Read Girawa Jon 14 Bible Online

Jon 14 - Girawa bible

Jon 14

¹Areme Jesu fu una kiae, Jade uruvana vierafekinu oefiane abekiro nime Godi ma vierafekinu ro nadua ma vierafefo.

²Ro are gufe asoe none fu fino ije fuka guove boeje. Ijadufuo na vakuva naka are jone bino amaeriake. Ro na Asoe none ijadufuo are guove ije fu naebe ireobobitie na vua ije nabe kuariake. Rove are ije fuka ma ireobo ijadufuo na ije kuariave.

³Na ude ajia va are jone amaeri areme na una ro kaenamia na fivo ijia vaga jadua ja naena ijia karike.

⁴Ro are ije na vako ijadufuo vame ije jane vierafedo ja ijia nuvediena vuakono kiae.

⁵Jesu fu ijiege kuariamoga e Tomasi fu una kuae, E Ireobo no are a vakuveno ije noka naebe vierafei. Ijadufuo no izege vame ije mukoe vierafena ijia nuveda vuakono kuae.

⁶Rove Jesu fu una kuae, Tomasi, naeje na vame maeje ro vua maeje ro ma karivako ijene. Ijadufuo vame maeje Asoe none fu fino ijia vadufuo ije fune vame besu ijiaru. Ro vame ije jane duvado none ijia vake.

⁷Ro ja na mukoe giena vierafekuva ja kuke Asoe none ije gana vierafeke. Rove iviama ja fuje jane vierafeva ijadufuo jane gaevano kiae.

⁸Ijadufuo e Firifi fu uri kuae, E Ireobo no vierafega aka Asoe one ije nijasuoga no ga fu oemaduono kuae.

⁹Rove Jesu fu una kuae, Firifi! Na maza boeje naka jaena oenoe rove jaka uria na naebe mukoreigia giena vierafei. Naka ma kuariave, erare fune na giema ije fu Asoe none fune gae. Ro ja irerefuo kie, Ni Asoe one nijasuo no gano kieve?

¹⁰Firifi, a na giemo ijadufuo ni ma vierafero naeje na maza boeje Asoe none ijiaki finoeve. Ro Asoe none fu nosiki finoenoro ijiege vierafeno kuae. Areme Jesu fu una e vua fuone fievo boeje kiae, Vua boeje na kuariavo ije name nare kuariavo baki. Ro vua ije fu Asoe none ijadufuo vua. Ijadufuo i irere na menoejo ije fu Asoe none ije fu nosiki fino ijare i fuone ije mene.

¹¹Ro igia fie, naeje na Asoe none ijiaki finoe ro fuje fu nosiki finoeno ijadufuo ja ije ma vierafedufuo. Ro ja naebe na ma vierafekuva ni i fuone na menoejo ijia giena una na ma vierafefo.

¹²Na vua ige naka ma kuariave, erare na ma vierafekuma e ije fudua fu i ige na menoejo ije menoeke. Ro rade na una Asoe none fino ijia vakuva e ije bu iviama i isesina menoejo ije buka i mamekanu bino meke.

¹³Ro ja ire binofuo ive none ijia kiekuva naka ifejiake. Na ijiege ifejiaga e bu ijia giana una Asoe none dabe aroeke. Godido Kavene Akae fu abe nujaejuoko kuema ijene

¹⁵Ro ja na mukoe oetuakuva ja vua none boeje mukoe fiena iriniana renoeke.

¹⁶Ja ijiege renoekuva na Asoe none kuaga fu e ije ja ifejiadufuo ije abe nujaejiaga fu jaena maza boeje fi vake.

¹⁷Ro e ijeja Godido Kavene Akae maeje ijene. Ro e ume ige ise renoejo ije bu Kavene Akae ije abekuva baki. Ijadufuo maeje fuje bu gavo baki ro kuke bu fu mukoe vierafevo baki. Rove jaeje jane fu mukoe vierafe ijadufuo maeje fu oe jone ijia fikinu ro maza boeje jaena oenoeno.

¹⁸Ro na ja nabe uniako vaga ja josukua karinoeke ro na una ja kariva ijia ruake.

¹⁹E ume ige ise renoejo ije bu maza sibaneke ijiaru na bube gieke ro jaeje ja una na gieke. Ro naeje na baronena una urina ijia fivako ijadufuo jadua ja ijia karivake.

²⁰Ijadufuo maza ije abekuma ja ijia giena vierafero naeje na Asoe none ijiaki finoe. Ro jaeje ja naena karinoe ro nana oe jone ijia finoevoro ja ijiege vierafeke.

²¹Ro erare bu vua none boeje na kuariavo ije mukoe fiena iriniavo e ije bu na oetuavo. Ro e ije na mukoe oetuavo ije Asoe none fu e ije mukoe oetuake. Ro nadua na e ije mukoe oetuakinuro naka kono abe e besubesu nijasiaga bu na e izeki ije bu giena vierafekono kiae.

²²Jesu fu vua ije kuae furinoga e Judasi e ije fu Jesu abena e Jiusi miaema ije bakiro e Judasi be ijare urina Jesu kuae, E Ireobo a izeredo a una no nuvuosukua nijasuoga no a e izeki ije gana vierafekiro e ije ise renoejo ije a arekono kuae?

²³Fu ijiege kuamoga Jesu fu una kuae, Ro erare bu na oetuakuva bu vua none ije mukoe fiena iriniaga Asoe none fu e ije oetuake. Ro kuke nadua na Asoe none ijiaki maza boeje oe buone ijia karinoeke.

²⁴Ro erarebe bu naebe na oetuakuva bube vua none ije mukoe fiena iriniake. Ro vua ije ja fieko na kuariaeva ije fu vua none baki. Ro vua boeje bu Asoe none gufe fu kiemo na ruaeva ijadufuo vua.

²⁵Na vua boeje na uria ige na jaena ume igia oenoevo na ijia kuariave.

²⁶Ro e ije fu ja ifejiadufuo ije Godido Kavene Akae ijene. Ro ije fu Asoe none ijare ive none ijia kuaga fu ari jone ruake. Fure arina ire boeje nijasiaga ja vua boeje na kuariaeva ije jabe totekiro ja mukoe vierafenoeke.

²⁷Nane vakuve ijadufuo na daro miaga ja oemarekinu kafaena karinoke. Ro vame ijiege kafaena karivo ijieki be ja ume igia gakuva baki. Ijadufuo jade uruvana oefiane abekinu jumevo.

²⁸Ro vua ije na vaekiro una ruadufuo ije nane kuariavo jane fie. Ro ja na mukoe oetuakuva jaka none oemareke na una Asoe none fu fino ijia vake. Ijadufuo maeje Asoe none fuka e anuigi fure na asidie.

²⁹Na vua boeje na ude kuariaekina ire maeje bu rade rega ja giana ma vierafeke.

³⁰Na vierafe nabe jaena uruvana fina vua kuariake. Ijadufuo maeje Setani e ije ume ige samuamo ije fune ruome. Setani fu daro none fu asima baki. Rove naka Asoe irere fu kuariemo na ije irinana renoeve. Na ijiege renoega e ume ige bu ijia giena vierafero naka Asoe none oetuavoro bu ijiege vierafekono kiae. Jesu fu vua ijiege kuaria areme kiae, Ni uriga no are ige arena vano kiae.