Read Girawa Luk 2 Bible Online

Luk 2 - Girawa bible

Luk 2

¹Areme maza ije e Ogasitasi fu e ireobo rema ijia fu kiamo bu aesakae binobino e Romuko bu samuagiavo ijia e dana vae.

²Ro maza ije bu e danoeva ijia e Romuko e ireobo be e Kiriniasi fu aesakae Siria samuamo.

³Ijadufuo e boeje bune sidove buone bu nafiaeva ijia ive buone vajiaga bu isoekuae vae.

⁴Bu ijiege rekoga e Josofu fune bara Meri mesirina bune are Nasareti sakae Gareri guove ijia urina una are Betirieme sakae Judia guove ijia vae. Ijadufuo maeje e Josofu fu e Devidido uifari be ijadufuo fu Devido are Betirieme ijia ive fuone isoekiro vae. Ro bara Meri e Josofu fu abekono kuaeva ije fune e fudie.

⁵(null)

⁶Areme bu uria Betirieme kariva ijia maza ije Meri fu ame bietedufuo ije fune ruae.

⁷Ro are bu naodufuo ije fuka naebe mani ijadufuo bu kiavo bu una mave-kau ijiebuo are ijia vae. Areme bara Meri fune ame fari ije bietei. Fu bietena ugone ijia abe utima areme abena mavua guove ije bu mave-kau ire vajiavo ijia nujae. E mave-sifi samuagiavo ijiakiro anera ijiebuo vua ijene

⁸Ro maza ijia e mave-sifi samuagiavo ije budua bu are ijia mugu mave-sifi ije bu kena faere kirakuriaeva ije samuagianoeve.

⁹Bu ijiege renoejo ijia E Ireobo ijadufuo anera be fu bu oenoevo ijia ruae. Fu ijia ruakoga E Ireobo ijadufuo sanaema ije fu ijia sanamoga bu gana buka ireobo jumei.

¹⁰Rove anera ije fu uri kiae, Jade jumevo, ige na ruaeva ije na joefuo vua maeje abena ruae. Ijadufuo e boeje bu vua maege fiekuva buka oemareke.

¹¹Ijadufuo maeje ivia e Devidido sidove igia e ije e karauniadufuo ije bune bietei. Ro e ije bu bieteva ije fu e ije Godi fu kuaga fu ruakono kuaeva ijene.

¹²Ro ame ije ja izege fu gana vierafedufuo ije ijiege. Ja vaga ame ije bu abena ugone ijia utima abe mavua bu mave-kau ire vajiavo ijia nujaeva ja gakono kiae.

¹³Anera ije fu vua ijiege kuariama furikoga saroruba bu gake anera ma uruvana bu Godido dua oemarevo ije urukinu saove ijia ari rovo bu giae.

¹⁴Ro anera ije bu ari ruakinu dua be ijiege urui,No Godi e ije kabo gufia fino ije dabe aroeke. Ro kuke no vierafe Godire e fuone ije fu oemarejiamo ije ifejiana samuagiaga bu kafaena karinoekono kuae.

¹⁵Ijiege rena Godido anera ije bune arena una saove gufia ajia vakoga e ije mave-sifi samuagiavo ije bu una bue kuae, Roga no va Betirieme ijia ire ije rema ije E Ireobo fu kuaruema ijene gano kuae.

¹⁶Ijadufuo bune migegire usiaena vakuma Merikiro Josofu biedia areme gake ame ije fu mavua bu mave-kau ire vajiavo ijia namo bu gae. Areme bune urina ame ijadufuo vua ije Godido anera fu kuariaema ijene Merikiro Josofu kuaria areme urina e boeje Betirieme ijia kariva ijene kuariae.

¹⁷(null)

¹⁸Areme e boeje bu vua ije fievo buka oeseradiae ro kuke Meri fudua fu vua boeje bu kuaraeva ije fume oe fuone ijia vierafenoe.

¹⁹(null)

²⁰Areme e ije mave-sifi samuagiavo ije bune vua irere Godido anera bu kuariavo bu fiekinu giaeva ijadufuo uri Godi dabe aroena ive fuone abe ajiakinu bune una vae. Ro ire boeje bu fiekinu giaeva ije anera ijiebe kuariaeva ijene. Bu Jesu ive iva ijene

²¹Areme fura besu furikoga bu ame ije abe vajae surive fuone ije kana ufuna nuga nijae. Bune ijiege rena uri ive fuone bu naebe bieteko ijia Godido anera fu ina Jesu kuaema ijene i. Bu Jesu mesiri Godido Are ijia vaeva ijene

²²Areme Meri fu maza fuone romoga fu uri e Mosisido akae fu kuaema ijiege rena do ruekinu ire boeje rema furi. Areme Josofukiro Meri bu urina ame ije mesirina abe E Ireobo Godi makuae Jerusareme vae.

²³Ro ije fune buki akae ijia kuae, Ja ame fari amure nafekuva ni kena E Ireobo Godi vajano kuaema ijadufuo bu ijiege rei.

²⁴Ro kuke bu vaeva ije bu E Ireobo ijadufuo akae fu kuaema ijiege bu ume inokiro kena zinone ifaejekuae vae.

²⁵Ro sidove Jerusareme ijia e ove be ive fuone Simioni fu ijia fino. Ro fu e mukore be Godido vua mukoe vierafekinuro vame fuone maeje ijia nuvedianoeno. Ro kuke fu E Ije Godi fu kuaga fu e Isureroko ije karauniadufuo fu ruako kuaema ije samuamo. Ro Godido Kavene Akae ije fu fuosiki finoene.

²⁶Ro Kavene Akae fune ude Simioni kuae, Aeje a E Ije Godi fu kuaga fu e Isureroko ije karauniadufuo fu ruako kuaema a ije gana sone a baroneko kuae.

²⁷Areme Kavene Akae ijare Simioni mesirina Godido Are ijia aruna vakoga Jesudo orafa ije bu Jesu mesirina ijia aru vae. Bu aru vakoga fu izege Godido akae ije fu kuaema ijiege rei.

²⁸Simioni fu urina umui fuone ijia ame ije dabena abe Godi oemarejana ijiege kuae,

²⁹E Ireobo na baronekuva ije nane oemarekinu baroneke. Ijadufuo maeje na E Ije a kie fu e ume igia oenoeva ije karauniakono kiema ije nane gae. Ro fure vame maeje sanaema ije abena e Jiusi baki ije miake. Ro kuke fure e Isurerokobuo ive ije dabe ireobo rekono kuae.

³²(null)

³³Areme e Simioni fu vua ijiege kuaemoga Jesudo orafa ije bu vua izege fu ame ijadufuo kuaemo ije fievo buka oeseradiae.

³⁴Ijiege rena Simioni fune uri Josofukiro Meri daro miae. Areme fu una Meri kuae, Ame ige fu Godire kuamo fu ruae. Ro fure e Isureroko ije kame ataseke. Fure e ije eranebe bu fu ma vierafevo ije fu karauniakinu ro eranebe bu fu ijuonevo ije fu kame isekafiake. Ro fure ijiege rega e uruvana buka una fuina nigaraedufuo.

³⁵Ro kuke fure irere bu mauike nuriaete vierafenoevo ije kame e boeje ijiebuo niome ijia samadiredufuo. Ro rade oe one bu fare nafega aka oefiane ireobo abekono kuae.

³⁶Ro bara be Godido vua vierafena kuaemo ive fuone Ana fu e Fanuverodo kabae ro fu e Asado agane be. Ro bara ije fu baru fuone ijiaki juaevasia umuifague ro dikine inokiro ijiege fina ruoma areme baru ije fune baronei. Ro iviama bara ije fune juaevasia uruvana furi ijadufuo fune ma barasirei. Ro kuke fuka mu maza ire atokinu Godido Are ijia fina baname isoemo.

³⁷

³⁸Ijiege rena Simioni fu uria manina Merikiro Josofu vua kuariamo ijia bara Ana fudua fu ijia kekena uri Godido oemarei. Areme fune uri e boeje bu Jerusareme ijia kariva ijene kuariana kiae, E Ije Godi fu kuaga fu ro no karaunuodufuo ije fune ruaemano kiae. Josofukiro Meri bu una Nasareti vaeva ijene

³⁹Areme Josofukiro Meri bune uri ijiege E Ireobo Godido akae fu kuaema ijiege renoena furi areme bune una are Nasareti sakae Gareri guove ijia vae.

⁴⁰Ijiege rekoga ame ije fune ubaerena ka e daroki rei. Ro kuke vierafe fuone ije fuka ma ireobo remoga Godi fuka fu marejae. Jesu fu Godido Are ijia aru vaema ijene

⁴¹Ro juaevasia besubesu guove ijia Jesudo orafa ije bu Jerusareme ijia iro Fasova ije ikuae vako. Ro iro ije bu ivo ijadufuo maeje bu asaerafa buone ije bu are Ijifiti ijia isejavaekinu e ijiebuo imenoevo Godi fu karauniaema bu ije vierafevo.

⁴²Ijadufuo Jesu fune juaevasia tuero ijiege furikoga orafa fuone bu iro ije ikuae vae.

⁴³Bu va iro ije ina furi areme e boeje bune una are buone ijia vako rove Jesu fu Jerusareme ijia fi. Ro orafa fuone bu Jesu fu uria Jerusareme ijia fiko bu ruovo ije bu naebe vierafe.

⁴⁴Bu vierafero fute e boeje ijiebuo kafare ijia vakoro bu ijiege vierafekoga fune mu besu furi. Areme bu ijia sone urina una e buone ro kairafa fuone ijiebuo uve ijia fu rerei.

⁴⁵Bu rerenoega fu bakiga bu rerena una Jerusareme vae.

⁴⁶Areme maza inokubeke furiko ijia bu vaga fu Godido Are ijia aruna Jiusi e mamekanu ijena ijia fina vua bu kuaevo ije fiekinu duna binobino kuariamo bu gae.

⁴⁷Ro e boeje ijia kariva bu vua fuone maeje fu izege mukoreigia vierafekinu kuariamo ije fievo buka oe iseradiae.

⁴⁸Ro kuke orafa fuone budua bu ije gavo buka oeseradiae. Ijadufuo asie fuone fu uri kuae, Farino a irerefuo ijiege reko no a rerana oenoeko noneka oefiaduemano kuae.

⁴⁹Bu ijiege kuaravoga Jesu fu una kiae, Ja irerefuo na rerienoeve? Ja vua ije bu kuae, Naeje naka Asoe none ijadufuo Are ijia imekono kuaeva ije jabe vierafevano kiae? Jesu fu vua ijiege una orafa fuone kuariae rove bu vua fuone ije buka naebe mukoe fiena vierafe.

⁵⁰(null)

⁵¹Areme Jesu fune una orafa fuone ijena va Nasareti kekena uri ire boeje bu kuaravo ije iriniana renoe. Ro Meri fu irere boeje Jesu fu Jerusareme ijia remo fu giaema ije fume maza boeje oe fuone ijia vierafei.

⁵²Ijiege rena Jesu fuka ubaerekoga vierafe fuone ije duaku fuka ireobo rei. Ro kuke ire boeje fu renoema ije fuka Godi ro ema bu oemadiadufuo ijia renoe.