Read Girawa Mak 11 Bible Online

Mak 11 - Girawa bible

Mak 11

¹Ijiege rena Jesu fune e vua fuone fievo ijena bune Jerusareme vakuae ruoma are Betefesi ro Beteni uruo Orivi kuavo ivuake ijia usiae. Areme Jesu fune urina e vua fuone fievo inokiro vua igene kuariae.

²Fu kiae, Va sidove gafia usiaena gaga bu mave doniki be bu abe oenoejo baki ijene ijia kiraejoga ije irana mesiri una igia ruafo.

³Ro ja va iraga e be fu giana kiako, Ja irerefuo mave doniki ije iravono kiakuma ni kua, No E Ireobo ijare maza aokube vierafema ijadufuo no ije irado no una migegire mesiri ruakono kuano kiae.

⁴Ijadufuo bune va gafia usiae gake mave doniki ije bu dabe are viene bu aruvo ijia kiraeva bu gae. Areme bune usiae iravoga e ije viene ivuake ijia ireva ije bu giana kiae, Ja erare kiaga ja mave doniki ije iravono kiae?

⁶Bu ijiege kuariavoga e Jesudo vua fievo inokiro bune uri vua izege Jesu fu kuariaema ijiege una e ije kuariavo bu arekoga bu irana una vae.

⁷Bune irana una va Jesu fino ijia usiaena uri ugone buone bu ado saeva ije azona mave doniki ado ijia riejavoga Jesu fu ijia ajia fi.

⁸Bu ijiege rekoga e boeje bune urina ugone buone bu ado savo ije azona vame ijia riejana vae. Areme e gue bu uri ine maeje bu juare buone ijia oeva ijiebuo kia ijene ufusena vame ijia riejakoga fu ijia bierena vae.

⁹E gue bu ude vako gue bu rade nuve vakinu kumevo,No Godido ive ije abe aroeke. No vierafe Godire e ige fu E Ireobo ijadufuo ive ijia ruomo ije daro make. Ro kuke no vierafe Godire izege fu ude e Devidi daro mamoga fu asaerafa nuvuone samuagiaema ijiege fu una kuke e ige fu ruomo ije daro maga fu no samuaguoke. No Godi E Ireobo kave gufia ijia fino ijadufuo ive ije dabe ajiakono kumei.

¹¹E boeje bu ijiege kumekinu Jesu mesirina ruoma Jerusareme ijia usiae. Areme Jesu fune arina Godido Are bu baname isoevo ijia aruna ire boeje gianoe. Fu ijiege gianoena ve titutemoga fune urina e vua fuone fievo ijena una Beteni ijia naekiro vae. Ine durime igeki ije fo naebe kiraema ijene

¹²Areme bune suoke una ruovo ijia Jesu fuka vasia oe.

¹³Ijadufuo fu mumabo gamia ruakinu ine durime igeki ije bu kua figino kuavo ije be fu akuma manino ije gae. Ijadufuo fu urana gaga ine fu fo kiraejoga fu gakiro vae. Rove fu va gake ine ije fume a ijiaru manine. Ijadufuo maeje ine ije fu fo kiradufuo mazani ije fu naebe ruae.

¹⁴Ijadufuo Jesu fu urina ine ije kuae, Aeje a una fo kiraga e bu turana ikuva bakino kuae. Fu ijiege kuamoga e vua fuone fievo bu vua ije fie. Jesu fu Godido Are ijia e ije bu ire binobino fuaevejo ije kuriaerema ijene

¹⁵Areme bune una ruoma Jerusareme usiae areme Jesu fune nana Godido Are bu baname isoevo ijia aru vae. Fu aruna e ije bu ire binobino karina fuaevejo ije kuriaeremo bu usiae. Areme fune uri e ije moni dana vajuonamivo ijiakina e ije ume tuvuaeki kena fuaevejo ijiebuo fata ije kame kuderiajiae. Fu ijiege rekinu uri e ije bu sinuome buone kena Godido are guove ijia oenoevo ijene kuriaeremo bu arei.

¹⁷Areme fune uri e ije vua kuariakinu nijasiana kiae, Isuibe Godido vua bu isoeva ijia fu ijiege kuae,Are none bu e boege aesakae binobino ijia karinoeva ije bu ijia aruna Godido baname isoedufuo. Rove jare ijia aruna dabe e iniekibuo are igege amaerivono kuae.

¹⁸Jesu fu ijiege kuariamoga e zinone ifaejevo ijiebuo e mamekanu ijiakina e vua akae nijasiavo ije bu vua ijene fie. Ijadufuo bu uri vame izege bu Jesu kanadufuo ije rerei rove buka jumei. Ijadufuo maeje e boeje bu vua fuone fu nijasiamo ije fiega buka oeseradiaga bu oemarekinu fiekuae vierafei.

¹⁹Areme fune ve titutemoga Jesu fu uri e vua fuone fievo ijena bune sidove ije arena vae. Godi ma vierafedufuo ijene

²⁰Bune va naoeva suoke una vame ijia ruakinu ine ije Jesu fu ude kuaema ije gake fune saerei. Ine ijadufuo a ijiakina kia fuone boeje foteke buneka saerena vakuma girege gamia kekei.

²¹Ro Fita fune Jesu irere fu ude rema ije fune vierafei. Ijadufuo fu urina Jesu kuae, E Nijasiamo garia gane. Ine gare a kuaema ije fune saeremano kuae.

²²Fita fu ijiege kuamoga Jesu fu urina e vua fuone fievo ije kiae, Janika Godi ma vierafefo.

²³Naka ma kuariave, erare fu oe fuone ijia naebe zazae ro fume ma vierafena uruo gare kuako, Ni koro tuana davare gamia urano kuakuma fuka rega ja gake.

²⁴Ijadufuo igia fie, a ire befuo Godi baname isoena kuamo ije ma vierafero ane abemaro ijiege vierafekinu baname isoekuma ire a kuamo ije a abeke.

²⁵Ro ja Godido baname isoevo ijia ja ire ise bino kairafa jone ijiebuo reva ije vierafekuva ni oe jone ijia totefo. Ja ijiege rekuva Godi Asoe jone saove gufia fino ije fu ise jone ja reva ije fu giana areke.

²⁶Ro ja e binobuo ise ije ja naebe giana oe jone ijia totekuva Godi Asoe jone saove gufia fino ije fu ise jone ja renoeva ije fube giana arekono kiae. Bu Jesudo daro ije fu abema ijadufuo duna kuaeva ijene

²⁷Jesu fu ijiege kuariama furi areme bune una urina vakuma Jerusareme usiae. Areme fune va Godido Are bu baname isoevo ijia aruna oenoe. Fu ijia oenoenoga e mamekanu Godido zinone ifaejevo ijiakina e vua akae nijasiavo ijiakina e mamekanu bino bu urina kuae, Vame ije a renoeno ije erare kuaga a ijiege renoeno kuae?

²⁹Bu ijiege kuaravoga Jesu fu una kiae, Na vierafe na duna besu kuariaga ja una maeje kuariekuva na ijare sone e ije erare kiega na ire igene renoejo na ije kuariake.

³⁰Ja vierafega Joni e ije fu do ruoriamo ije fu Godire kuae ke fu emabe kuaga fu renoeno kiae?

³¹Fu ijiege kuariamoga bu uri dabe bue kuaena sagui. Bu kuae, Note una izege vegue kuarake? No kuako fu Godire maemano kuakuva fuka kuoko ro ja irerefuo naebe Joni ma vierafevano kuoke.

³²Ro kuke no kuako fu emabe maevano kuakuva e gure bu izege redufuo ije no vierafega fuka judueme. Ijadufuo maeje e boeje bune ma vierafega e Joni fune ma e Godido vua vierafena kuaemo beno kuae.

³³Ijadufuo bu una Jesu kuae, No Joni vame ije fu erare kuaga fu renoeno ije noka naebe vierafevano kuae. Areme fu urina kiae, Ijiekido na e ije erare kiega na ire ije renoevo ije nabe kuariakono kiae.