo niome jone ije fu makuma vajae jone boeje fu mukoe sanadufuo.

²³Ro niome jone fu ise ije ja vierafevo ijare okurakuma vajae jone foteke fuka titutedufuo. Ijadufuo vajae jone foteke ijadufuo sanaema fu vafaekuma ije funeka mukoe titutedo ja izege una giriesana vame maeje ja abedufuo ije rerekuva baki. Godido imekinu ro monifuo imevo ijene

²⁴Ro kuke igia fie e besu fu izege uri oe fuone boeje ijiakuma e mamekanu inokiro ijiebuo imekuma baki. Ro fu imekuma ije fu e be fuka mukoe oetuagaro una be ije fube mukoe ifejake. Ro kuke maza boeje e be ije fuka mukoreigia fuefuo imekinu irinake ro una e be ije fume nikatene ganoeke. Ijadufuo ja ume igadufuo sinuome ijiakiro moni ije uruke oetuakinu vierafekuva ije ja izege una mukoreigia Godi irinana maza boeje fuefuo imekuva baki.

²⁵Ijadufuo na ige kuariako ni mukoe fiefo. Jade maza boeje uri vajae surive ijadufuo ire ro do ja i ro ugone ja sadufuo ije uruke vierafenoejo. Ijadufuo maeje ire ijiakiro sinuome ije bu anuigi baki. Ro vajae jone ijiakiro jone ja karivadufuo ijare fuka ma ireobo ijadufuo ja ijare ireobo vierafedufuo.

²⁶Ro kuke nine ume gufe bu oenoejo ije giafo. Buje bu ire uije okinu ro kanafuina navo baki rove fune Asoe jone saove gufia fino ijare bu funeka mukoreigia samuagiame. Ro jaeje ja ume isesina ije Godi fu oetuamo ijieki baki ijadufuo maeje jaeje ja Godido nidua ijia jaka ma anuigi.

²⁷Ijadufuo erare fu vajae surive ijadufuo ire ije uruke vierafenoeno ije fu izege juaevasia fuone abe bio jiamadogo nijana fivake.

²⁸Ro kuke jade karina ugone ja sadufuo ro kedufuo ijadufuo uruke vierafevo. Ro ni kusare tarare gamia ireva ije giafo. Buje bu imena korubuo ugone buone bu savo ije amaeriavo baki rove bume ijia irena ni buone ka mukore ije irave.

²⁹Ro igia fie, e ireobo aesakae samuamo ro ka sinuome zaraema be e Soromoni fuka ugone uruvana ni mukore binobino ije kei. Rove ugone ni mukore fuone ije bu kusare ijiebuo buone ni binobino bu iravo ijare ugone ni buone ije fuka ma asidiae.

³⁰Ro kuke igia fie, vajoma ije bu ivia ijia irega e bu giave ro isuome bu kara ifaejevone bune naona furive. Ire vajoma ije buka ire isesina rove Godi fuka uria bu samuagiame. Ijadufuo e gure ma vierafenoejo baki gurie jaeje ja vajoma ijieki bakino oefiane ja abenoejo ije arefo. Godi ja fuka ma mukoreigia samuagiame ijadufuo jaka fu ma vierafedufuo.

³¹Ijadufuo jade uri ire ro do ro sinuome ijiebuo kari urukeigia vierafero note izia ire boeje kekiro karina ijiege vierafevo.

³²Vame ijiege ja karina sinuome ro ire ro do ijiebuo uruke vierafenoejo ije bu e ije Godi ma vierafevo baki ijiebe ijiege revo. Ro jaeje fu Asoe jone saove gufia fino ije fu irere boeje ja kena karivadufuo ije fune ude giana vierafemo.

³³Ijadufuo ni izege Godi fu oe jone ije samuagiadufuo ije ireobo vierafero vame fuone maeje fu vierafema ijare abe ude vierafena kenoefo. Ja ijiege renoekinu karinoekuva fure korufuo una kuke ire ije ja kena karivadufuo ije binodua ifejiake.

³⁴Ijadufuo irufui isuofuo ije jade karina uruke vierafevo. Ijadufuo maeje fu Godi Asoe jone ijare irufui isuome ja abedufuo ije fure ifejiake. Ijadufuo ni sone oe vafaena irufui ije fu maza binobino ijia ruovo ije besubesu giakinu karinoeno kiae.