Read Girawa Luk 16 Bible Online

Luk 16 - Girawa bible

Luk 16

¹Jesu fune e vua fuone fievo ijene vua ijiege kuariama areme una kuke vua be mena kuariae. Fu kiae, E sinuome uruke zaraema ije fu e be fu moni fuone samuadufuo ije abenoga fu moni fuone samuae. Ro rade fu fieke e ije fuka moni fuone ijene kame vame binobino ijia nisenoeno fu fie.

²Ijadufuo fu e ije kumeno fu romoga fu kuae, Eko na vua one be fie ro ire ije a irere ije rei? Ni iviama i one a izege mema ije kuarie na fiene. A ijiege renoeno ijadufuo na vierafe a rade una noefuo imekinu ire none boeje samuagiakuma bakino kuae.

³Areme e ije fune una fue kuae, Iviama nate irere abeke? Na e ireobo none ije fu i ige na mevo ije fune kiega na areke. Rove naeje naka daro baki ijadufuo na izege una i gikikimana mekuva ba. Ro kuke na rade una e bino monifuo inimiakuva naka jaediedufuo.

⁴Ijadufuo iviama na irere redufuo ije nane vierafei. Ijadufuo na vierafe naka kairafa none iviaeko bino kaireke. Na ijiege rekina na rade i none ige arevo ijia na are buone ijia vakuva bure oemarekinu mesiriga na bu giakinu finoekono kuae.

⁵Ijadufuo e ije fune ijiege kuaena uri e besubesu ije bu e ireobo fuone ijadufuo ire ije bu keva ije kumevoga bu ruae. Areme fu uri e ije ude ruaema ije kuae, A e ireobo none ijadufuo ire ije a izege kemano kuae?

⁶Fu ijiege kuamoga fu una kuae, Na ire oere botoro uvani aderedi (100) ijiege kevano kuae. Fu ijiege kuamoga e ije moni samuamo ije fu una kuae, Ni igia ari fina ire ije a kema ije ufu una arina fifiti (50) ijiege buki igia isoeno kuae.

⁷Areme fu una e be ije kuae, Ro aeje a e ireobo ijadufuo ire ije a izege kemano kuae. Fu ijiege kuamoga fu kuae, Na farava begi uvani taoseni (1000) ijiege kevano kuae. Areme e ije moni samuavo ije fune una kuae, Ni igia ari fina ire ije a kema ije ufu una ari eiti aderedi (800) ijiege buki igia isoeno kuae.

⁸Jesu fu vua ijiege mena kuaria areme kiae, E ije fuka isema rena e ireobo fuone ije biesiri rove fuka dabe aroe. Ijadufuo maeje fuka mukoe vierafena una kairafa fuone iviaeko kaenamia romo bu irufui fuone dasumae. Ijadufuo e ume igeko ije budua buka ijiege mukoreigia vierafenoekinu una kairafa iviaeko gue kairenamiaga bu irufui buone dasumiavo. Bu ijiege renoevo ijia buka bure una e ije bu Godido vame maeje sanaema ijia kenoevo ije mukoreigia asidiave.

⁹Ijadufuo igia fie, moni jone ja umeigia oenoekinu kevo ije kena kairafa jone gue ifejiakinu buina kairefo. Ja ijiege rekina rade moni ije fu bakirekuma Godi fuka ja oemarekinu kaenamiaga ja saove gufia vadufuo.

¹⁰Ijadufuo e be erare fu ire isesina ije kena mukore samuagiamo ije fu una ire mamekanu ije mukoe samuagiadufuo. Ro erare fu ire isesina ije kena isema samuagiamo ije fu izege una ire mamekanu ije mukore samuagiakuma baki.

¹¹Ijadufuo a moni ije Godi fu vajamo ije a naebe kena una e gue ifejiakuma Godi fu saove gufia kavene ijadufuo sinuome bino fube una bino a vajake.

¹²Ijadufuo a Godi irere fu vajaema ije a naebe kena mukoreigia renoekuma fube ire ma bino una a vajake.

¹³Ro kuke ni igia fie, e besu fu izege una e mamekanu inokiro ijiebuo imekuma baki. Ijadufuo maeje fu e ireobo be ije fuka mukoe oetuana fuefuo imeke. Ro una e ireobo be ije fuka oe isema vierafekinu naebe fuefuo mukoreigia imedufuo. Ijadufuo ja Godikiro moni kena besu maziena buefuo imenoekuva ja izege mukoreigia imekuva baki. Ijadufuo nika Godi mukoreigia aguaekinu irinakiro jade moni ije ireobo vierafevono kiae. Jesu fu una kuke e Feresi vua binodua kuariaema ijene

¹⁴Rove e Feresi ije buka moni uruke oetuavo ijadufuo bu Jesu vua ije fu kuaemo ije fiena buka uri dabe varaemei.

¹⁵Ijadufuo Jesu fu una kiae, Vua ige na kuariaeva ije e Feresi jare e ijiebuo niome ijia jaka e bino mukoe kenoevo ijiege renoeve. Rove Godi fu oe jone ije funeka samadukua giana vierafe. Ijadufuo maeje irere ema bu ke mamekanu igege vierafevo ije una Godido nidua ijia buka baki.

¹⁶Ro igia fie, e ije bu isuibe karina ruaeva ije bu Mosisido akae ijiakiro e Godido vua vierafena kuaevo ijiebuo vua bu isoeva ijia giana nuvediakinu karina ruoma e Jonido maza ijia usiae. Areme Joni fu uri zinuevena Godido vua maeje izege fu e fuone ijiebuo oe ije samuagiadufuo ijene kuaekoga e gue bu duaku bu uri vua maeje dabe kuaenoe. Ijadufuo iviama e boeje bu vua ije fiena buka una Godido e ijena besu maziekuae giriesave.

¹⁷Rove igia fie, rade saove gufiakiro aesakae ige bu bakiredufuo ro Godido akae ije fube bakireke. Ijadufuo ja ise jone boeje ja kenoejo ije naebe arekuva Godi fuka ja kena akae fuone ijia giakinu isekafiake.

¹⁸Ro kuke na igia kuariako fiefo. E be erare fu bara fuone ije ijuena rorukuraga fu vake e ije fu una bara be abekuma fuje funeka bara ije daturame. Ro kuke e be erare fu bara ije bu rorukuraeva ije abekuma e ije fune bara ije daturamono kiae. Jesu fu e sinuome zaraema ijiakiro Rasarasi ijiebuo ijia bijana kuariaema ijene

¹⁹Fu ijiege kuariana vakuma uri vua be ijiege bijana kuariae. Fu kiae, E sinuome zaraema be fu are fuone ijia fina maza boeje fuka sinuome ni mukore sakinu ro ire uruvana ino.

²⁰Ro kuke e sinuome baki be ive fuone Rasarasi. E ije fuka matane uruvana abema ijadufuo bu mesiri e sinuome zaraema ijadufuo are viene ijia nujaga fu ijia fino.

²¹Bu vierafe bu mesiri ro ijia nujaekina fu vasiaoekuma fu e sinuome zaraema ijadufuo ire nugune ije fu igana koremo ije ikiro bu ijiege revo. Ro kuke siroe ije budua buka ro matane fuone ije siafirikinu ijiege revo.

²²Fu ijiege revakuma maza be e sinuome baki ije fune baronemoga anera ijiebe mesiri ajia Godido are maeje Eburame fu fino ijia nujae. Areme rade e sinuome zaraema ije fudua fune baronemoga bu abena mako rui.

²³Areme e ije fune va are ise miane naeno bu kua Edisino kuavo ijia fina vajae fiane ireobo abene. Fu ijia fina vajae fiane abekinu kake kave ijia gake e Eburame fu Rasarasi mesirina mumabo ijia kariva fu giae.

²⁴Ijadufuo fu uri kumei, Eburame asoeno a na giega abe oefiadane. Ni a isekie Rasarasi kuaga fu umui fuone do ijia abiena ro itire none igia aziriega fu garadiene. Ijadufuo maeje naka miane ige naeno ijia vajae fiane ireobo abevono kumei.

²⁵Rove Eburame fu una gue kumei, farikinodoe ni vierafe one a uria ume gamia finoema ijia a ire maeje boeje ane kei. Ro e ige Rasarasi fuka ire ise ijene kei. Ijadufuo ni ijia fina vajae fiane abekiro fuje fu igia oemarekinu fine.

²⁶Ro igia fie, mako ka dibuore baki be fu ukua ijiefureki. Ijadufuo e bu igia una ijia vuadufuo ije fuka naebe mani. Ro kuke fu erare izege ije a fino ijia una ige no kariva igia ruakuma bakino kumei.

²⁷Fu ijiege kuaramoga e sinuome zaraema ije fu una kumei, Asoeno a isekie ni Rasarasi kuaga fu una va asoe none ijadufuo are ijia uviarafa none umui fague ije samadukua furana kuariane. A ijiege kuariaekina bube are ige na fina vajae fiane abevo igia rovono kumei.

²⁹Rove Eburame fu una kumei, Uviarafa one ije bu Mosisikiro e Godido vua vierafena kuaevo ijiebuo akae ije bu isoeva ije bune dana vierafei. Ijadufuo ni arega bu vua ije bu isoeva ije mukoreigia dana vierafeno kumei.

³⁰Eburame fu ijiege kumemoga e sinuome zaraema ije fu una kumei, Eburame asoeno na vierafe ije fuka naebe mani! Ijadufuo ni arega fuka e baronema ijare una urina va vua ijene mukoreigia kuariana nijasiaga bu ise buone ijuegafiakono kumei.

³¹Rove Eburame fu una kume, Ro bu vua ije Mosisikiro e Godido vua vierafena kuaevo bu buki akae ijia isoeva ije bune dana fie rove buka faememarena ise renoeve. Ijadufuo e baronema be fu una uri buone vakuma bube vua fuone fiena ise buone arekono kumei.