Read Girawa Mak 6 Bible Online

Mak 6 - Girawa bible

Mak 6

¹Areme Jesu fune are ije arena una urina are fuone Nasareti ijia vakoga e vua fuone fievo ije bu fuina vae.

²Areme Jesu fune maza ije bu mauike karijo baname isoevo ijia va e Jiusi ijiebuo are vua kuaevo ijia aruna e ijene vua nijasiae. Ro e boeje bu vua fuone fievo buka oeseradiae. Ijadufuo bu urina kuae, E ije vierafe ije fu erare nijae? Ro kuke daro ije fu erare magana fu abena ire sumiki binobino ije renoene?

³E ije fu e be are sanoeno ro kuke fu bara Merido fari none vierafei. Ro uviarafa fuone ijeja e Jemisikiro Josesi ro e Judasikiro e Saemoni ijene. Ro kuke makirafa fuone bune igia karivo ije none vierafevano kuae. Bu ijiege kuaena vierafega buka jaediamoga bu fu ijuonei.

⁴Ijadufuo Jesu fu urina kiae, E Godido vua vierafena kuaemo ijadufuo vua ije bu e ae guebe fiena ma vierafevo. Ro agane fuone maeje vua fuone bube ma vierafekono kiae.

⁵Fu ijiege kuariana ro fu naebe una ijia ire sumiki bino renoe. Ro fume e sibaneke adame abeva ije umui nigofo naejiana karauniae.

⁶E boeje buka uria naebe fu ma vierafevoga fu ije giamo fuka ireobo oeserei. Jesu fu e vua fuone fievo tuero kema ijene

⁷Fu ijiege renoeno ijia fu e tuero vua fuone fievo ije kumeno bu fuone ruae. Fu e ijene kekina fu daro miaga bu e ije kavene ise ijiebe nirokiaeva ije kuriaerega bu usiae vakuae fu ijadufuo kei. Areme fu uri kiae, Nine e inokiro ijiege ke maziemaziena usiae are binobino ijia vafo.

⁸Ro ja vakuva jade ire uruvana kena oenoejo.

⁹Ro nime ire dia suri jone ijiaru saro nine mudu jone ke faradia vafo. Ro jade buretekiro kamui ijiakina moni ro seti jone bino kena vako.

¹⁰Ro ja sidove be ijia vaga e be fu ja oemarejiana kaenamiakuma ni are fuone ijiaru karina areme nine maza ije ja vako ijia arena vafo.

¹¹Ro ja are tire ijia oenoega e bu naebe ja oemarejiana kaenamiakuva ni are ro sidove ije arena vafo. Ro kuke ni dia suri jone ije azona kuokuo ije kaniakaniama areme nine vafo. Ja ijiege rekuva e sidove ijia kariva ije bu giana vierafero ja bu jane mukoe giamemarevaro bu ijiege vierafeno kiae.

¹²Areme e Jesudo vua fievo ije bune usiae oenoekinu vua ije e bu ise buone ijia oe kuderiana ro una Godi ma vierafedufuo ijene dabe kuarianoe.

¹³Bu ijiege kuarianoekinu uri kavene ise ije bu e nirokiavo ijene kuriaerena rorukuriae. Areme bu kuke e ije adame abevo ije oere aziriakinu karauniae. Joni e do ruoriamo fu baronema ijene

¹⁴Areme Kini Erodi fu ire boeje Jesu fu renoeno ije fie. Ijadufuo maeje e boeje bu Jesu irere fu renoeno ije bune fie furi. Ro e gue bu kuae, Fu Joni e ije e do ruoriamo fu baronema ijare una urina daro abena ire sumiki ije renoeno kuae.

¹⁵Ro e gue bu kuae, Fu e Iraejareno kuae. Ro e gue bu kuae, Fu e be fu e ije bu isuibe Godido vua vierafena kuaenoeva ijieki beno kuae.

¹⁶Ro Erodi fudua fu vua ije fiena kuae, E ije fu e Joni e ije na abe uro ufuvo fu baronema ijare una urimano kuae.

¹⁷Ro Erodi ijiege fu kuaema ijadufuo maeje fu fure ude kiamo bu Joni fare tona mesiri dibure nujae. Ijadufuo maeje fu uvia fuone Firifido bara Erodiase abeno Joni fu kua, Aka isema remano kuamoga fu ijadufuo dabe dibure nujae. Fu kua, Vame ije a una uvia one ijadufuo bara ije abema ije aka akae tuasemano kuamo ijadufuo fu ijiege rei.

¹⁸(null)

¹⁹Ijadufuo Erodiase fuka vua ijare defaruiga fu una oe ise Joni vierafena kanakuvega Erodi fuka vame fuone bijukurame. Ijadufuo maeje Erodi fu vierafega Joni fuka e ma ro fuka e akae. Ijadufuo fu jumena naebe ire ise bino fuone rei. Ro kuke maza ijia Erodi fuka Joni vua ije fu nijasiamo ije fuka oemarekinu fiemo rove vua ijadufuo maeje fu naebe vierafe.

²⁰

²¹Areme maza be Kini Erodi fune mazani fuone bu bieteva ije romoga bara fuone Erodiase fune vame izege Joni kanadufuo ije vierafe. Ro Erodi fune mazani fuone ijadufuo e mamekanu fuone imejo ijiakina e azo kenoejo ijiebuo e mamekanu ijiakina e mamekanu bino are Gareri guove ijia kariva ijiebuo ire kanafui.

²²Areme bune besu afuina ire ijo ijia Erodiasedo kabae ije fune aruna ukua ijia mani dua urui. Fu dua urumoga Erodikiro e ije fuina kariva bu gavo buka oemadiae.

²³Ijadufuo Erodi fu urina bara ije kuae, A irere vierafekuma ni kiega na abena mano kuae. Na godi none ijadufuo ive ijia kuraedo a irere vierafena kiekuma naka kena vajake. Ro kuke ire boeje na samuavo ije a vierafekuma na ke atana gue a vajakono kuae.

²⁴Ijadufuo bara ije fune keke va asie fuone kuae, A vierafe fu kiekuma na izege kuarakono kuae? Ro asie fuone fu kuae, A vaga fu kuakuma ni kua na Joni e do ruoriamo ijadufuo nigofo ije vierafevano kuano kuae.

²⁵Fu ijiege kuaramoga bara ije fu migegire difurina una gumia keke Erodi kuae, Na vierafe aka iviama igia e kia bu va Joni e do ruoriamo ije kanane. Bu kanana nigofo fuone ije ufuna tere ijia utina abe igia miene. (Bara ije fu Jonido nigofo ije gakuma fu vierafero fune ma baronemaro fu ijadufuo ijiege kuarae.)

²⁶Fu ijiege kuaramoga Kini Erodi fuka ireobo oefiae. Rove fune e boeje afuiva ijiebuo nidua ijia godi fuone kuraema ijadufuo fu naebe arei.

²⁷Ijadufuo fuka migegire urina e juo karijo ije kiamo bu dibure ijia Jonido nigofo ije ufuna abe una makuae vae. E ije bune va dibure ijia usiaena Joni kanana nigofo fuone ije kana daturae.

²⁸Areme bune abe tere ijia nijana abe ro bara ije mavoga fu abe una asie fuone mae.

²⁹Bu ijiege rekoga e Jonido vua fievo gue bune vua ije fiena va gafia usiae surive fuone dabe va mako rui. Jesu fu e ma uruvana ije ire vajaema ijene

³⁰Areme rade e Afasero ije Jesu kiamo bu usiae vaeva ije bune una ro Jesu fino usiae. Bu usiaena vua boeje izege bu va e nijasiakinu e iseki karauniaeva ijene Jesu kuarae.

³¹Bu ijiege rekoke e uruvana bu ro ijia giakinu ro una vake. Ijadufuo Jesukiro e vua fuone fievo bu ire idufuo ije fuka maza baki. Ijadufuo Jesu fu uri kiae, Roga no nuvuosukua are etura ijia va mauike karike ja madiano kiae.

³²Ijadufuo bune uri buosukua vanage abena do gara are etura ijia vae.

³³Jesukiro e vua fuone fievo bune vanage abena vakuvejoga e uruvana are binobino ijia ruaeva ije bune giae. Ijadufuo bune urina ude do irifo ijia diake ufuaena vakuma gafia usiaekoga bu rade vanage abena vakuma usiae.

³⁴Areme Jesu fune uri e boeje bu ijia afuiva ije giana fuka oefiane abei. Ijadufuo maeje e ije buka mave-sifi ije bu e samuagiamo baki igege oenoejo fu ijene giae. Ijadufuo fune uri zinuevena vua binobino nijasiae.

³⁵Fu vua nijasiako ve fune mukuvenoga e vua fuone fievo ije bu urina ro Jesu kuae, E Ireobo are ige noka etura igia ruae. Ro kuke ve gure funeka mukuvene.

³⁶Ijadufuo ni e gure kia bu una va sidove ro are ivuake ijia ire bu idufuo ije bino fuaevena ino kuae.

³⁷Bu ijiege kuavoga Jesu fu una kiae, Ije arekiro ni jare uri ire bino rerena vajiaga bu ino kiae. Rove e vua fuone fievo bu una kuae, No buefuo ire fuaevekuva no vierafe noka mani siriva tu aderedi (200) ijiege abena ire fuaeveke. A vierafe fube manido no moni ijiege abena ire fuaevena e ige vajia bu ikono kuae?

³⁸Bu ijiege kuaravoga fu kiae, Ni va e ije ruaeva ije kiaga bu burete izege ke ruaejoga ije giano kiae. Ijadufuo bune va e ije ruaeva ije giana una ro Jesu kuae, Burete ije bu umui fague ro kijume ije bu inokiro ijiege kena ruaevano kuae.

³⁹Ijadufuo fune e vua fuone fievo ije kiamo bu e ije ruaeva ije kiavoga bu vajoma ado ijia atana binobino karinoe.

⁴⁰E gue bu atana uvani aderedi ijiege kariko gue bu atana fifiti (50) ijiege karinoe.

⁴¹Areme Jesu fune urina burete umui fague ijiakiro kijume ije kena kake saove gufia gakinu Godido baname isoe. Areme fune ke tuasena e vua fuone fievo ije vajiamoga bu kena una e boeje ijia kariva ije vajiae.

⁴²Bu kena vajiavoga e boeje bu ire ije ivo buka deufiae. Areme e vua fuone fievo ije bune urina ire nugune ije karina una tere tuero (12) ijiege utisei.

⁴³(null)

⁴⁴Ro e boeje bu ijia ire iva ije e baru ijiaru buka faeve taoseni (5000) ijiege. Jesu fu davare ado ijia biere vaema ijene

⁴⁵Areme Jesu fune e vua fuone fievo ije kiamoga bu vanage abena do ijia urana una gara are Besaeda ijia vae. Bune vakoga Jesu fu uri e boeje ijia kariva ije kiae, Ni una are jone ijia vano kiamo bune vakoga fu una uruo ijia ajiana baname isoekiro vae.

⁴⁶

⁴⁷Ro e vua fuone fievo ije bu uria vanage abena do ukua ijia vako fune ve titutei. Ro Jesu fudua fu uria fuosukua uruo ijia fina baname isoeme.

⁴⁸Fu ijia fina baname isoekinu giake e vua fuone fievo ije buka uria vanage dabe do ado ijia manoeve. Ijadufuo maeje fuka majaufi ireobo ijare bu vako ijia ufime. Ijadufuo ve iko naerema ijia Jesu fune una bu vako uinike do ado ijia bierena keke asidiana vakuveno bu gae. E boeje vanage ijia kariva ije bu gana vierafero fute e barome oenoenoro buka ireobo jumena uri vijei. Bu jumevoga Jesu fu migegire una kiae, E garie na nareno jade jumekiro nika giriesano kiae.

⁵⁰(null)

⁵¹Areme fune vanage ijia ajia buina fiko majaufi fu ijia aremoga e vua fuone fievo ije buka ireobo oeseradiae. Ijadufuo maeje bu Jesu fu daro fuone ijia burete umui fague ije kena e ka ma uruvana vajiamo bu iva ije buka naebe mukoe gana vierafei. Ijadufuo maeje nigofo buone buka ma gikikimana.

⁵²(null)

⁵³Ijiege rena bune do ijia urana vakuma gara are Genesareti ijia usiae. Ro vanage bu abe vaeva ije bu dabe do irifo ijia kirae.

⁵⁴Ro e ijia kariva ije bu Jesudo uikubae ije bune ude gaeva ijadufuo bune vierafei.

⁵⁵Ijadufuo bu usiae difurisaena sidove binobino ijia oenoekinu e ije visinamiavo ije kaenamiana fata ijia uniana ke Jesu fino ijia ruae.

⁵⁶Ro Jesu fu sidove isesina ro mamekanu ijia ro are binobino ijia vakone e ije buka e visinamiavo ije kaenamia are binobino bu ire fuaevejo makave ijia uniavo. Bu kaenamia ijia uniakinu Jesu soesoena kuaga fu e adagi ije kiaga bu ugone fuone ubine ijia niriaega bu madiakuae bu ijiege rei.