Read Girawa Luk 19 Bible Online

Luk 19 - Girawa bible

Luk 19

¹Ijiege rena Jesu fune vakuma sidove ireobo Jeriko ijia kekena fune asidia vakiro vae. Ro e takesi abenoevo ijiebuo e ireobo be ive fuone Zekiasi fu ijia fino. Ro e ije fuka e sinuome uruvana zarae.

²(null)

³Ro e Zekiasi fuka Jesu fu e izeki fu ije gakiro vierafe. Rove fuka e dubusiki ijadufuo fu izege e boeje ijiebuo nidore ijia Jesu gakuma baki. Ijadufuo fu asidiana difuri ruoma ine durime ijieki be vame irifo ijia manino ijia ajiae. Fu ijia ajia fina Jesu vuako ije game.

⁴(null)

⁵Fu fina gakoga Jesu fu ruoma ine zinume ijia kekena kake Zekiasi gae. Areme fu uri kuae, Eko Zekiasi migegire ari rone ijadufuo maeje ivia na vierafe na are one ijia osiki fikono kuae.

⁶Jesu fu Zekiasi ijiege kuaramoga fu fiena fuka migegireigia arina Jesudo ireobo oemarei.

⁷Rove e boeje bu ije gavo buka naebe oemadiae. Ijadufuo bu una mauike bue kuaevo, E gure fuka e ise renoeno rove e anuigi gure fuka are fuone ijia vakuveno kuae.

⁸Rove Zekiasi fu una Jesu kuae, E Ireobo igia fiene. Na vierafe na ire none boeje akaegue ije naka kena una e sinuome baki ije ivajiake. Ro kuke na e gue biesiriana ire buone gue kejogakuva na vierafe naka ire none binodua kena una ire buone na keva ijiakuma vajiakono kuae.

⁹Fu ijiege kuaramoga Jesu fu una kiae, Ivia e are igia karijo ijiebuo ise ije Godi fune giana arei. Ijadufuo jajaru josukua Eburamedo uifari baki ro e Zekiasi fudua fu e Eburamedo uifari be ijadufuo maeje fuka na ma vierafe. Ro Ema ijiebuo Fari ige na ruaeva ije na e ijieki bu ise rena Godi ijuonena vaeva ije reriana kaenamiake. Ro kuke bu ise buone arena una oe kuderia na ma vierafega na karauniakiro na ijadufuo ruaevano kiae. Jesu fu moni ije bu izege kena i binobino menoeva ijia mena kuariaema ijene

¹⁰(null)

¹¹Areme e boeje bu uria karina fiekoga Jesu fu kuke vua be ijiege mena kuariae. Ijadufuo maeje fune Jerusareme ivuake ijia vako ijadufuo fu vua ijiege mena kuaemoga e bu vierafero maza ije Godi fu e fuone ijiebuo oe ije samuagiadufuo ije fune iviama igia rekuvenoro bu ijiege vierafei.

¹²Ijadufuo Jesu fu una kiae, E anuigi be fu aesakae be ijia e ireobo rekiro fu ijadufuo daro abeke vaedo fu una ruadufuo.

¹³Ijadufuo e ireobo ije fu uri e fuone imejo umui guegue ije ke areme uri moni fu naema ije kena ata ivajiae. Fu vajiama areme kiae, Nane vako ni moni ijene kena i binobino mena moni una binodua amaeriga na una ro keno kiae.

¹⁴Fu ijiege kuariana fune uria vame vako ijia e aesakae fuone ijeko ije buka fu ijuonena ziegafae. Ijadufuo bu e vua abe oenoejo ije kiavo bu rade nuvena va e anuigi ije kuae, E one game bu kume no e ije fu e ireobo nuvuone rena no samuaguodufuo ije noka iseduomono kumevano kuae.

¹⁵Ro e anuigi ije fu vua buone ije fume fiebarekinena fune va izege fu e ireobo redufuo daro ije abena una ruae. Fu una kekena e ije moni fu atana vajiaema ijene kumevo bu una besu ufui.

¹⁶Areme e be fune kekena kuae, E ireobo, na moni besu a miema ije nane abe imena una mani binodua umui fague ro gue ijiege kena ijiakuma naejaevano kuae.

¹⁷Fu ijiege kuaramoga e ireobo ije fu una kuae, A ire isesina ije aka kena mukoreigia samuagiamo ijadufuo na kuaga a sidove mamekanu umui guegue ije samuagiakono kuae.

¹⁸Areme fune una e fuone imeno be kumeno fu vae. E ije fu kekena kuae, E ireobo na moni besu a miema ije nane abe imenoena una moni binodua umui fague ijiege kena una ijiakuma naejaevano kuae.

¹⁹Ro e ireobo ije fu una kuae, A ijiege rema ijadufuo na kuaga a sidove umui fague ije samuagiakono kuae.

²⁰Areme fu una e fuone imeno be ije kumeno fu vae. Fu kekena kuae, E ireobo moni one a miema ije igifureki. Naneka a jumeva ijadufuo na abe mukoreigia ugone ijia utima nijae.

²¹Ijadufuo maeje na vierafega aeje aka e daroki fu erare a biesirakuma baki. Ro kuke a ire bino a umui one ijia omo baki ije ame ijia masimo. Ijadufuo na moni ige kena iremarekuva maza ije a una ruomo ije na izege kuarakuva baki. Ijadufuo na jumena abe mauki nijaeva na abe una igifureki ruaevano kuae.

²²Fu ijiege kuaramoga e ireobo fuone ije fu una kuae, A ijiege kuaemo ijadufuo na vierafe aka naebe mukoreigia noefuo imei ijadufuo na dabe isekafake. Ro igia fie, naeje naka e daroki ijadufuo na irere nare ovo baki ije na uria ijia masivo ije ane vierafei.

²³Ijadufuo a irerefuo moni none a naebe abena are bu moni navo ijia nijakoga bu una moni binodua amaeriajievano kuae.

²⁴E ireobo fu ijiege kuara areme una e fuone imevo ije kiae, Ni e guradufuo moni ije kamazana una e gare moni kena mukoreigia imeno ije mano kiae.

²⁵Rove e ije bu una kuae, E ireobo e ije ane ude moni ireobo be fu maemano kuae.

²⁶Bu ijiege kuaravoga e ireobo fu una kiae, Na ige kuariako ni mukoreigia fiefo. E ije eranebe bu ire uruke keva ije bu una kuke uruvana kedufuo. Ro erare fu ire bino naebe naema ije buka ire sibaneke fu naema ije una kamazake.

²⁷Ro kuke e ije bu na e ireobo redufuo ije bu ijuonevo ije nika kaenamia ro nidua none guria kaniaga bu oeno kiae. Jesu fu Jerusareme aru vaema ijene

²⁸Jesu fu vua ijiege mena kuariama furi areme fune ude Jerusareme vakoga e boeje bu rade nuvena vae.

²⁹Fune vakuma are Betifasikiro Beteni ivuake Uruo Orivino kuavo ijia kekei. Fu ijia kekena uri e vua fuone fievo inokiro vua igene kuariae. Fu kiae, Ni va are gafia usiaena viene ijia aru vafo. Ja aru vaga bu mave doniki ame be bu naebe abe oenoevo ijene ijia kiraejoga irana abe una igia ruafo.

³⁰(null)

³¹Ro ja iraga e be fu giana kiakuma ni kua, No E Ireobo ijare kuoga no iravono kuano kiae.

³²Areme e inokiro ije bune vakuma gafia usiaena bune vua boeje izege Jesu fu kuariaema ijiege rei.

³³Bune uri mave-doniki ame ije iravoga e koeki ije fune urina kiae, E garie ja mave-doniki ame ije ja irerefuo iravono kiae?

³⁴Fu ijiege kiamoga bu una kuae, No E Ireobo ijare kuoga no ije iravono kuana bune abena una ruoma Jesu fino ijia usiae. Areme bune ugone buone bu ado savo ije azona mave-doniki ado ijia riema uri Jesu umui kevo fu ijia ajia fi.

³⁵(null)

³⁶Areme fune abena vame ijia vakoga e gue bu uri ugone buone bu ado savo ije azona ijia riejakoga fu ado ijia bierena vae.

³⁷Jesu fune vakuma are Jerusareme ivuake uruo Orivi vame duana ijia kekei. Fu ijia kekemoga e boeje vua fuone fievo ije bu fu nuve ruovo ije bune ijia zinuevena uri ire sumiki fu renoeno bu giaeva ijadufuo urukeigia Godido oemarei.

³⁸Bu oemarekinu kumevo,No vierafe Godire Kini ige fu E Ireobo ijadufuo ive ijia ruomo ige daro make. Ro no vierafe ire boeje saove gufia naovo ije buka kafaena ijia naovake. Ro kuke noka Godido ive ije dabe aroekono kumei.

³⁹Areme e boejiebuo uve ijia e Feresi gue bu una Jesu kuae, E Nijasiamo e vua one fievo ije kuriaerega bu mauike ireno kuae.

⁴⁰Rove Jesu fu una kiae, Na kuriaere bu arekuva mune gure naovo ije buka uri na dabe aroriekono kiae. Jesu fu sidove Jerusaremedo nimema ijene

⁴¹Fu ijiege kuaria areme fune ajia ruoma sidove ireobo Jerusareme ivuake ijia kekena uri sidove ije gamo fuka oefiaemo fu nimei.

⁴²Fu nimekinu kumei, O e Jerusaremeko igie, ja irerefuo ni jone fuka uria titutei ijadufuo jaka naebe na mukoreigia giena vierafei. Ro ja na giena vierafevabitie ivia jaka na mukoreigia aguarieke.

⁴³Rove ije jaka baki ijadufuo vakuma maza be abekuma e ani jone buka vame jone binobino ja usiae subi vadufuo ije buka okuria ufuaenoena areme ja bijukuriake.

⁴⁴Areme bu urina are jone ijiakiro e boeje sidove guove ijia kariva ijene isekafiake. Ro mune ije bu kena are jone saeva ije buka diduena dabe giegisake. Ijadufuo maeje ja Godido maza ije fu ja karauniakiro ruaema ije ja naebe gana ma vierafevano kumei. Jesu fu Godido Are ireobo bu baname isoevo ijia aru vaema ijene

⁴⁵Jesu fune ijiege nimekinu kuariama areme fune Godido Are bu baname isoevo ijia aru vae. Fu aruna e ije bu karina ire binobino fuaevevo ije kuriaerena kiamo bu usiae.

⁴⁶Areme fu urina kiae, Isuibe buki akae ije bu isoeva ijia Godi fu kuae,Are none ije bu ijia baname isoevono kuae. Rove jare ijia aru karina dabe e iniekibuo are igege amaerivono kuae.

⁴⁷Areme rade Jesu fune maza boeje va Godido Are ijia aruna vua nijasiame. Ro e Godi zinone ifaejevo ijiebuo e mamekanu ijiakina e vua akae nijasiavo ijiakiro e aeko ijiebuo e mamekanu ije buka Jesu kanakuae vierafei.

⁴⁸Rove bu vame ije izege Jesu kanadufuo ije rerega fuka iserei. Ijadufuo maeje e boeje buka uria ijia karina vua fu kuaemo ijadufuo asune ijene mukoreigia fiekuae reve. Bu vierafe bu vua besukua be buka naebe amasuvaekuae vierafei.