Read Girawa Luk 4 Bible Online

Luk 4 - Girawa bible

Luk 4

¹Maza ije Joni fu Do Jodeni ijia Jesu do ruorama furikoga Kavene Akae fu arina Jesu niro areme fune mesirina ae sao ijia vae.

²Areme Setani fune mu foti (40) ijiege Jesu biesirinoe. Ro maza ije fu ae sao ijia finoema ije ire bino fu naebe i ijadufuo fuka vasia mukoreigia oe.

³Areme Setani fu kekena Jesu kuae, A vierafega ane ma Godido Farikuma ni mune gure kuaga fu una ire burete rega a kena ino kuae.

⁴Setani fu ijiege kuarae rove Jesu fu una kuae,Godido buki akae bu isoeva ijia fu kuae, Barubara bube maza boeje burete ijiaru inoeke. Ro buka Godido vua ijiaru vierafena renoekono kuae.

⁵Areme Setani fune una Jesu mesirina nafare ireobo be ijadufuo kubi ijia ajia vae. Fu ijia ajia mani areme uri aesakae irore boege e mamekanu binobino bu samuagiavo ijiakiro ire boeje nijae.

⁶Areme fune una Jesu kuae, Ire boege a giaema ije nare daro none ijia samuagiavo. Ijadufuo a na augesana baname isoena aroriekuma na kuaga are ire boege samuagiakono kuae.

⁸Rove Jesu fu una kuae, Isuibe buki akae bu isoeva ijia Godi fu kuae,Janika E Ireobo Godi jone ijiaru fuone augesana baname isoena aroriekinu fuefuo imenoeno kuae.

⁹Areme Setani fune una kuke Jesu mesirina va Jerusareme Godido Are ireobo bu saeva kubi ijia nujae. Fu ijia ajia manikoga Setani fu kuae, A vierafega ane ma Godido Farikuma ni umakoena ume gamia arine.

¹⁰Ijadufuo maeje isuibe buki akae bu isoeva ijia Godi fu kuae,Godire anera fuone boeje kiaga bu a samuagake. Ijadufuo a umakoekuma bure dabena ari vakuma sakaedo ijia nujaga abe arina oe kananamike. Ro kuke dia one ije abe kena mune ijia nizukiakono kuae.

¹²Rove Jesu fu una kuke Setani kuae, Isuibe buki akae bu isoeva ijia Godi fu kuae,Ade Godi E Ireobo one ije biesirimono kuae.

¹³Setani fu Jesu dabe ijiege biesirinoena furi areme fu vierafero fu vaekina maza ma be abekuma fu una ro biesirikiro fu ije vierafei. Ijadufuo fune naebe are vakiro vierafe ro fune maza aokube Jesu nujana vae. Jesu Gareri ijia i fuone zinuevena menoema ijene

¹⁴Areme Jesu fu sakae Gareri guove ije fu una ruaema ije fuka Kavene Akae ijare dabe ninarumoga fu daro abena oenoekinu i fuone mei. Fu va sidove besubesu e Jiusibuo are bu afuina vua kuaevo ijia aruna vua nijasianoe. Fu ijiege renoenoga e boeje bu vua fuone ije fiena uri dabe aroe. E Nasaretiko ijiebe Jesu ijuoneva ijene

¹⁶Areme Jesu fune una kuke Nasareti are ije fu ijia finokoga fu ubaerema ijia vae. Ro maza ije e Jiusi bu mauike karina Godi baname isoevo ijia Jesu fune izege fu maza boeje renoeno ijiege fune una are bu afuina vua kuaevo ijia aru vae. Areme fune kiamo bu Asaea e Godido vua vierafena kuaemo ijadufuo buki ijene abena mae. Bu abe mavoga fu buki kafare be ijia irana vua be bu ijiege isoeva ijene dae. Ro vua ije bu isoeva ije fu ijiege kuae,

¹⁸Godido Kavene ije fune na nirokie. Ijadufuo maeje fune Godire na umui bijiena kie, Ni vua none maeje abe va e ije isema karinoejo ije kuariane. Ro kuke ni va e ije dibure karijo ijiakina e ni kuzeki ije ro kuke e ije erabe bu e ise ijiebe samuagiavo ijene karauniane.

¹⁹Ro kuke ni va e boeje kuariana kia, Maza ije Godi E Ireobo fu ja ma rejiadufuo ije fune igifureki ruaemano kiano kuae.

²⁰Jesu fu buki ije da furi areme fune abe una e buki samuamo ije mana fune una ari fi. Fu una ari finoga e boeje are guove ijia kariva ije buka Jesu uruke veri.

²¹Areme Jesu fune zinuevena uri vua kuariana kiae, Buki kafare ige na davo ja fieva ije ivia maza ige fune ijiakuma riaremano kiae.

²²E boeje bune mauikeigia karina vua fuone maeje fu itire fuone ijia kuaemo ije fievo buka oeseradiae. Ijadufuo e boeje bu una bue kuae, E gure fu e Josofudo fari ije none vierafei. Rove fu izege vua ka mukore gure kuaruomono kuae?

²³Bu ijiege kuaevoga Jesu fu una kiae, Na giaga ja vua be ijiege kuariekuae vierafe. Ja kuae, A e gue karauniamo ijadufuo ni koro oe kenujanamine. Ro ni izege a are Kafoniamu ijia ire ije a renoeno no fieva ijiege una are one ma igia rega no gana a ma vierafeno kiekuae vierafe.

²⁴Rove na ige kuariako ni fiefo. E Godido vua vierafena kuaevo ije e aeko buone ma ije bu giana oemarejiavo baki.

²⁵Ro igia fie. Maza ije e Eraeja fu aesakae Isurero fima ijia bara amune uruvana bu ijia oenoe. Ro maza ijia ve fu naebe dae ro fuka ve marena vakuma juaevasia inokubeke ro asame sibaneke ijiege furi. Ijadufuo ire idufuo boeje funeka saerena furikoga are irore boeje funeka vasia ireobo ijia kekei.

²⁶Areme bara amune boeje buka vasia abei rove Godi fu naebe Iraeja kuamo fu va bara amune ije ifejiane. Ro fume kuamoga fu va are Zarefeti Saedoni guove ijia bara amune besu ifejae.

²⁷Ro kuke una Iraesa e Godido vua vierafena kuaemo ijadufuo mazani ijia e uruvana are Isurero ijia kariva ije buka katire reforasino kuavo ije abei. Rove Godi fu naebe e Iraesa kuamo fu va e ije ifejiana karauniae. Ro fume kuamo fu va e Nemani aesakae Siria ijia fino ije fuosukua kenujaemano kiae.

²⁸Jesu fu ijiege kuariamoga e boeje ijia kariva bu vua ije fievo buka defarudiae.

²⁹Ijadufuo bu urina Jesu farena dabe usiae sidove makave ijia meruna dabe uruo ijia abiekuae vae.

³⁰Rove Jesu fuka ijia uniakona uri e boeje ijiebuo nidore ijia vako bu ijia arei. Jesu fu e kavene ise ijare dabe nironoeno ije kenujaema ijene

³¹Areme Jesu fune vakuma are Kafoniamu aesakae Gareri guove ijia keke. Fu ijia kekena maza ije bu mauike karina Godido baname isoevo ijia va e Jiusibuo are bu afuivo ijia aruna e boeje vua nijasiae.

³²Fu ijiege vua nijasiamoga e boeje bu vua fuone fu nijasiamo ije fievo buka oeseradiae ijadufuo maeje vua fuone fuka ma daroki.

³³Ro are guove ijia e be fu kavene ise ijare niromo ije fu ijia fine. Ijadufuo fu urina urukeigia Jesu vijena kume, Jesu e Nasaretiko gare, a noeje kame izege rekiro vierafe? A ige a ruaema abite no kame isekafuokiro ruae. Na vierafega aeje aka Godido e Akae ijeno kumei.

³⁵E ije fu ijiege kumenoga Jesu fu una kavene ise ije kuriaerena kuae, Vua ije a kuaemo ije arega itibirena keke ruvano kuae. Areme kavene ise ije fune urina e ije kana dabe e boeje ijiebuo nidua ijia akoe. Ro fu naebe una ire ise bino fuone rei ro fume mauike keke vae.

³⁶Ijiege rena kavene ise ije fune kekena vakoga e ijia kariva bu ije gavo buka oeseradiamo bu una bue ganami. Areme bu kuaevo, Vua ije fuka daroki ijadufuo e gure fu darokuma kavene ise ije kiaga bu usiae vakono kuae.

³⁷Jesu fu ijiege remoga e boeje bu uri vua fuone dabe kuaena are irore ijia oenoe. Jesu e boeje karauniaema ijene

³⁸Areme Jesu fune are ije arena una Saemonido are ijia vae. Ro Saemonido bara ijadufuo asie ije fuka vajae fete mame. Ijadufuo bu vierafe bu Jesu kuaga fu ifejakiro bu ruae.

³⁹Bu ro Jesu kuaravoga fune va bara ije namo ivuake ijia manime uri vajae fete ije urimo ije kuamoga fune bara ije arena vae. Areme bara ije fune urina bu ifejiana ire vajiakinu samuagiae.

⁴⁰Areme rade maza nako ijia e gue bu kairafa buone adame binobino abevo ije kaenamiana Jesudo rovo fu e besubesu umui nigofo naejiakinu e boeje karauniae.

⁴¹Jesu fu ijiege rekinu kuke kavene ise uruvana bu e nirokiavo ije kuriaerena kiamo bu e ije arena usiae vae. Bu usiae vakinu vijena kumei, E gare no vierafega aeje aka ma Godido Farino kumei. Rove Jesu fuka kuriaerena kiamoga bu naebe una vua bino kuae. Ijadufuo maeje bune vierafega Jesu fune ma E Ije Godi fu kuamo fu e boeje karauniakiro ruaema ijene.

⁴²Areme ve fune iko irasemoga Jesu fune sidove ijene arena uri are etura ijia vae. Fu ijia vakoga e boeje bu uri fu rerenoena bie areme buka uri ni veri. Ijadufuo maeje bu vierafero bigake fu una uniana vakiro buka fu vafukinu ni verinoe.

⁴³Ijadufuo fu urina kiae, Na vierafe naka sidove gue ijia Godido vua maeje izege fu maza rade korufuo e fuone ije samuagiadufuo ijene abe kuariake. Ijadufuo maeje Godi fu ijadufuo kiemo na ruaevano kiae.

⁴⁴Jesu fu ijiege kuaria areme fune urina sidove boeje guove ijia oenoekinu e Jiusibuo are besubesu bu afuivo ijia vua maeje dabe e boeje kuarianoe.