Read Girawa Jon 5 Bible Online

Jon 5 - Girawa bible

Jon 5

¹Areme maza sibaneke furikoga Jesu fune una Jerusareme ijia e Jiusi bu afuina iro ijo ijia vae.

²Ro sidove Jerusareme viene ireobo be bu kua Sifi Vieneno kuavo ije ivuake ijia do be fu ijia nafue. Ro do ije e Iburukobuo isama ijia bu kua Betezatano kuavo. Ro do ije nafuema irifo ije bu are isesina bino e bu ijia karidufuo ije sa ufuaenoena arei.

³Ijadufuo e adagi ijiakiro e dia ise ro ni kuzeki ro vajae gareva uruvana bu ijia naove. Ro e be fuka juaevasia uruvana adame abema ijare ijia name.

⁶Ijadufuo Jesu fu keke e ije namo ije gana vierafero e ije fuka isuibe adame abena ijia namoro fu ijiege vierafei. Ijadufuo fu urina kuae, Eko a vierafe adame one fuka migegire madakiro a ijiege vierafemano kuae?

⁷Jesu fu ijiege kuaramoga e adagi ije fu una kuae, E Ireobo, naeje fu erare umuikiega na do gure avaemo ijia ruekuva baki. Na do gure fu iko avaega na ruekiro urivo ije bune e guebe ude asidiena ruega naeje na ijia arevono kuae.

⁸Fu ijiege kuaramoga Jesu fu una kuae, Ni urina suve one ije ke datena vano kuae.

⁹Areme e ijadufuo adame ije funeka saroruba maemoga fu uri suve fuone ije ke datena fune una are fuone vakiro vae. Ro Jesu e adagi ije fu kuamo fu suve kena date vaema ije fu maza ije e Jiusi bu mauike karina Godido baname isoevo ijia ijiege rei.

¹⁰Areme e Jiusibuo e mamekanu gue bu usiaena e ije gana kuae, Ivia maza ige fuka akae no mauike karijo ijadufuo no maza ije nobe ire bino kena oenoeke. Ijadufuo no vierafe suve guraeje a ke datena ruomo ije aka akae ije dabe tuasemono kuae

¹¹Rove e adagi ije fu una kiae, Na e ije fu amaeriema ijare kie ni suve one ije ke datena vano kiema ijadufuo na ije abena ruovono kiae.

¹²Fu ijiege kuariamoga bu una kuae, Ro e ije erare kuaga a suve ije ke datena ruomono kuae?

¹³Rove e adagi ije fu e ije fu amaerima ije fuka naebe mukoe vierafe. Ijadufuo maeje buka e uruvana ijia afuiva ijadufuo Jesu fune migegire e kafare ijia vako fu naebe mukoreigia gae.

¹⁴Areme Jesu fu rade una Godido Are ireobo bu baname isoevo ijia e ije fu amaerima ije bie. Fu biena kuae, Eko vajae one guraeje funeka una mukoreigia maradae ijadufuo ade rade una kuke va ise bino renoeno. Ro a faememarena una ise bino renoekuma ire ka ma ise be fu una one rega a gakono kuae.

¹⁵Areme e ije fune va e Jiusibuo e mamekanu ije kuariana kiae, E ije fu Jesure na amaeriemano kiae.

¹⁶Ijadufuo e mamekanu ije bune uri vame ije Jesu fu rema ijadufuo una vua ise bino fuesina kuae. Ijadufuo maeje Jesu fu maza akae ije e Jiusi bu mauike karina Godi baname isoevo ijia e adagi ije amaerima ijadufuo bu ijiege rei.

¹⁷Bu ijiege kuaevoga Jesu fune giana una kiae, Na Asoe none ije fuka maza boeje imeno ijadufuo na vierafe nadua naka maza boeje imekono kiae.

¹⁸Jesu fu vua ijiege kuaemoga e Jiusibuo e mamekanu ije buka uruke defarudiamoga bu uri Jesu kanakuae vierafe. Ijadufuo maeje fu akae ije bu mauike karina Godi baname isoevo ijiaru abe tuasema baki. Ro kuke fu kuae Godi fuka Asoe fuoneno kuae. Ijadufuo bu vierafega fuje fuka korofuo dabe una Godiki besu remo ijadufuo bu ijiege rei. Godi fu fari fuone Jesu daro maema ijene

¹⁹Ijadufuo Jesu fu una kiae, Vua ige naka ma kuariavo mukore fiefo. Na Godido Fari ige irere na renoejo ije name nare none vierafeva ijia renoejo baki. Ro nane irere Asoe none fu rega na giavo na ire ijiaru renoeve.

²⁰Ijadufuo maeje Asoe none ije fu Fari fuone ige naeje fuka oetuamo. Ijadufuo ire boeje fu renoeno ije fune Fari fuone ige na kuarieko na ije renoeve. Ro fu uri ire mamekanu gue igafiki ije nijasie na rega ja giabitie jaka oeseradiadufuo.

²¹Ro Asoe none fu e oevo ije fu kiaga bu una urivo. Ijadufuo Fari fuone ige nadua na e ije erane na vierafeva ije kia bu una urike.

²²Ro Asoe none ije fu e ume igia ise renoejo ije ise buone kena mazie giamo baki. Ro ire ije fune una na kuariega nare e ume igia ise renoejo ijiebuo ise ije fina ke mazie giake.

²³Ro na ijiege revo ijadufuo e boeje bu izege Asoe none ije bu aroevo ijiege buka una na dabe arorieke. Ijadufuo eranebe bu naebe na arorievo ije bu kuke Asoe none fu kiemo na ari ruaeva ije aroevo baki.

²⁴Ro vua ige naka ma kuariave, erare fu vua none fiena una e ije fu kiemo na ruaeva ije ma vierafekuva e ije fu vame ma karivako ije abeke. Fu ijiege rekina Godi fube rade una ise fuone ije kena mazie giana dabe isekafake. Ijadufuo maeje fune korufuo vame baronedufuo ije fune biona una vame ma karivako ijia ruae.

²⁵Ro vua ige naka ma kuariave maza ije e oeva bu Godido Fari ige itire none ije fiedufuo ije fune ivuare ro fune igifureki ruae. Ijadufuo eranebe bu itire none fiekuva bu una urike.

²⁶Asoe none ijare e ije vame ma karivako ije abe miamo. Ro vame besu ijiege fu daro miedo nadua na e ije vame ma karivako ije abe miake.

²⁷Ro kuke naeje na Ema ijiebuo Fari ijadufuo Godi fu daro miedo nare fina e ume igia ise revo ije kena mazie giake.

²⁸Ijadufuo jade uri vua ige na kuariavo ijadufuo oeserevo. Ijadufuo maeje maza ije fune ivuaredo e game mako ijia uniaeva ije bu itire none ije fiekuva bu mako ijia una usiae ruake.

²⁹Areme e ije bu ma ijiaru kenoeva ije bu una uriga Godi fu kiaga bu ijia ma karivake. Ro e ije bu ise renoeva ije bu una uriga Godi fu kame isekafiake. E ije bu Jesudo vua abe kuaenoejo ijene

³⁰Ro nana irere ume igia daro none ijia renoevo baki. Ro e ume igiebuo ise ije na kena mazie giavo ije naneka ma ijia renoeve. Ijadufuo maeje na none vierafeva ijia renoevo baki ro nane Asoe none fu kiemo na ruaeva ije irere fu vierafema na ijiaru renoeve.

³¹Ro na kono uri kiako vua none ige na kuariavo ije fuka mano kiakuva ja izege vua none ije ma vierafekuva baki.

³²Rove fu Godire noesina una e gue kuariakuma ije na vierafe vua irere fu kuariamo ije fuka ma.

³³Jare e kiavo bu va e Joni noesina kuavoga fuka samadukua vua maeje kuariae.

³⁴Rove na ema ijiebe noesina kuariavo ije na naebe ireobo vierafe. Ro na vua ijiege kuariakina ja fiena ma vierafekuva Godi fu maza rade ja karauniake.

³⁵Ro e Joni vua fu kuaenoema ije fu ikuosae abe sanana ruaema ijieki. Fu sanaema ije abe romoga jame maza aokube fu oemarejae.

³⁶Ro Joni vua ije fu noesina kuariaema ije fume sibaneke. Rove ire sumiki daroki ige na iviama revo ijare fuka ma ireobo. Ijadufuo ire mamekanu sumiki ige na rega ja giavo ije i ije Asoe none fu na miema ijene. Ijadufuo ja ire ije na revo ijia giana ma vierafero naeje na Godire kiemo na ruaevaro ja ije vierafedufuo.

³⁷Ro kuke Asoe none fu kiemo na ruaeva ije fune korofuo noesina kuariamo. Rove itire fuone ije jaka naebe fie ro kuke ni fuone ije ja naebe gae. Ijadufuo maeje ja e ije fu kiemo na ruaeva ije ja ma vierafevo baki. Ro kuke vua fuone ije bu oe jone ijia naovo baki.

³⁹Ja vierafero ja Godido vua bu isuibe isoeva ije mukoreigia danokuva ja vame ma karivako ije abekiro ja ijiege vierafei. Rove igia fie, vua boeje bu kuaena isoeva ije bu noesina isoe rove ja giavo baki.

⁴⁰Ro kuke ja none roga nare ifejiaga ja ma karivadufuo ije jaka ijuoneve.

⁴¹Na ema jare na dabe nidosiekiro na ije vierafeva baki. Ro kuke nane samadukua giaga ja izege Godi fu e oetuamo ja ijiege e oetuavo baki.

⁴³Nana Asoe none ijadufuo daro ro ive fuone ijia ruae. Rove jaka oe jone boeje ijiakuma vua none ije mukoe fiena abevo baki. Ro ja e be fume daro ro ive fuone ijia kekena vua fuone dabe kuariabitie jaka mukoreigia fiekinu irinake.

⁴⁴Ja vierafe jaka una joe nidoenamikuae vierafe. Rove ja Godire nidosiadufuo ije ja ireobo vierafena uri ijafunevo baki.

⁴⁵Ro kuke jade vierafero na nare ise jone ja renoejo ijene giana una Asoe none ije kuarakiro jade ijiege vierafevo. Ro fune Mosisido akae ije ja dabe ma vierafenoejo ijare una ise jone kena mazie giake.

⁴⁶Ro ja akae ije Mosisi fu abe miaema ije ja ma vierafenoejobitie ja kuke na ma vierafeke. Ijadufuo maeje vua gue fu isoena kuaema ije fu noesina kuae.

⁴⁷Ro ja Mosisido vua ije ja naebe ma vierafekuva ja izege una vua none ije ma vierafekono kiae?