Read Girawa Luk 10 Bible Online

Luk 10 - Girawa bible

Luk 10

¹Areme rade Jesu fune uri e seveniti tu (72) kena e inokiro ijiege maziena kiamo bu ude usiaena sidove ije fu vadufuo ijia vae.

²Fu ijiege rena bu uria vakuvejo ijia Jesu fu vua bino ijiege bijana kuariae. Fu kiae, Juare ijia ire uije boeje buneka dui. Rove e ije uije kanaufuidufuo ije buka uruvana baki. Ijadufuo ni baname isoena una e juare koeki ije kuaga fu e imedufuo gue kega bu uije ije kanafuifo.

³Ro igia fie, jaeje na mave-sifi igege kena siroe kuriae e sakiavo ijiebuo uve ijia uniaga ja vake.

⁴Ro ja vakuva jade kamuikiro fausi ro tamagu bino kena vako. Ro kuke ja vame ijia ja vako ijia jade e bino biediana anadiakinuro ijia irena saroevo.

⁵Ro ja va gire amure ja ajiavo ije ni e ijia kariva ije anadiana kia, Ni kafaena karinoeno kiafo.

⁶Ro ja gaga e ije fu vame kafaevo ije fu mukoe kenoeno ijare fivoga ni arega daro ije ja maeva ije fu fuosiki navafo. Ro fu bakikuma ni Godi kuaga fu daro ije ja maeva ije una abefo.

⁷Ro fu ja oemarejiakinu kaenamiakuma ni gire ijiaru karina ire ro do fu vajiamo ije ifo. Ijadufuo maeje e imenoeno ije fuka i fuone fu meno ijadufuo zinume abedufuo. Ro jade uri gire binobino ijia ajiarenoejo.

⁸Ro kuke ja sidove be ijia vaga e bu ja oemarejiakinu kaenamiakuva ni ijia karina ire ije bu joefuo kanaufuiva ije ifo.

⁹Areme ni e sidove ijia adame abevo ije ifejiana karauniafo. Ro kia, Godi fu e fuone ijiebuo oe ije fu samuagiamo ije fuka ja kariva ijifurekino kiafo.

¹⁰Ro kuke ja sidove be ijia vaga e bu naebe ja oemarejiakuva ni sidove ije arena vafo.

¹¹Areme ni kia, Ja noeje jane ijuonevo ijadufuo no sidove jone ijadufuo kuokuo ije fu dia tare nuvuone igia kamaeva ije none una igifureki kesevono kiafo. Ro kuke ni kia, Godi fu e fuone ijiebuo oe ije fu samuagiamo ije fu ja kariva ijia ruaema ije fune una bio vaemano kiafo.

¹²Jesu fu vua ijiege e vua fuone fievo ije kuariama areme kuke kiae, Vua ige naka ma kuariave. Maza ije Godi fu are Sodome isekafaema ije fume sibaneke. Rove maza ije Godi fu sidove iziebe ja vakoga bu ja ijuoneva ije fuka kame vame ma ise ijia isekafiakono kiae. E ije bu sidove binobino ijia kariva bu Jesu naebe ma vierafevo ijene

¹³Jesu fu ijiege kuaria areme fune una e ije sidove Korozanikiro Besaeda karivo ijiebuo buesina ijiege kuae. Fu kuae, E sidove inokiro ijia kariva ije ja isekijo nika jumefo. Ijadufuo maeje Godi fuka rade ja kame mukoreigia isekafiake. Ja ire sumiki ije na nidua jone ijia revo ja gieva ije na sidove Saedonikiro Taea guove ijia revabitie, e ije buneka isuibe ise buone boeje bu reva ije arena una oe kuderiadufuo.

¹⁴Ro maza radekuma Godi fu una ise nuvuone ke mazie guomo ijia fu e sidove Taeakiro Saedoni kariva ije fume sibaneke kena isekafiake. Ro una e sidove Korozanikiro Besaeda kariva ije Godi ja fuka kena ma urukeigia isekafiake.

¹⁵Ro kuke e are Kafoniamu kariva ije ja isekijo jadua janika jumefo. Ijadufuo maeje jadua ja ire sumiki na nidua jone ijia reva ije jaka naebe giana na ma vierafei. Ijadufuo ja vierafero jaeje jane manido ja Godi fu fino ijia vakiro ja ijiege vierafe rove ije fuka baki. Godi fu jaeje fuka kame are ise miane naeno ijia korekono kiae.

¹⁶Jesu fu ijiege kuaria areme una e vua fuone fievo ije kiae, Erare fu vua jone ije fiemo ije fune kuke vua none ije dua fieme. Ro e erare fu ja ijuonemo ije fune kuke na ijuoneme. Ro kuke fu E Ije fu kiemo na ruaeva ije ijuonemono kiae. E seveniti tu (72) bu una ruaeva ijene

¹⁷Areme e seveniti tu ije bu usiae vaeva ije bune ireobo oemarekinu una usiaena izege bu renoeva ijene Jesu kuarae. Bu kuae, E Ireobo no vaeva ije noka kavene ise ijene ive one ijia rorukuriavoga bu irinuona e adagi ije arena usiae vaevano kuae.

¹⁸Bu ijiege kuaravoga Jesu fu una kiae, Na vua jone boeje ja kuarievo ije fievo naka oemadie. Ijadufuo maeje na Setani fu saove gufia ire vebu fu karamo ijiege arimo nane gae.

¹⁹Ro igia fie, jaeje naneka daro miae. Ijadufuo maza ije ja usia oenoejo ije ire tabare ijiakiro suge ro ire ise bino ije bube ja sakiake. Ro kuke Setani fu daro bakido ire ise binobino bube jone redufuo.

²⁰Ro ja kavene ise ije bu ja iriniaeva ijadufuo jade oemarevo. Ijadufuo maeje igia fie. Godi fu ive jone fune buki fuone saove gufia namo ijia isoema ijadufuo nika oemareno kiae. Jesu fu ireobo oemarema ijene

²¹Areme ve ijia Kavene Akae ije fu Jesudo oe ijia iraraemoga fuka ireobo oemarei. Ijadufuo fu urina Godi baname isoena kuae, Godi Asoeno, aeje aka saove ijiakiro ume igadufuo E Ireobo. Naka one oemareve ijadufuo maeje a e ige bu naebe ma vierafevo ijene irere a kena uriema ije ane kena samadukua nijasiae. Ro una e ije bu mukoreigia vierafevo ije aka kena ni sauikuriae. Ro ije ane one izege a vierafemo ijia ijiege rei.

²²Ro Asoeno are ire boeje ige na samuagiadufuo ijene vajie. Ro kuke fu erare na mukoe giena vierafema baki ro ane are osukua na giena vierafei. Ijiegero fu erare a gana vierafeva baki ro nane nare nosukua a gana vierafei. Ro kuke na e ije na keva ije a e izeki ije nane kuariakinu nijasiaevano kuae.

²³Jesu fune ijiege Godi baname isoema areme una dakude e vua fuone fievo ije mauikeigia kiae, Janika ire ije ja giaeva ijadufuo oemarefo.

²⁴Ijadufuo maeje e ije ude Godido vua vierafena kuaevo ijiakiro e kini gue aesakae samuavo ije buka irere ja giavo ijene giakuae vierafe rove buka naebe giae. Ro kuke buka vua irere ja fievo ije fiekuae vierafe rove bu naebe fieko bune oe furivano kiae. Izege ma karivadufuo ijene

²⁵Maza be e vua akae nijasiamo ijare Jesu biesirina kuae, E Nijasiamo na izege rekuva na vame ma kari vako ije abekono kuae?

²⁶Fu ijiege kuamoga Jesu fu una kuae, Ro a buki akae bu isoeva ije a izege dana vierafemano kuae?

²⁷Ro e ije fu una kuae, Godido buki ake ije fu kuae, Anika oe one ijiakiro kavene ro daro one ijiakiro vierafe one boeje ijiakuma Godi E Ireobo one ije oetuano kuae. Ro kuke anika one izege a oetuanamimo ijiege una kairafa one ijene oetuano kuae.

²⁸E ije fu ijiege kuaramoga Jesu fu una kuae, Vua ije aneka ma kuarieme. A ijiege rekuma a vame ma karivako ije abekono kuae.

²⁹Ijadufuo e vua akae nijasiamo ije fu vierafega fuka e boeje oetuamo baki. Ijadufuo fu una Jesu kuae, Ro a vierafega na kairafa none ije na erane oetuakono kuae?

³⁰Fu ijiege kuaramoga Jesu fu una vua be ijiege bijana kuarae. Fu kuae, E be fu are Jerusareme ijia una Jeriko ari vakiro vako ijia e iniemevo ijiebe usiaena bie. Bu biena fare dabe ugone fuone azoja areme kanama fune baronekuvenoga bu ijia arena vae.

³¹Ro e zinone ifaejemo be fu vame ijane ruoga e ije fu ijia namo fu gae rove fune keke asina vae. Fu vakoga e Rivaeti be fu rade nuvena vaga e ije bu kanaeva ije fu ijia namoga fudua fu keke gana fune asi vae.

³²(null)

³³Areme e Sameriteniko be fu vame besu ijane ruoma keke e ije namo ijene gamo fuka oefiae.

³⁴Ijadufuo fu va e ije namo ijia kekena muramura ijiakina do vuaeni ije kena usiaejakinu matane soejae. Areme fune uri matane fuone ije ugone utijama areme dabena mave-doniki fuone ado ijia nujana fune mesiri va are be e bu naovo ijia nujana samua fi.

³⁵Areme nituame fune uri moni sunine bino karana e ije are samuamo ije vajae. Fu vajana kuae, Ni e ige mukoreigia samuake na vaekiro na una rone. Ro na una ruakuva ni ire izege a fuone akoema ije kuariega na una ve ijadufuo vajano kuae.

³⁶Jesu fu ijiege kuara areme uri kuae, A vierafega e inokubeke ije bu vaeva ijia e izare fu e ije bu kanaeva ijadufuo kaino kuae?

³⁷Ro e ije vua akae nijasiamo ije fu una kuae, Na vierafe e ije fu ifejaema ijare fuka ma kai fuoneno kuae. Fu ijiege kuamoga Jesu fu kuae, Ijadufuo a vakuma nine adua vame besu ije fu kema ijiege kenoeno kuae. Jesu fu Matakiro Meri giake vaema ijene

³⁸Areme Jesu fune e vua fuone fievo ijena Jerusareme vakuae ruoma sidove be ijia usiaevoga bara Mata fu Jesu oemarejana mesiri are fuone ijia vae.

³⁹Ro bara Mata uvia fuone Meri fu ro Jesu fu fina vua nijasiamo ivuake ijia fina vua fuone ije fieme.

⁴⁰Meri fu ijiege fina Jesudo vua ije fiekoro Mata fu ire boeje fuosukua remo ijadufuo fuka naebe oe marei. Ijadufuo fu ro Jesu kuae, E Ireobo, naka nosukua ire boeje revo ijadufuo a na oefiadakuma ni Meri kuaga fu ro na ifejieno kuae.

⁴¹Mata fu ijiege kuaramoga E Ireobo fu una kuae, Mata na gaga ire boeje binobino a renoeno ijiebe vierafe one bune dabe ma arafiri.

⁴²Rove na vierafega vua ige na kuaeko Meri fu fina fiemo ijare fuka ma ire anuigi be. Ijadufuo nabe kuaga fu vuakono kuae.