Read Girawa Jon 2 Bible Online

Jon 2 - Girawa bible

Jon 2

¹Areme mu inokiro furinoga bu are Keina sakae Gareri guove ijia maninamikuae iro ireobo be ivoga Jesudo asie ije fu ijia vae. Ro Jesukiro e vua fuone fievo ije budua bu iro ije sarekuae kiavo bune ijia vae.

³E boeje bune iro ije ikinu do vuaeni ina vakuma vuaeni ije fune furi. Ijadufuo Jesudo asie ije fune uri Jesu kuae, E ije do vuaeni bu ivo ije fune furimano kuae.

⁴Rove Jesu fu una kuae, Asieno a irerefuo na ijiege kuarieme? Na ire boeje nane vierafe rove na maza none na zinuevena i none medufuo ije fu naebe ruaemano kuae.

⁵Fu ijiege kuaramoga Jesudo asie ije fune una e ije bu ire karina e ije vajiavo ije kiae, Ni irere Jesu fu kuariamo ije mukoreigia fiena reno kiae.

⁶Ro are ije bu karina ire ivo ivuake ije bu sukore mamekanu umui fague ro dikine besu ijiege ijia nae. Ijadufuo maeje e Jiusi ijiebuo akae ije bu vierafero bu do ruevo ije bune Godido nidua ijia maturaevoro bu ijiege vierafe. Ijadufuo bu sukore mamekanu ije kena do jiana ijia nae.

⁷Ijadufuo Jesu fu uri e ijia imevo ije kiae, Ni sukore ige do jiana usiano kiae. Fu ijiege kuariamoga bune do jiana usiavoga boeje buneka iritoeje.

⁸Areme fune una kiae, Nine sukore guria do ije bino jiana va e gafe iro ige samuamo ije vajano kiae.

⁹Ijadufuo e imevo bune urina do gue vesena va e iro ije samuamo ije vajae. Areme e ije fu do ije kena i fieke fuka vuaeni mukore. Ro e ije fu do ije bu izia vesena ruaeva ije fu naebe vierafei. (Ro bune e ije do vese vaeva ijiebe bu izia vesena vaeva ije bune vierafei). Ijadufuo e iro samuamo ije fune e ije bara abema ije kuae, No vame nuvuone no kevo ije fu be. No vuaeni mukore no ude ikinu e boeje vajiama furiga no sone rade vuaeni sibaneke maeje ivo. Rove aeje a vuaeni maeje a abe nija fina rade abe vese vajuemano kuae.

¹¹Jesu ire sumiki ije fu zinuevena remoga e boeje bu gaeva ije fu are Keina sakae Gareri guove ijia rei. Fu are ijia vame fuone sanaema ije remoga e boeje bu gae. Ro e vua fuone fievo boeje bu ijia gana uri fu ma vierafei.

¹²Areme Jesukina asie fuone ro uviarafa fuone ijiakina e vua fuone fievo ije bune urina vakuma are Kafoniamu ijia usiaena mu sibaneke ijia kari. Jesu fu Godido Are ijia aru vaema ijene

¹³Areme e Jiusi ijiebuo mazani ije bu kua Fasovano kuavo ije fune ivuare ijadufuo Jesu fune Jerusareme ijia vae. Ro iro Fasova ijadufuo maeje e Jiusi bu iro ije ikinu izege asaerafa buone bu aesakae Ijifiti ijia imekinu isejavaevoga Godi fu karauniaema ije vierafevo.

¹⁴Jesu fune va Jerusareme kekena Godido Are ijia aruna gake e boeje bu ijia aruna fanuve kaukina sifi ro ume ije kena zinonefuo una e guebuo fuaeveve. Ro kuke e gue bu fata ijia karina moni dana vajuenamivo fu giae.

¹⁵Ijadufuo fu urina ine dabe ifiamo bu usiae subikoga fu e ijiebuo fata ije kame kuderiana moni buone kame didue korei.

¹⁶Areme fu una e ije karina ume fuaevejo ije kiae, E gurie ume jone kaenamiana usiae vafo. Ro Asoe none ijadufuo Are ige ja dabe makete igege amaerivo ije areno kiae.

¹⁷Jesu fu ijiege remoga e vua fuone fievo ije bu una izege Godido vua ije bu isuibe buki akae ijia isoeva ije vierafei. Ro vua ije bu isoeva ije fu ijiege kuae,O Godi, na Are one ije ireobo oetuavo ije oe none fuka miane igege naeno kuae.

¹⁸Jesu fu ijiege remoga e Jiusibuo e mamekanu ije bu una kuae, Aeje a erare daro maema ijadufuo a no kuriaereme? Ni ire sumiki be rega no ijia gana vierafero a daro namo ijadufuo a ijiege renoenoro no ijiege vierafeno kuae.

¹⁹Areme Jesu fu una kiae, Ja Godido Are ireobo ige faraekuva na mu inokubeke guove ijia una sa furikono kiae.

²⁰Fu ijiege kuariamoga bu una kuae, Are ige no juaevasia foti sigisi (46) guove ijia sae. Rove a kuae na mu inokubeke una sa furikono kuaema ije a izege rekono kuae?

²¹Rove Jesu vua ije fu ijiege kuaema ije fu ma Godido Are ijadufuo kuaema baki. Ro fu vajae fuone ijadufuo ijiege bijana kuaemo e Jiusi ije buka naebe mukoe vierafei.

²²Ro rade Jesu fu baronena mu inokubeke furiko fu una urimoga e vua fuone fievo ije bu ijia sone una vua ije fu Godido Are ijia bija kuaema ije vierafei. Areme bu ijia una Jesudo vua fu kuaema ijiakiro Godido buki akae ije ma vierafei.

²³Jesu fu iro Fasova bu ivo ijia fu Jerusareme ijia fikinu ire sumiki boeje renoenoga e boeje bu ijia giana fu ma vierafei.

²⁴Jesu fu e boeje ijiebuo oe ije fune giae. Ijadufuo fu erare una ema izege bu vierafena kenoejo ijene nijaekuva baki. Ijadufuo fu vame fuone maeje fu naebe abe samadirejiamo bu gae.