Read Girawa Luk 22 Bible Online

Luk 22 - Girawa bible

Luk 22

¹Areme maza ije e Jiusi bu Iro Fasova ijiakiro Burete Iriaeki Ire Isiti Baki ije bu ikinu Godi izege fu isuibe asaerafa buone karauniaema ije vierafevo ije fune ivuare.

²Ijadufuo e mamekanu Godi zinone ifaejevo ijiakiro e vua akae nijasiavo ije bu urina vame izege bu Jesu kanadufuo ije rerei. Rove vua ije bu naebe abe kuaena samadire ijadufuo maeje buka e boeje ijia ruaeva ije jumei.

³Areme Setani fu e Jesudo vua fiemo be e Judiasi Isikariotino kuavo ijadufuo oe ijia arimoga fuka oe ise vierafei

⁴Ijadufuo fune kekena va e mamekanu Godido zinone ifaejevo ijiakiro e Godido are juo karijo ijiebuo e mamekanu ijene izege fu Jesu abe miadufuo ijene kuariae.

⁵Ijadufuo e mamekanu ije bune oemarena uri kuae, A ijiege rekuma noka moni be a makono kuavoga fune vua ije abe marei. Areme fune urina mauike nuriete ijia izege fu Jesu abe e ani fuone miadufuo ijene e boeje sauikuriana renoe. Jesu fu e vua fuone fievo ijena ire radekuma ije ima ijene

⁶(null)

⁷Areme maza ije bu Burete Iriaeki Ire Isiti Baki ifaejevo ije fune ruae. Areme maza ijia e Jiusi ije bune Iro Fasova ije ikuae mave-sifi ame ije kaniakinu ire binobino kanafui.

⁸Ijadufuo Jesu fu uri Fitakiro Joni kiae, Ni va iro no maza Fasova ijia idufuo ije kanafuino kiae. Ro bu una kuae, Ro no va are izia ire ije kanafuikono kuae?

⁹(null)

¹⁰Bu ijiege kuavoga Jesu fu kiae, Igia fiefo. Ja va sidove ireobo viene bu aru vako ijia e be fu do jia ruomo ja biedufuo.

¹¹Ro ja biekuva ni e ije nuvena aru va e are koeki ije gafo. Ja gakuva ni kua, No e nijasiamo nuvuone fu kume are ije na e vua none fievo ijena Iro Fasova idufuo ije izieburega nijasuono kumemano kuafo.

¹²Ja ijiege kuaraga fure gire ado ijia ajiana guove ireobo be bune mukoreigia kanafuiva ije nijasiaga ni ijia ire boeje kanafuino kiae.

¹³Ijadufuo bune va gafia usiaena gake ire boeje fune izege Jesu fu kuariaema ijiege bune ijia naovoga bu urina Iro Fasova bu idufuo ije kanafui. Jesu e vua fuone fievo ijena ire radekuma ije ima ijene

¹⁴Areme maza ije fune abenoga Jesu fu e tuero vua fuone fievo ijena va are guove ijia aru fata irifo ijia kari ufuaenoe.

¹⁵Areme bune ire ikuvejo ijia Jesu fu urina kiae, Na vierafe rade naka isejavaeke. Rove iviama na ireobo vierafe naka ude jaena Iro Fasova ige ike.

¹⁶Ro ige fie, rade nabe una jaena ire ike. Ro ude naka irere Asoe none fu kuariemo na ruaeva ije rena furikuva na ijare rade una jaena ire ikono kiae.

¹⁷Jesu fu ijiege kuaria areme urina kafusi do vuaeni veseva ije abena Godido baname isoena oemarei. Areme fu abe una e vua fuone fievo ije miakinu kiae, Do vuaene ige abe jone ivajuonamifo.

¹⁸Ijadufuo maeje nabe una ijiege jaena do vuaeni ike. Ro na sone rade maza ije Godi fu e fuone ijiebuo oe ije samuagiamo ije ruomo ijia na una jaena ikono kiae.

¹⁹Areme fune una kuke urina burete ije abena Godido baname isoena oemare areme fune abe tuasena kena e vua fuone fievo ije vajiae. Fu vajiakinu kiae, Ire ige fu vajae surive none igeki na abena ja miave. Ijadufuo jadua ni maza boeje irere na renoeva ijiege renoekinu una na vierafenoeno kiae.

²⁰Areme fune kuke una kafusi ije do vuaeni usiaeva ije abe miakinu kiae, Vuaeni ige fu vame iviaeko ije Godi fu joefuo amaeridufuo ijadufuo nuga ijene. Ijadufuo na baronena kavuane none ije na joefuo usiaevo ijia ja vierafero nare vame jone amaerivo ja una Godina besu revaro ja ijiege vierafeke.

²¹Ro igia fie, e gure ja naena fata igia kariva ijia e be fu na abena una e ani ije miake.

²²Ro Ema ijiebuo Fari ige na baronekuva ije fune Godire ijiege vierafema ijadufuo na baroneke. Rove e ije erare fu na abe una e ani miamo ije fu iseko nika ireobo jumeno kiae.

²³Jesu fu ijiege kuariamoga e vua fuone fievo ije bu una bue kuae, E ige fute erare Jesu dabe una e ani ije miakuveno kuae? Erare e ireobo redufuo ijene

²⁴Areme e Jesudo vua fievo ije bune urina erare fu e ireobo redufuo ijene dabe bue kuaena sagui.

²⁵Ijadufuo Jesu fu una kiae, E kini ijiakiro e mamekanu ume igia daro abeva ije buka e buone ije vua gikikimana kuariakinu samuagiavo.

²⁶Rove na vierafe jade vame ije bu kenoevo ijiege renoevo. Ijadufuo erare fu e ireobo rekiro vierafekuma ije nika una e kabuaekabuaeki rena uri e fuone ijiebuo imene.

²⁷Ro na vua be bijana kuariako fiefo. E be fu fiko be fu ire afena vajako fu ino. Ijadufuo ja vierafega e izare fuka e anuigi? Na vierafe fu e ije fata ijia fino ijare fuka e anuigi. Rove igia fie. Naeje na e ije fu korofuo dabe e ireobo remo na e ijieki baki. Naeje na e ireobo jone rove name una ja nijasiaga ja giekina ja una e isesina igege rena e guebuo imeke.

²⁸Ro jaeje ja irufui ije na aru ruaeva ijia ja naebe na abuezie vae.

²⁹Ijadufuo Asoe none fu na kiega na E Ireobo rena e boeje samuagiavo ijiege na ja kiavono ni jadua ijiege e samuagiafo.

³⁰Ja ijiege rekina rade ja naena are ije Asoe none fu samuamo ijia fata maeje kena karike. Ja ijia karina irekiro do ikinu e mamekanu rena e Isureroko ijiebuo agane tuero ije samuagiano kiae. Fita bu Jesudo kuavo fu fema ijene

³¹Areme Jesu fu urina Saemoni kuae, Saemoni ige fiene. Fune Godire Setani kuaedo fu e ije ja vua none fievo ije biesiriake. Fu jone ja izege ma vierafevo ije biesiriana giaga erare fu uria na ma vierafero erare fu baki fu ijene giake.

³²Ro Saemoni, aeje nane oefuo baname isoena Godi kuaraedo fu ifejiaga one a ma vierafemo ije abe aredufuo. Ro a una oe dakudena na ma vierafemo ijia are una uviarafa one boeje ifejiaga bu giriesana darokuma ma vierafekono kuae.

³³Jesu fu ijiege kuaramoga Fita fu una kuae, E Ireobo na vierafe naneka samuae. Ijadufuo e bu a toenama dibure nujakuva nadua naka osiki isejavaena baronekono kuae.

³⁴Ro Jesu fu una kuae, Vua ige naka ma kuarave, a maza inokubeke bu noefuo kuarakuva a kiako na e ije naka naebe vierafevano kiake rade kukoruko fu kumekono kuae.

³⁵Areme Jesu fu una e vua fuone fievo boeje kiae, Ja maza ije na kiavo ja monikiro kamui ro tamagu baki usiae sidove besubesu ijia vaeva ije jabe ire binofuo zazaevano kiae? Ro bu una kuae, No ire bino no naebe zaezae ro ire boeje noneka manivono kuae.

³⁶Bu ijiege kuaravoga Jesu fu una kiae, Iviama ige fu maza iviaeko. Ijadufuo erare fu sinuome ro kamui be naejaejoga, ni abena farenoene. Ro erare fu sime bakuma fu seti fuone fu iduaega abiemo ijene abena una ebefuo fuaeve fu moni maga abena sime fuaevene.

³⁷Ijadufuo maeje isuibe vua ije bu buki akae ijia isoena kuae, E ije bu abena e iniemevo ijena mazievano kuaeva ije buka na abe ijiege rega fuka vua ijiakuma riarekono kiae.

³⁸Jesu fu ijiege kuariamoga e vua fuone fievo ije bu una kuae, E Ireobo, no sime inokiro igifureki naevano kuae. Ro fu una kiae, Vua ije fune sibano jade una kuaevono kiae. Jesu fu Uruo Orivi ijia baname isoema ijene

³⁹Jesu fu vua nijasiama furi areme fune izege fu renoeno ijiege fune sidove Jerusareme arena una Uruo Orivi manino ijia vako. Ijadufuo fu ijia vakoga e vua fuone fievo ije bune fuina ijia vae.

⁴⁰Bu vakuma uruo Orivi manino ijia usiaevoga fu kiae, Ni kojo Godi baname isoekina Setani fu biesiriakuma jabe mamoekono kiae.

⁴¹Fu ijiege kuariama areme fune ijia uniana sibane mumabo ijia fuosukua baname isoekiro vae.

⁴²Jesu fune va kekena atogesana Godi baname isoena kuae, Ate Asoeno, a vierafega fune marekuma ni vajae fiane ige na abekuvejo ijiakiro na baronekuvejo ije abe vane. Ro baga na vierafeva ije arekiro ni one a vierafema ijia reno kuae.

⁴³Areme Godido anera be fu arina fu daro mae.

⁴⁴Ro kavene fuone fuka vajae irufui ijadufuo fune darokuma baname isoemoga fuare ijare kavuane igege vajae fuone ijia usiae.

⁴⁵Jesu fune ijiege baname isoema furino fu una e vua fuone fievo ije kariva ijia vaga bune ni naoe. Ijadufuo maeje buka Jesudo oefiane ireobo abevo ijadufuo buka aemiae.

⁴⁶Bu ni naoevaga Jesu fu kekena kiae, Ja irerefuo ni naove? Urina baname isoena Godi kuaraekina Setani fu jone ja ma vierafevo ije biesiria giakuma jabe mamoekono kiae. Jesu bu farena toeva ijene

⁴⁷Jesu fu uria manina e vua fuone fievo ije vua kuariamo ijia e Judasi fune e azokenoejo ijiakiro e uruvana gue kaenamiana ruoma ijia kekena uri Jesu dabe uimi.

⁴⁸Fu ijiege remoga Jesu fu una kuae, Judasi a vierafe a Ema ijiebuo Fari ige naeje a vame ijieki ijia uimidiena abe e ani none ije miakiro a ijiege remano kuae?

⁴⁹Areme e Jesudo vua fievo ije bu gake e bune Jesu farena tokuvejoga bu urina Jesu kuae, E Ireobo nobe sime igia kena buina bijaekono kuae?

⁵⁰Ro e vua fuone fiemo be fu ijia manido fu uri sime fuone fare medirui. Fu mediruna dabe e be e Godido zinone ifaejemo ijadufuo imeno ije adane fuone maeneke ije kana daturae.

⁵¹Fu ijiege remoga Jesu fu una kuae, Eko ije fune sibano areno kiae. Areme fu una e ijadufuo adane ije abena una mujaejia bijamoga fune una marei.

⁵²Areme fu una e Godido zinone ifaejevo ijiebuo e mamekanu ijiakiro e Godido Are juokarijo ijiebuo e mamekanu ijiakina e aeko ijiebuo e mamekanu ije bu fu tokuae ruaeva ije kiae, Nana e kaniakinu iserenoejo baki. Rove ja irerefuo jaka simekiro magu kena na rerie ruae?

⁵³Na maza boeje naka Godido Are ijia aruna vua kuariakinu nijasianoe rove ja naebe ijia na toenamie. Rove na vierafe maza ige fune maza jone. Ijadufuo fune Setanire ja samuagiamo ijadufuo ja na tonamiekuae ruaevano kiae. Fita bu Jesudo kuavo fuka fema ijene

⁵⁴Areme bune Jesu tona mesiri e ireobo Godido zinone ifaejemo ijadufuo are ijia aruna vakoga Fita fu mauike giagiakinu nuvediana aru vae.

⁵⁵Ro are ukua ijia bu miane ireobo ifaeje ijadufuo Fita fune va e ijena miane ijia iruana manine.

⁵⁶Ro bara be ijia imeno ije fu uri Fita gana urukeigia verima areme kiae, E ige na vierafega fu ebe Jesuki oenoeno ijeno kiae. Fu ijiege kiamoga Fita fuka uri fena kiae, Bara gare nana e ije a kuaemo ije naka naebe vierafevano kiae.

⁵⁷(null)

⁵⁸Areme maza isekube furikoga e be fudua fu keke gana kuae, Eko na vierafe adua a e be fuosiki oenoeno na gaevano kuae. Rove Fita fu una kuke fena kuae, Nanaka ma kuarave na e ije a kuaemo ije na bigaevano kuae.

⁵⁹Areme maza isekube furikoga e be fu kuke kekena kukuma kuae, E ige fu fuosiki oenoeno none gana vierafei. Ijadufuo maeje Jesu fu are Gareri ijia ruaema ijadufuo e ige fu e ijekono kumei.

⁶⁰Rove Fita fuka una kuae, E gare na vua irere a kuaemo ije naka naebe vierafevano kuae. Fita fu uria vua ijiege kuariamo ijia kukoruko fu kumei.

⁶¹Ijiege rena kukoruko fu ijia kumenoga E Ireobo fu dakudena Fita gamoga fu ijia una E Ireobo vua ije fu ude kuaraema ije vierafei. Fu vua ije fu kuarana kua, A e bu noefuo kuarakuva a maza inokubeke feke kukoruko fu ijia kumekono kuaema fu ijene vierafei.

⁶²Ijadufuo Fita fuka ireobo oefiaemoga fu kekena makave ijia ka urukeigia nimei.

⁶³Ro e ije juo karijo bu Jesu mesirina vako ije bu uri fu dabe varaemena kanakinu ijiege rei.

⁶⁴Areme bu uri ugone fae be dabe niome fuone ijia kiraeja areme uri uikubae ijia kanae. Bu kanakinu kuae, A vierafe erare a kanaejoga ni kuaruo no fieno kuae.

⁶⁵Bu ijiege rekinu uri arafirina vua ise binobino fuesina kuae. Bu Jesu mesirina e mamekanu ijiebuo vaeva ijene

⁶⁶Areme fune ve irasemoga e aeko ijiebuo e mamekanu ijiakiro e Godi zinone ifaejevo ijiebuo e mamekanu ro e vua akae nijasiavo ije bu una besu afui. Bu besu afuikoga bu Jesu mesirina ijia ruae.

⁶⁷Areme e ije urina Jesu kuae, A vierafega ane ma e ije Godi fu kuamo fu ume igia e boeje karauniakiro ruaema ijega ni kuaruo no fieno kuae. Bu ijiege kuavoga fu una kiae, Ro ja vierafe na keno kiakuva jabe na ma vierafeke? Ro kuke na duna ja kiakuva jabe una gue kuarieke?

⁶⁸(null)

⁶⁹Ro igia fiefo, na ivia igia una gafege ije Ema ijiebuo Fari ige naeje na Godi E Daroki ijadufuo umui maeneke ijia fikono kiae.

⁷⁰Jesu fu ijiege kuariamoga e mamekanu boeje bu una kuae, Ijiekido no vierafe abite ane ma Godido Farino kuae. Ro fu una kiae, Vua ije jane ma kuae naeje na ma Godido Farino kiae.

⁷¹Ijadufuo e boeje buka una urukeigia vijena kumei, Fune korofuo ijifureki vua isema kuaena kuae, Nana Godido Farino kuaemo none fie. Ijadufuo no vierafega no una vua bino irere fiekuva bakino kumei.