Read Girawa Luk 17 Bible Online

Luk 17 - Girawa bible

Luk 17

¹Jesu fu ijiege kuariama areme una e vua fuone fievo ije kiae, Maza boeje ire ije bu e biesiriako bu iserevo ije buka nuvuone redufuo. Rove e ije erare fu e gue ifejiako bu ise revo ije nika mukoreigia jumedufuo. Ro kuke erare fu e gue bu iviama Godi ma vierafevo ije biesiriaga bu ise revo ije nika urina mune ireobo be abena e ijadufuo uro ijia kirana dabe davare ijia akoekina fu maredufuo.

³Ijadufuo nika kojo mukoe samuanamifo. Ro uvia one be fu ise renoega a gakuma ni kua, Ire ije a renoeno ije fuka iseno areno kuane. Ro a ijiege kuaraga fu ise fuone una a kuarakuma ni fiena oe one ijia totena arene.

⁴Ro fu maza besu ijia ise uruvana one rekinu ro kuako, Kaino, naka one ise revano giena areno kuakuma nika gana areruno kiae. Ma vierafevo ijene

⁵Areme e Jesudo afasero ije bu kuke urina kuae, E Ireobo no vierafe aka nuvuone izege no Godi ma vierafevo ijene kame biona mamekanu rejuono kuae.

⁶Bu ijiege kuaravoga fu una kiae, Jone ja ma vierafevo ije bu isesina ine sira sunine ijiekikuma ije ja fune mani. Ijadufuo ja urina ine gure kuako, Ni girege gamia nafena davare gamia arino kuakuva fuka ja iriniakono kiae. E Godido imenodufuo ijene

⁷Areme Jesu fu una vua be ijiege bijana kuariae. Fu kiae, Ja e be fu oefuo imeno fu juare ijia imeke vae ro baga fu mave samuagianoena una ruakuma ja irere abeke? Jabe uri kuako, Eko migegire ro igia fina ire one na kanafuijaeva ige ino kuake?

⁸Na vierafe jaka ijiege kuarakuva baki. Rove jame kuako, Eko, migegire va ire none na idufuo ije kanafuine. Areme nine samuake na irekiro do none i furiga a sone ro fina irekiro do one ino kuake.

⁹A ijiege kuaraga fu urina ire boeje a kuaramo ijia renoekuma a vierafe abe una fu oemarejake? Na vierafe jaka ijiege rekuva baki. Ijadufuo maeje fune i fuone ije meno ijadufuo a ijiege kuarakuma baki.

¹⁰Ijadufuo jadua janika vame besu ijiege renoefo. Ja i jone Godi fu vajiaema ije menoekuva ije nime kuaeko, i ige Godi fu vajuoga no menoejo ije nome i nuvuone menoejono kuaeno kiae. Jesu e vajae tatieki ije amariaema ijene

¹¹Areme maza be Jesu fune sidove Jerusareme vakiro vakuma are be bu sakae Sameriakiro Gareri ukua ijia kariva ijia kekei. Ro Jesu fu iko are ijia kekemoga e teni (10) vajae tatie reforasino kuavo ije abeva ijiebe fu biekuae ruae. Rove bu naebe usiaena Jesu niriae ro bume mumabo gafia irena urukeigia kumei, Jesu E Ireobo, abe nuvuone oefiane abena ifejuokono kumei.

¹⁴Bu ijiege kumevoga Jesu fu giana uri kiae, Ni una va e zinone ifaejevo ije vajae jone kena bu nijasiano kumei. Ijadufuo e ije bune una vakuae vako ijia vajae tatie bu abeva ije bune bakirei.

¹⁵Vajae tatie ije fune ijiege bakiremoga e be fu ije gana fuka urukeigia vijekinu Godido ive abe ajiana oemarekinu una Jesu fino ijia ruae.

¹⁶E ije fune una ruoma Jesu fino ijia kekena uri nidua fuone ijia augesana fuone oemarei. Ro e ije una ruaema ije fu e are Sameriako.

¹⁷Areme Jesu fu una e vua fuone fievo ije kiae, E ije tatie abeva na ifejiavo bu una madiaeva ije bu izege vakoga e besu gure fu fuosukua una ruae?

¹⁸Ro irerefuo fu e ae beko igare fuosukua una Godi oemarejakiro ruaemano kiae?

¹⁹Areme Jesu fu una e ije ruaema ije kuae, Eko a ma vierafema ijadufuo fune madaemano ni urina vano kuae. Godi fu veze e fuone ijiebuo oe ije samuagiadufuo ijene

²⁰Areme maza be E Feresi gue bu urina Jesu duna be kuae, A vierafega maza ije Godi fu e fuone ijiebuo oe ije samuagiadufuo ije fu veze rekono kuae? Bu ijiege kuaravoga Jesu fu una kiae, Vame ije Godi fu redufuo ije e bu izege ni buone ijia gakuva baki.

²¹Ijadufuo e bube kuaeko, Godi fu igifureki ro fu gafifurekino kuaeke. Ijadufuo maeje Godi fu e besubesu oe buone ijia samuagiamo ijadufuo e bu izege gakuva bakino kiae.

²²Areme Jesu fune una kuke e vua fuone fievo ije kiae, Ja maza rade jaka karina mazani ije Ema ijiebuo Fari ige na una ruadufuo ije gakuae ijafuneke. Rove e boeje ja mazani ije fu rega ja gakuva baki.

²³Ro kuke maza ijia e buka usiae biesirana kiako, Jesu fu gafifureki ro fu igifurekino kiaga jade usiaena na rerienoevo.

²⁴Ijadufuo maeje maza ije na una ruovo ije fu saove gufe fu iraga e boeje bu gavo fu ijiege reke. Ijadufuo Ema ijiebuo Fari ige na una ruovo ije fune vame besu ijiege reke.

²⁵Rove ude naka urukeigia isejavaeke ro kuke e ige iviama karivo ije buka na ijuoneke.

²⁶Ro maza ije Ema ijiebuo Fari ige na una ruovo ije e boeje buka izege e bu isuibe Noado mazani ijia reva ijiege redufuo.

²⁷E Noado maza ijia e boeje buka karina irekiro do kugi ikinu uri barubara bue mananamikinu ijiege renoe. Bu ijiege rekinu ruoma ka maza ije Noa fu sisime ijia ajiakoga do ije fume ijia firamoga e boeje bu do ina oe furi.

²⁸Ro una maza ije e Roti fu fima ijia e boeje bu kuke irekiro do kugi ije ikinu ro ire binobino fuaevekinu buone ivajuenami. Bu ijiege rekinu uri uije iviaeko okinu ae sana bu ijiege abenoe.

²⁹Bu ijiege abena ruoma ka maza ije Roti fu are Sodome arena vakoga miane ije fume saroruba saove gufia arina e boeje sakiamoga buka oe furi.

³⁰Ijadufuo maza ije Ema ijiebuo Fari ige na una ruovo ije fune vame besu ijiege redufuo.

³¹Ro igia fie, maza ije E Ireobo na una ruovo ijia e be fu are fuone ado ijia ajia fino ije fube una arina are guove ijia sinuome fuone kedufuo. Ro kuke e be fu juare fuone ijia oenoeno ije fube una are fuone ijia ire bino kekiro vadufuo.

³²Ro nine e Rotido bara ije fu izege kema ije vierafefo. Bara ije fune ko vae rove miane fu are fuone naenoga fu una sinuome fuone ije vierafekuma ijia miane fu sakimo fu baronei.

³³Ijadufuo erare fu maza boeje ume igia fuone vierafema ije oetuana kenoekuma rade fu izege vame ma karivako ije abekuma baki. Ro erare fu ume igia maza boeje una e gue vierafekinu oetuana ifejianoeno e ije fu rade vame ma karivako ije abeke.

³⁴Ro naka ma kuariavo igia fiefo. Maza ije na una ruovo ijia e inokiro bu are besu naoeva ijia anera bu ari e besu mesirigaro be bu ijia areke.

³⁵Ro bara inokiro bu are buone ijia ire kiravo ije anera bu arina bara besu mesiriga be bu ijia areke.

³⁶Ro kuke e inokiro bu juare ijia oenoejo ije anera bu arina e besu mesiriga be bu ijia arena vakono kiae.

³⁷Jesu ijiege kuariamoga e vua fuone fievo ije bu una kuae, E Ireobo ire ije fu are izia rekono kuae? Rove Jesu fu naebe una ve gue kuariae. Ro fume urina vua be ijiege mena kiae, Are iziebureki ire bino oeva bu naovo ije umanumua bu ijia kevo. Ijadufuo vame besu ijiege ja oenoega ire ije na kuariaeva ijieki bino bu revoga ni vierafero maza ije na una ruovo ije fune ivuaremoro ja ijiege vierafeno kiae.