Read Girawa Luk 1 Bible Online

Luk 1 - Girawa bible

Luk 1

¹Eko Tiofirasi, e boeje bune giriesana ire ije fu igia nuvuone rema ije isoe.

²Ro vua ije bu isoena no kuarueva ije bu e game bu iko zinume ijia ire maeje ni buone ijia giana abe kuaruo ruaeva ijiebe isoe.

³Ijadufuo e ireobo Tiofirasi na uria iko zinume ijia naneka kono vua ijadufuo zinume maeje mukoreigia rerena fie. Ijadufuo na vierafe naka izege Jesu fu renoekinu nijasianoema ije abe mukoreigia isoena a nijake.

⁴Ro fasi ije na ijiege isoeva ije na vierafero na ijiege isoekina a vame maeje bu nijasaeva ije a ma vierafekiro na ije isoe. Joni e do ruoriamo bu bietedufuo bu kuaeva ijene

⁵Areme maza ije Erodi fu e Judiakobuo e ireobo rema ijia e Zekaraea fu e Godido zinone ifaejemo ije rena e Abaejado uifari ijena imei. Ro bara fuone Erisabeti fudua fu e Eronido uifari be.

⁶Ino baraki ije buka vame maeje E Ireobo Godi fu oemaedufuo ijia karinoekinu ro buka akae fuone ijiakiro vua fuone boeje mukoe iriakinu karinoe.

⁷Ino baraki ije bu ame baki ijadufuo maeje Erisabeti fune debirei ro kuke buneka eoradiae.

⁸Rove maza be e Zekaraea fu maza fuone fu imedufuo ije romoga fune va Godido Are ijia imei.

⁹Ro e Zekaraea bune vame izege e zinone ifaejevo bu e kevo bu ijiege rena fu abei. Ro i fuone fu meno ije fu ire udi mukore urimo ije kena fata ijia ifaejemo. Ijadufuo fune E Ireobo ijadufuo Godido Are guove ijia aruna vae. Fu aruna ire udi mukore urimo ije kena ifaejeko e boeje bu makave ijia karina baname isoeve.

¹⁰(null)

¹¹Fu ijiege remo ijia fu E Ireobo ijadufuo anera ije gae. Anera ije fu arina fata ije bu ire udi mukore urimo ije ifaejevo umui maeneke ijia manine.

¹²Fu ijia maninoga Zekaraea fu gamo fuka oesere ro fu ireobo jumei.

¹³Areme anera ije fu urina kuae, Zekaraea ibe jumene. Ijadufuo maeje Godi fune baname one a isoemo ije fune fie. Ijadufuo bara one Erisabeti fu oefuo ame fari be nafega ive fuone a Joni kuake.

¹⁴Bara one ije fu ame ije bietekuma ja e boejena jaka ma ireobo oemaredufuo.

¹⁵Ro fuje fu Godido nidua ijia fuka e anuigi be reke. Ro e ije fu ire vuaeni ijiakiro do kugi bino fube ike. Ro bu e ije bietekuva Kavene Akae ije fuka fu dabe nirodufuo.

¹⁶Areme fu e ijare e Isureroko boeje kaenamiaga bu una E Ireobo Godi buone ijadufuo ruake.

¹⁷Fu isuibe Eraeja e Godido vua vierafena kuaemo fu Kavene Akae ijare niromo fu e daroki rema ijiege fuka daro abeke. Areme fu ude E Ireobo ijadufuo vame ije amaerina vake. Ro fure ame ijiakiro orafa ije kaenamiaga bu una agane besu reke. Ro kuke fure e ije bu Godi naebe irinavo ije ifejiakinu kaenamia una vame ma ijia uniake. Ro fure e boeje kena amaeradiaga bu una E Ireobo ije samuakono kuae.

¹⁸Anera ije fu ijiege kuaramoga e Zekaraea fu una kuae, Naeje nane eoradie ro bara none fudua fune ma barasirei. Ro ire ije a kuaemo ije fu izege rekono kuae?

¹⁹Rove anera ije fu una kuae, Naeje na anera Gebirero na Godido nidua ijia manivo. Ijadufuo Godi fu na kiega na vua maege abena igi a kuarakiro ruae.

²⁰Ro a vua none ige na kuaravo ije a naebe ma vierafemo ijadufuo iviama a vua bino abe kuaeke. Ro ame itibirena fivakuma bu ame ije nafekuva a ijia sone una vua kuaekono kuae.

²¹E Zekaraea fu are guove ijia ijiege reko e ije bu samua kariba vierafero fute Godido Are guove ijia irere abenoro bu ijiege vierafe.

²²Areme fune kekena vua bino naebe kuariamoga bu vierafero fute Godido Are guove ijia ire be nimamaena gaemaro bu ijiege vierafe. Areme e Zekaraea fu vua kuariakuveno fuka iseremo fume umui ijia bijana kuariae.

²³Ijiege rena Zekaraea fune Godido Are ijia i fuone me furina fune una are fuone ijia vae.

²⁴Areme mu sibaneke furiko ijia bara fuone Erisabeti fu e fudiena are fuone ijia fiko vakuma asame umui fague furi.

²⁵Ijadufuo fu urina fue kuae, Iviama E Ireobo fuka na ifejiena marejie. Naeje nane debire rove naka una e fudieva ijadufuo na e boeje ijiebuo niome ijia jaevekinu oenoedufuo ije fune E Ireobo ijare abe vaemano kuae. Jesu bu bietedufuo kuaeva ijene

²⁶Ijiege rena bara Erisabeti fu e fudiena fi vakuma asame umui fague ro dikine ijiege furi. Areme Godi fu anera Gebirero kuamoga fu una are Nasareti aesakae Gareri guove ijia vae.

²⁷Ro anera ije fu bara be Merino kuavo fu baruna naeno baki ije bu e Josofu kuaeva ijadufuo vua abena vae. Ro e Josofu ije fu e Devidido uifari.

²⁸Ijadufuo anera ije fune va kekena Meri kuae, Kafaevo ije fu obiki. E Ireobo ije fu obiki fino ijadufuo fu daro mana vame maeje rejaemano kuae.

²⁹Rove Meri fu vua ije anera fu kuaraema ije fiena vierafero fute irerefuo ijiege anaemaro fuka uri ije ireobo vierafei.

³⁰Ijadufuo anera ije fu una kuae, Ade jumemo. Ijadufuo maeje Godi fuka a ireobo oetuaema ijadufuo fu a marejae.

³¹Ijadufuo aeje a rade e fudie areme ame fari be nafena ive fuone ije a Jesu kuake.

³²Ro rade e ije fuka e ireobo be rega fuje e bu kuako E Ireobo Godi ka daroki ijadufuo Farino kuake. Ro E Ireobo Godire izege fu asae fuone e Devidi kuamo fu e ireobo rema ijiege fu kuaga fure e ireobo reke.

³³Areme fure kini ma ireobo rena e Jekafudo uifari ije samuagiake. Ro ire boeje fu samuagiamo ije bube bakirekiro buka maza boeje ijia nao vakono kuae.

³⁴Anera fu ijiege kuaramoga Meri fu una kuae, Naeje na baruna naejo baki ro vua ije a kuariemo ije fu izege none rekono kuae?

³⁵Rove anera ije fu una kuae, Aeje fu Kavene Akae ijare nirokaga Godido daro ije fu one ruake. Areme a ame akae ije nafega e bu fu kuako Godido Farino kuake.

³⁶Ro igia fie, Agane one be bara Erisabeti fuje e bu kuae fu debirero fune barasiremano kuae. Rove iviama fuje fune e fudiena fiko fune asame umui fague ro dikine besu ijiege furi.

³⁷Ro vua ige na kuaravo ije Godi fu arekuma baki. Ijadufuo maeje Godi fu irere ema bu redufuo baki ije fuje fuka remono kuae.

³⁸Anera fu ijiege kuaramoga Meri fu una kuae, Na maza boeje Godi vua irere fu kuariemo ije naka revo. Ijadufuo na vierafe vua irere a kuariemo ije fuka none rekono kuamoga anera ije fune ijia arena vae. Meri fu Erisabeti gakiro vaema ijene

³⁹Areme rade Meri fune migegire ire fuone kanafuina fune sidove be bu kave ijia kariva ijia vae. Ro sidove ije fu sakae Judia guove ijia.

⁴⁰Bara Meri fu va ijia kekena e Zekaraeado are ijia ajia bara fuone Erisabeti anae.

⁴¹Meri fu iko Erisabeti anaeko ame ije fu Erisebetido devatua ijia avae. Ro Erisabeti fu Kavene Akae ijare oe fuone ijia ari. Ijadufuo fuka urina urukeigia vijena kumei, Aeje a bara boeje ijiebuo uve ijia ive one fuka ma ireobo redufuo. Ro ame one ije fudua ive fuone fuka ma ireobo reke.

⁴²(null)

⁴³Ro kuke irerefuo E Ireobo fu ire sumiki ige remoga asie fuone ije a na giekiro ruae.

⁴⁴Na a iko kekena anadiekoga na fie ame ige fuka ijia avaemo na fie.

⁴⁵Ro iviama aeje anika oemarene ijadufuo maeje a Godi irere fu one reko kuaema ije aka ma vierafe ijadufuo ire ije fuka remano kumei. Merido dua fu uruna oemarema ijene

⁴⁶Areme Meri fu urina kuae,Naeje na oe none ro kavene none ijiakuma E Ireobo Godi nuvuone fu no karaunuomo ijadufuo oemarei.

⁴⁷(null)

⁴⁸Ro kuke naneka bara ifiki baki rove fune Godire na oemarejiena vame anuigi ije none rei. Ijadufuo rade e boeje bu vame maeje Godi e daroki ije fu none rema ijadufuo e bu na kieko Godi fuka bara ije ifejana marejaemano kieke. Ijadufuo ive fuone fuka ma akae.

⁴⁹(null)

⁵⁰Godi fuka e uifari binobino ijia eranebe bu fu aroevo ije giana buone oefiane abeno.

⁵¹Ro fure daro fuone ijia ire mamekanu ijene rekinuro e ije aroekaranoevo ijiebuo vierafe ije fu kame iserejiamo.

⁵²Fu ijiege rekinu e mamekanu aesakae samuagiavo ije fu kame arigaro e oe soegi ije fu kame ajiamo.

⁵³Ro kuke fu e ije eranebe bu vasiaoriaevo ije fu ire maeje vajiagaro e ije ire uruvana zaraevo ije fu kiaga bume umuikiriasa vako.

⁵⁴Ro fuka e fuone e Isureroko ijiebuo oefiane abena marejiae. Ijadufuo maeje fu isuibe asaerafa nuvuone e Eburamekiro uifari fuone ije fu ifejiako kiaema ijadufuo fu buone oefiane abena marejiaemano kuae.

⁵⁵(null)

⁵⁶Ijiege rena Meri fu asame inokubeke Erisabetiki fina areme fune una are fuone ijia vae. E Joni e do ruoriamo bu bieteva ijene

⁵⁷Areme Erisabeti fune maza ije fu ame fuone bietedufuo romoga fune ame fari bietei.

⁵⁸Fu ame ije bietemoga e are ivuake ijia kariva ije abero kairafa fuone boeje bu ire mukore ije E Ireobo fu bara Erisabetido rema ije fie. Ijadufuo buka fuone ireobo oemarei.

⁵⁹Areme fune mu eiti furinoga orafa ije bune ame ije abena vajae fuone ijia nuga nijae. Ro e orafa gue bu ame ije abena asoe fuone e Zekaraea nabui kekuae vierafei.

⁶⁰Rove asie fuone fu ijuonena kiae, Na vierafe ive fuone ije na Joni kuakono kiae.

⁶¹Rove orafa gue bu una kuae, E uifari one ijia ive ije fu bakino kuae.

⁶²Areme bu urina asoe fuone umui ijia nijaena kuae, A vierafe no ame ige no era kuakono kuae?

⁶³Bu ijiege kuaravoga Zekaraea fu una umui ijia nijasiana fefafuo kiamo bu abe mae. Areme fu abena ijia isoena kiae, Ive fuone ni Joni kuano kiamoga e boeje bu ije gavo buka oeseradiae.

⁶⁴Areme ve ijia Zekaraea fu una vua kuaena uri Godido ive dabe ajianakinu fuone oemarei.

⁶⁵Bu ijiege oeseradiamoga e are ivuake ijia karinoeva ijiakiro e boeje sakae Judia guove uruo ijia kariva bu vua ije fie.

⁶⁶Ijadufuo bu una bue kuae, Ame ije fute rade izege reke? Ijadufuo maeje no samadukua gaga Godido daro ije funeka fuobikino kuae. Zekaraea fu ire boeje rade redufuo ije kuaema ijene

⁶⁷Areme e Jonido asoe Zekaraea fu Godido Kavene ijare oe fuone ijia arimoga fu urina Godido vua maeje ijiege kuae.

⁶⁸No E Ireobo e Isureroko ijiebuo Godi ijadufuo oemarekinu ro ive fuone dabe ajiake! Ijadufuo maeje fure e fuone ije bu ise ijare uti faradiaema ijia ifejiakinu karauniakiro ruae.

⁶⁹Godire Devidi e Godido imeno ijadufuo uifari be ka e daroki fu no karaunuodufuo ije kuamo fu ruae.

⁷⁰Ro isuibe e akae bu Godido vua vierafena kuaevo ije bu ijiege kuae.

⁷¹Fure e ani ije nuvuone ijiakiro e ije bu no ziegafuovo ijia ifejuona karaunuoko kuae.

⁷²Ro Godi fu isuibe asae nuvuone e Eburame ijuina kuae, Na vame akae iviaeko be ja naena besu redufuo ije vierafena kuaedo na uifari one ije oetuana ifejiakono kuae.

⁷³(null)

⁷⁴Ro kuke fu una ijuruona kuo, Na e ani jone bu ja ziegafiavo ijia vafariana ja karauniakono kue. Ijadufuo nobe jumekinu uri fuefuo imenoeke. Ro noka maza boeje uri e akae rena vame fuone maeje maturaena ijia kenoeke.

⁷⁵(null)

⁷⁶Ro fari none aeje bu kuako E Ireobo Godi kave gufia fino ijadufuo vua vierafena kuaemo ijeno kuake. Ro are ude vakinu E Ireobo ijadufuo vame ije amaerina vake. Ro are e fuone ije kuariana kiako, Ja ise jone arena una oe kuderiakuva Godi fu giana karauniake.

⁷⁷(null)

⁷⁸Ijadufuo maeje Godi nuvuone fuka e ifejiakinu oetuamo. Ijadufuo fu izege mazani fu titutema ijia sanaga titutema fu ira vako ijiege fure e ije bu titutema ijia oekuae kariva ijene vame fuone sanaema ije abena miake. Ro fure vame iviaeko bu kafaena ma karidufuo ije amaerina bu karauniakono kiae.

⁷⁹(null)

⁸⁰Ijiege rena e Joni fune ubaerena e damuiki remoga fuka Godi ma vierafei. Areme fune ae sao ijia finoena areme fune urina Isurero ijia zinuevena Godido vua maeje dabe e ijene kuarianoe.